• La esposición La cultura sidrera, esencia d’Asturies. Conexón natural reflexa la tresformación de la comunidá al traviés de dos elementos vertebradores del territoriu: la sidra y el tren

El Gobiernu del Principáu presenta anguaño nel pabellón de la Feria Internacional de Muestres d’Asturies (Fidma) la esposición La cultura sidrera, esencia d’Asturies. Conexón natural, que reflexa la tresformación de la comunidá al traviés de dos elementos vertebradores del territoriu: la sidra y el ferrocarril.

La sidra y el ferrocarril comparten, amás, un mesmu compromisu col futuru y l’apertura al mundu de la comunidá. La primera, al traviés de la candidatura a patrimoniu cultural inmaterial de la humanidá; l’AVE, pol cambéu sustancial que va suponer na meyora de les comunicaciones.

La exhibición repasa cómo la cultura sidrera supo adaptase col pasu del tiempu gracies a la modernización de procesos, la innovación y la busca de la escelencia del productu, too eso ensin perder nenguna de les señes d’identidá esenciales, que convirtieron esa cultura milenaria nún de los emblemes principales d’Asturies.

Asina, al traviés de paneles y audiovisuales, el públicu que visite’l pabellón va poder conocer les races de mazana usaes pa ellaborar la bebida autóctono, los llagares tradicionales y modernos y toles empreses auxiliares que participen nel ciclu d’ellaboración del productu. Amás, va descubrir les característiques de la sidra axampanao y de lo natural con denominación d’orixe protexida (DOP), probar la so maña nel túnel d’echar sidra y sacar semeyes nun chigre tradicional auténticu.

Amás, la planta baxa del pabellón dedícase a la llegada del AVE a Asturies, una clave fundamental pa la meyora de les comunicaciones na comunidá. Na esposición Conexón natural. L’alta velocidá llega a Asturies, l’Alministrador d’Infraestructures Ferroviaries (Adif) muestra, al traviés d’infografíes y imáxenes, los grandes llogros n’inxeniería, sostenibilidá y conexón fechos na llinia que va xuntar Uviéu con Madrid de manera envolvente y innovadora.

Los visitantes van poder descubrir los beneficios que va trayer la llinia nueva d’alta velocidá, usar un espeyu interactivu y disfrutar d’un audiovisual inmersivu, onde’l paisaxe asturianu garra un protagonismu especial y muestra’l retu que supunxo pa la inxeniería española resalvar la muralla natural del cordal cantábricu nun proyectu que va crear una conexón natural d’Asturies col mundu.

Actividaes complementaries nel pabellón del Principáu

• Sábadu 6 d’agostu. De 12:30 a 13:30 y de 18:30 a 19:30 hores. Taller familiar L’orixe de la sidra… les mazanes.
• Domingu 7 d’agostu, a les 19:00 hores. Festival musical de cantares tradicionales y populares alredor de la sidra y la mazana, con Anabel Santiago.
• Xueves 11 d’agostu. De 11:30 a 14:30 y de 18:30 a 20:30 hores. InmerSidra: pon a prueba nun entornu de realidá virtual la to maña echando sidra d’Asturies.
• Sábadu 13, domingu 14 y llunes 15 d’agostu, de 12:00 a 14:00 y de 18:00 a 20:00 hores. Actividaes d’animación Juega a lo grande y pon a prueba la puntería y precisión col xuegu de la rana xigante.
• Xueves 18 d’agostu, a les 18:30 hores. ¡Ven a echar un culete! Masterclass participativa cola echadora sierense Loreto García.
• Sábadu 20 d’agostu a les 12:30 y a les 18:30 hores. Cuentos, pomaradas y llagares, narración oral con David Acera.