• Les más de les intervenciones danse por mancadures nos miembros inferiores de los escursionistes, a menudo rellacionaes col usu d’un calzáu poco afayadizu

El Sepa recomienda planificar les rutes, qu’han axustase a la forma física de les persones participantes, usar equipos apropiaos y consultar les previsiones meteorolóxiques

Na mar, aconséyase nun saltar dende lo alto, atender les orientaciones del personal de salvamentu y tener en cuenta los ciclos de les marees

El Serviciu d’Emerxencies del Principáu (Sepa) fixo 122 rescates dende primeros d’añu y hasta’l llunes pasáu, el 74 % nel monte, con un total de 90 intervenciones. Otres 13 actuaciones del grupu con helicópteru medicalizáu de Bomberos d’Asturies correspuenden a asistencies na playa y la mar (11 %), mentes que les 19 que queden (15 %) céntrense en ríos y otros espacios del mediu natural.

Los más de los rescates actívense por mancadures nos miembros inferiores de los escursionistes, rellacionaes a menudo col usu d’un calzáu poco afayadizu. Tamién son motivos frecuentes d’intervención la desorientación de senderistes por un cambéu nes condiciones meteorolóxiques como, por exemplu, la borrina, o les persones que se queden atrapaes pola xubida de les marees.

Énte la previsión d’una llegada alta de turistes a Asturies nes selmanes vinientes y de les munches alternatives deportives y d’espardimientu n’espacios abiertos, el Sepa pide prudencia a la ciudadanía p’aforrar accidentes y riesgos innecesarios.

La orografía y el paisaxe del Principáu conviden a disfrutar d’actividaes na naturaleza: la mar, les playes, les cuenques fluviales, el monte y, sobre manera, Los Picos d’Europa son destinos habituales pa la práctica de delles disciplines. Nel branu, estes actividaes son entá más frecuentes, polo que resulta imprescindible aumentar les precauciones p’aforrar accidentes.

Recomendaciones nel monte

Nel monte fáense munches actividaes d’espardimientu y deportives con dellos graos de riesgu: senderismu, escalada, barranquismu, rápel, etcétera. Les propies característiques d’estes disciplines y el mediu onde se desenvuelven esixen tomar precauciones p’aforrar peligros.

Asina, amás d’aplicar siempre’l sentíu común, ye menester siguir recomendaciones básiques: planificar el percorríu, la distancia, el desnivel y el tiempu; informase de les previsiones meteorolóxiques, llevar el móvil cargáu y, na midida de lo posible, tamién bateríes auxiliares; llevar agua, comida, un botiquín pequeñu, mapa, brúxula o GPS, y informar a familiares o amigos del plan previstu y de la hora calculada pa volver.

Ye meyor salir siempre acompañáu y resulta clave adaptar l’actividá a la condición física de caún, y, nel casu de grupos, a la de la persona de menos resistencia. Tamién s’aconseya llevar ropa apropiao y equipu pa la época del añu y les condiciones del terrén.

Desque s’empiece la ruta, si zarra’l día, recomiéndase interrumpir la marcha y dir camín d’un sitiu seguru. Tamién ye básico alministrar enerxía y recursos pa encarar la vuelta con garantíes, amás de tener en cuenta la hora de l’atapecida y evitar pasos de riesgu, como cangues o pedreres.

Recomendaciones nes playes

Nesta época del añu, les actividaes d’espardimientu na costa, como la pesca, los saltos dende lo alto, el bucéu, la natación y otres actividaes acuátiques pueden provocar accidentes, por imprudencia o por un cambéu nes condiciones de la mar. 

Na playa ye preciso siguir en tou momentu les indicaciones y los avisos del personal de salvamentu, amás d’informase de los horarios de les marees pa pasiar pela costa o pescar nos cantiles.

Énte cualquier emerxencia ha llamase al 112 pa que’l personal del Sepa valore la situación y movilice los recursos oportunos.