• La Conseyería concede les 16.630 ayudes que cumplen colos requisitos de la convocatoria
• El valor calculáu de los volúmenes, que l’alumnáu usa en réxime d’empréstamu, aumenta a 105 euros por estudiante

La Conseyería d’Educación destinó una partida de 1.746.150 euros a subvencionar la creación de bancos de llibros de testu, que s’usen en réxime d’empréstamu, nos centros públicos de Primaria, Secundaria y Formación Profesional Básica pal cursu que vien. De les 34.777 solicitúes presentaes, concediéronse un total de 16.630 ayudes que cumplen colos requisitos de la convocatoria nueva.

Les subvenciones danse directamente a los centros educativos y el valor calculáu de los llibros que cada beneficiariu va recibir n’empréstamu aumenta a 105 euros. Con calter xeneral, esos volúmenes físicos o’l soporte informáticu equivalente van pasar a formar parte del bancu de llibros o del fondu bibliográficu del centru docente pa que se puedan usar nos cursos escolares socesivos.

Ente los requisitos p’acceder a estes ayudes figuren la non repetición de cursu y que la unidá familiar del alumnu o alumna nun supere unos máximos de renta determinaos. Amás, esi tope va aumentar en 5.000 euros nel casu d’estudiantes con necesidaes específiques d’apoyu derivaes d’una discapacidá o de capacidá intelectual alta. Tamién aumenta’l tope pa families numberoses: en 3.000 euros pa les de categoría xeneral y en 5.000 euros pa les de categoría especial.

La resolución de la convocatoria d’estes subvenciones pa llibros de testu va publicase’l 3 d’agostu nel Boletín Oficial del Principáu (Bopa). El plazu pa la presentación de recursos va tar abiertu del 4 d’agostu al 5 de setiembre, dambos inclusive.

Al empar, la Conseyería d’Educación destina otros 371.648 euros a ayudes pa l’adquisición de llibros de testu y material didácticu complementariu en centros concertaos. Ta previsto que la convocatoria se publique en setiembre.