• El Principáu encadena seis meses siguíos de creación de puestos de trabayu, depués de ganar 3.783 afiliaos a la Seguridá Social en xunetu
• La comunidá algama los 378.645 ocupaos y ye la segunda, depués de Cantabria, con meyor evolución del país
• La industria caltién la fortaleza y concentra’l volume de paraos más baxu de tola serie histórica, dende’l 1990  

El desemplegu menguó n’Asturies en xunetu en 1.464 persones (2,43 %), hasta les 58.706, la cifra más baxa dende payares del 2008, d’alcuerdu col informe publicáu güei pol Ministeriu de Trabayu y Economía Social. Amás, la comunidá encadena seis meses siguíos de creación de puestos de trabayu, depués de ganar 3.783 afiliaos a la Seguridá Social. Asina, la ocupación medró’l mes pasáu’l 1,01 %, hasta asitiase en 378.645 persones, el meyor datu rexistráu dende setiembre del 2011. 
    
El Principáu ye la segunda comunidá con meyor evolución del emplegu en términos relativos y muestra un comportamientu más favorable que la media nacional, porque la ocupación menguó en xunetu n’España’l 0,04 %. Dende febreru, creáronse 11.016 puestos de trabayu n’Asturies. Tamién ye la segunda comunidá onde hubo más baxada intermensual del paru, qu’a nivel nacional xubió un 0,11 %.

En comparanza con xunetu del 2021, la baxada del desemplegu asítiase nel 9,91 %, lo que supón 6.459 persones ensin trabayu menos que va un añu. D’esta manera, Asturies acumula 16 meses siguíos de baxada interanual.

El paru menguó en dambos sexos, en tolos grupos d’edá y en tolos sectores. La mengua foi dalgo superior ente les muyeres (2,57 % frente al 2,24 % de los homes) y apréciase a les clares ente la mocedá (7,89 %), na agricultura (5,87 %) y na industria (3,38 %). La cayida nel sector servicios foi del 2,31 % y nel colectivu ensin emplegu anterior, del 3,12 %.

Destaca sobre manera’l bon comportamientu de la industria, con retrocesos mensuales penriba de la media y del 13,47 % en términos interanuales. La cifra de demandantes d’emplegu nel sector asítiase en 4.284 y ye la más baxa de tola serie histórica (dende l’añu 1990). 

Por actividaes económiques, les baxaes más grandes na industria correspondieron al sector químicu; a la recoyida, tratamientu y eliminación de residuu; a la captación, depuración y distribución d’agua, y a la fabricación de productos minerales non metálicos. Nel sector servicios, les baxaes más grandes rexistráronse nel comerciu y la hostelería, l’asistencia n’establecimientos residenciales, y les actividaes de seguranza y investigación. 

El paru menguó en Xixón, Uviéu y Avilés, anque con baxaes per debaxo de la media rexonal. El retrocesu más marcáu diose en Xixón, con un 2,25 %. Como aveza a ser nestes feches, los conceyos más turísticos rexistren les meyores cifres, anque’l paru nun mengua igual en toos ellos, sinón que lo fai más en Llanes, Colunga, Ribeseya y Tapia. 

Tocante a la contratación, en xunetu medró un 2,14 % en comparanza con xunu, con 602 contratos más, hasta algamar los 28.752. El númberu de contrataciones indefiníes asitióse en 9.506. Anque esta cifra supón una baxada en comparanza col mes anterior, supera nun 331,5 % la que s’algamó va un añu. Nesi sentíu, la contratación indefinida representa agora’l 33 % de tolos contratos mensuales, cuando va un añu suponía’l 6,6 %.