• La conseyera de Derechos Sociales, Melania Álvarez, anunció güei la puesta en marcha d’esti gallardón anual, que va tener una dotación de 6.000 euros

El Gobiernu d’Asturies crea’l Premiu al Deporte Inclusivu, un gallardón anual dotáu con 6.000 euros, cola mira d’impulsar y reconocer el llabor de persones y entidaes que destaquen de manera especial pola so contribución a l’accesibilidá nel deporte y la cohesión social. 

La conseyera de Derechos Sociales y Bienestar, Melania Álvarez, anunció güei’l reconocimientu nuevu na celebración del XXIX Descensu del Sella Adaptáu. La prueba, entamada pola Federación de Deportes pa Persones con Discapacidá Física del Principáu (Fedema), tuvo la participación de 140 palistes, ente ellos, 60 deportistes con discapacidá.  
 
La finalidá del premiu ye reconocer a deportistes y tamién a quien desenvuelven y fomenten práctiques deportives inclusives ente la ciudadanía. Van poder optar al gallardón persones nacíes o residentes n’Asturies, amás de persones xurídiques con sede social nel Principáu. 

El xuráu va valorar, ente otros aspectos, la contribución de les propuestes a la difusión, promoción y defensa de los derechos de les persones con discapacidá, la inclusión de persones con diversidá funcional na práctica deportiva, la promoción de l’accesibilidá universal y la innovación de les iniciatives.