• Los pidimientos superen les places disponibles n’estudios de families como Sanidá y Informática y Comunicaciones
• Educación incorpora once ciclos a la ufierta del añu académicu 2022-2023, dos d’ellos d’implantación nueva

Les solicitúes d’almisión pa Formación Profesional (FP) aumenten nos primeros cursos de los graos medios y superiores pal añu académicu que vien (2022-2023). Asina, en grau mediu presentáronse 3.940 pidimientos pa un total de 4.479 places, mentes qu’en grau superior recibiéronse 5.004 pa 4.623 puestos.

Tanto en ciclos medios como superiores, delles families profesionales presenten una diferencia importante ente les places ufiertaes y les solicitúes d’almisión. En concreto, en dalgunes enseñances rellacionaes cola sanidá, la demanda supera la ufierta, a pesar de que la Dirección Xeneral d’Enseñances Profesionales incorporó pal cursu qu’entra ciclos de grau mediu, como’l de Cuidaos Auxiliares d’Enfermería y el de Farmacia y Parafarmacia, o de grau superior, como’l d’Hixene Bucodental.

Al respective de l’atención a la demanda tan alta nos ciclos de la familia profesional de Sanidá nel grau superior, ha tenese en cuenta la dificultá añadida qu’implica’l fechu de que nun existan places abondes pa facer la formación en centros de trabayu.

Otra de les families que caltienen una demanda superior a la ufierta ye la d’Informática y Comunicaciones, a pesar d’aumentar les places nos últimos cursos.

La Conseyería d’Educación trabaya na ampliación de la ufierta en dambes families profesionales, tanto en Sanidá como n’Informática y Comunicaciones.

Pela so parte, la demanda nos ciclos de grau mediu del ámbitu industrial ye mui poca, a pesar de que’l Principáu dispón d’una ufierta completa nesti campu, con ciclos como Alministración y Xestión, Instalaciones Eléctriques y Automátiques o Mecanizáu y Caltenimientu Electromecánicu.
 

Ampliación del catálogu de títulos

El Gobiernu d’Asturies presentó en mayu un catálogu de títulos de FP pal cursu que vien onde aumenta la ufierta, cola mira d’avanzar na adaptación a les demandes del alumnáu y del sector empresarial.

En concreto, Educación aumentó la cartera de titulaciones cola incorporación de 11 ciclos formativos, 2 d’ellos d’implantación nueva y otros 9 qu’amplíen la ufierta de los yá existentes. Tamién ufierta 5 cursos nuevos d’especialización pal cursu 2022-2023.

Los ciclos d’implantación nueva son Paisaxismu y Mediu Rural, que va impartise nel IES Luces (Colunga), y el d’Estilismu y Dirección de Peluquería, que va cursase nel IES Pérez de Ayala (Uviéu).