Categories Navigation

Categories Navigation

El Principáu concede una prestación mensual de 448 euros a los menores n’acoyida familiar que va beneficiar a 300 neños y neñes

26/07/2022
  • La Llei de Garantía de Derechos y Prestaciones Vitales convierte a los y les menores en titulares de derechu d’esta ayuda económica, que garantiza’l financiamientu de la so mantención

El Gobiernu d’Asturies reconoz el derechu suxetivu de los menores que s’atopen n’acoyida familiar a recibir una prestación económica mensual de 448,28 euros, una midida que va beneficiar a 300 neños y neñes. La Llei nueva de Garantía de Derechos y Prestaciones Vitales establez que tolos menores que s’alcuentren nesta circunstancia, tanto en familia estensa como ayena, van ser titulares y destinatarios de l’ayuda pa garantizar la so mantención.

La norma establez que tolos menores acoyíos van recibir la cantidá mentada –la mesma que la del módulu básicu del salariu social–, que va aumentar un 5 % nel casu de que tengan reconocida una situación de dependencia o un grau de discapacidá superior al 45 %.

La prestación económica va concedese de manera automática cola acoyida y el pagu va facese a la persona o persones acoyedores, como venía faciéndose hasta agora con otra clas d’ayudes a estes families. Esti cambéu nun va implicar pa elles actuación nin xestión dala, porque la prestación va tramitase automáticamente.

El Boletín Oficial del Principáu (Bopa) publica güei la resolución de la Conseyería de Derechos Sociales y Bienestar pola que se reconoz la garantía económica pa menores acoyíos en familia estensa y ayena depués de la entrada en vigor de la Llei del Principáu d’Asturies 3/2021, del 30 de xunu, de Garantía de Derechos y Prestaciones Vitales.