• Más del 17 % de tolos turistes que visitaron la comunidá nesti periodu veníen del estranxeru
• El númberu de viaxeros que llegaron al Principáu en xunu aumenta un 38,7 % en comparanza col mesmu mes del 2021

Los establecimientos turísticos asturianos acoyeron nel primer semestre del añu a 142.783 visitantes procedentes del estranxeru que xeneraron 305.524 pernoctaciones. Estos datos, publicaos güei pol Institutu Nacional d’Estadística (INE), suponen una medría importante en comparanza coles cifres del turismu internacional previes a la pandemia y establecen, amás, una cota histórica nueva pa esti periodu, porque, pela primer vez, supérense les 300.000 nueches d’estancia.

En total, nos primeros seis meses del añu, Asturies recibió 823.092 turistes y rexistró 1.779.409 pernoctaciones. El 17,3 % de los viaxeros veníen del estranxeru y xeneraron el 17,2 % de les nueches d’estancia. En toles modalidaes d’agospiamientu rexistráronse xubíes interanuales.

Al respective de xunu, les pernoctaciones medraron un 35,7 % en comparanza col mesmu mes del 2021, hasta algamar les 530.592, mentes que’l númberu de turistes aumentó un 38,7 %, hasta los 227.244. Esta evolución positiva destaca, sobre manera, n’hoteles y cámpines.

Tocante al emplegu, los establecimientos turísticos computaron en xunu 5.607 puestos de trabayu, un 18,8 % más que va un añu.