• El domingu quedaben hospitalizaes con confirmación de coronavirus 228 persones: 217 en planta y 11 n’UCI

Asturies sigue en nivel mediu d’alerta por covid, d’alcuerdu colos criterios de la estratexa nueva de vixilancia y control qu’entró en vigor el 28 de marzu. La evolución de la pandemia nel Principáu pue consultase nesti enllaz:
https://www.sanidad.gob.es/profesionales/saludPublica/ccayes/alertasActual/nCov/documentos/Actualizacion_621_COVID-19.pdf

Los indicadores rellacionaos col usu de los servicios asistenciales son los que determinen el nivel de riesgu, anque’l sistema actual de siguimientu ufierta tamién información adicional sobre la tresmisión del virus ente la población de 60 y más años.

Otramiente, del 28 al 31 de xunetu morrieron n’Asturies por coronavirus 13 persones con edaes comprendíes ente los 65 y los 97 años. Amás, el domingu pasáu quedaben hospitalizaos con confirmación de covid 228 pacientes: 217 en planta y 11 n’UCI.

Pruebes diagnóstiques d’infección activa

Nel contestu actual d’alerta alta que vive’l Principáu, les pruebes diagnóstiques d’infección activa fáense d’alcuerdu col criteriu del profesional sanitariu qu’atienda a una persona con clínica compatible, con independencia de la edá o d’otros factores de vulnerabilidá.

Salú aconseya a les persones con síntomes que, tengan o non confirmación con una prueba diagnóstica, cumplan coles midíes de protección yá conocíes: llaváu de manes, distancia social, usu de la mázcara y restricción al máximu de les interacciones sociales.

Na población xeneral, los casos confirmaos leves y asintomáticos nun tienen que facer aislamientos y han siguir les recomendaciones preventives comentaes enantes.

Nos ámbitos vulnerables –centros sanitarios o sociosanitarios-, si’l positivu ye un residente o usuariu, va facese un aislamientu de 5 díes dende qu’empiecen los síntomes o dende’l diagnósticu nos casos asintomáticos. L’aislamientu va acabar siempre que trescurran 24 hores depués del fin de los síntomes.

Si’l positivu ye un trabayador, nun ha dir al centru de trabayu nos primeros 5 díes dende qu’empiecen los síntomes o dende la fecha de diagnósticu en casu de ser asintomáticu. Pa la so reincorporación han trescurrir 24 hores de magar desapaezan los síntomes y se tenga un test d’antíxenos negativu.

Amás, nos centros residenciales pueden aplicase midíes d’intervención y control específiques énte la detección d’un casu namás en residentes o de trés casos en trabayadores.

Campaña de vacunación

Les autoridaes sanitaries insisten na importancia de vacunase, sobre manera quien tovía nun lo fixeren o tean pendientes de completar la pauta o dosis de recuerdu. 

D’alcuerdu colos últimos datos, el 91,06 % de la población asturiano (927.658 persones) recibió yá dos dosis de la vacuna contra’l coronavirus, mentes que’l 92,22 % (939.491 persones) tien polo menos la primera. Si se garra como referencia la población diana (a partir de 5 años), el porcentaxe con dosis doble algama’l 93,84 %. En total, de magar empezó la campaña, inyectáronse 2.502.884 dosis.

Al respective de la profilaxis de refuerzu, hasta agora alministráronse 736.157, lo que representa una cobertura del 85,46 % de les persones mayores de 30 años.