• La Conseyería destina 3,9 millones a la incorporación de profesionales de Pedagoxía Terapéutica y d’Audición y Llinguaxe a la rede pública y a la concertada

El Gobiernu d’Asturies va caltener nel sistema educativu pal cursu que vien (2022-2023) a alredor d’un centenar d’especialistes cola mira d’afianzar el sofitu al alumnáu más vulnerable y que sufrió con más intensidá les consecuencies de la pandemia. Estos recursos van repartise de manera proporcional ente la rede pública y la privada-concertada.

La midida va tener un costu superior a los 3,9 millones y la intención del Principáu ye financiala al traviés de la Estratexa del Fondu Social Européu 2021-2027, un programa pensáu pa promover un sistema educativu inclusivu, menguar los niveles d’abandonu escolar tempranu y modernizar la Formación Profesional (FP).

Nel sistema públicu, la Conseyería d’Educación va incorporar 75 profesionales: 35 de Pedagoxía Terapéutica (PT) y 40 d’Audición y Llinguaxe (AL), siempre que se contraten a xornada completa. Si se fixeren contrataciones a media xornada, el númberu de profesionales diba aumentar. Pela so parte, a la rede concertada correspuénden-y 8,75 y 10, respectivamente, pa caún de dambos perfiles. Nesti casu, el cálculu faise por hores y non por xornaes, d’ehí qu’apaezan cifres con decimales cuando s’apliquen a un horariu docente completu.

El sistema educativu yá tuvo’l cursu pasáu un refuerzu estra de personal especializao en Pedagoxía Terapéutica (PT) y Audición y Llinguaxe (AL) de 159 places completes na escuela pública y de 33,2 na concertada.

La Conseyería complementa esta midida col programa d’unidaes d’acompañamientu y orientación personal y familiar, compuestes por profesionales d’orientación y profesoráu técnico de servicios a la comunidá, d’alcuerdu col Mecanismu de Recuperación y Resiliencia (MRR). Otramiente, los centros integraos dientro del programa PROA+ disponen dende xineru de personal complementario.

La conseyera d’Educación, Lydia Espina, considera qu’esti refuerzu ye “imprescindible, porque l’alumnáu más vulnerable sigue padeciendo los efectos negativos de la pandemia y rique d’un sofitu perespecializáu”. Tamién sorraya que se trata d’un refuerzu escepcional rellacionáu cola covid. Los profesionales de PT y AL han organizar el llabor “de manera individual o en grupos pequeños” pa llograr que l’alumnáu algame los oxetivos de la etapa obligatoria.