Categories Navigation

Categories Navigation

L’informe sobre la calidá del aire del Principáu nel 2021 confirma la evolución positiva rexistrada nos últimos años

26/07/2022
  • La estación de Matadero, n’Avilés, foi la única que superó los valores tope establecíos y namás pa les partícules PM10

La Conseyería d’Alministración Autonómica, Mediu Ambiente y Cambéu Climáticu publicó güei l’informe sobre la calidá del aire d’Asturies nel 2021, que confirma la evolución positiva rexistrada nos últimos años y determina que toles estaciones de control reflexaron concentraciones inferiores a los valores tope recoyíos nel Real Decretu 102/2011, del 28 de xineru, pa tolos contaminantes midíos.

La única escepción foi la estación Matadero, allugada nuna zona industrial dafechu d’Avilés, polo que nun se considera representativa de la calidá del aire que respira la ciudadanía. Nesti llugar rexistráronse valores que superen los topes establecíos, namás pa les partícules menores de 10 micres (PM10). Amás, el Principáu ellaboró un plan d’acción a un plazu curtiu pa la meyora de la calidá del aire na vera esquierda de La Ría d’Avilés, actualmente en trámite d’información pública.

L’informe de la Viceconseyería de Mediu Ambiente proporciona una visión global de la calidá del aire na comunidá, describe cómo se fai la evaluación y muestra la evolución de los contaminantes dende’l 2004 nes cinco árees estremaes: les aglomeraciones de Xixón y Uviéu y les zones d’Avilés, les cuenques y l’Asturies rural.

Aglomeración de Xixón

Na aglomeración del área de Xixón analizáronse los datos de cinco estaciones, porque la d’Hermanos Felgueroso nun recoyó información suficiente nel cálculu anual como pa participar na evaluación, igual que la d’El Lauredal, incluyida como midida del plan d’acción a un plazu curtiu pa la zona oeste de Xixón aprobáu n’abril del 2021.

El balance muestra que nesta zona, de tolos contaminantes midíos, namás les partícules PM10 rexistraron superaciones de valores tope nel periodu 2004-2021. Otramiente, dende’l 2007 nenguna de les estaciones superó’l tope establecíu pa la concentración media anual d’esti contaminante. Al respective del máximu de díes con superaciones, fixáu en 35 al añu, la última vez que s’incumplió foi nel 2013 na estación d’Arxentina.

Aglomeración d’Uviéu

Nel casu d’Uviéu, l’últimu añu nel que se superaron los valores tope foi nel 2010, en concreto, na estación de Llugones (Siero) y pa les partícules PM10.

Zona d’Avilés

Na zona d’Avilés, toles estaciones, sacante la de Matadero, presenten resultaos positivos en tolos contaminantes.

Zona de les cuenques

Nes cuenques mineres, l’últimu añu nel que se superaron los valores tope marcaos pola normativa foi’l 2008, en partícules PM10.

Zona Asturies rural

Nesta zona nun hubo superaciones de los valores tope en tol periodu analizáu.

La viceconseyera de Mediu Ambiente y Cambéu Climáticu, Nieves Roqueñí, destacó que los datos son “globalmente positivos”. “Confiamos en que tanto’l plan puestu en marcha l’añu pasáu en Xixón como’l que se va desenvolver d’equí a poco na vera esquierda de La Ría d’Avilés, xunto cola aprobación del plan estratéxicu pa toa Asturies, nos dexen siguir avanzando na meyora de la calidá del aire, un oxetivu clave na acción d’esti gobiernu”, indicó.

La calidá del aire determínase dende los resultaos de dellos contaminantes na rede de control, formada por 23 estaciones automátiques d’inmisión allugaes mayoritariamente nel área central. Amás, el Principáu tien el sofitu de dos unidaes móviles pa campañes concretes. Aparte de la rede oficial, existen otres estaciones de midimientu que son propiedá d’empreses, de Puertos del Estáu y de Conceyos, que tienen datos que nun s’usen na evaluación.

L’informe ta disponible nesti enllaz: https://cutt.ly/FZoqEJL