• La sinfónica asturiana va ufiertar esti mes seis conciertos de baldre en Nava, Cabrales, Cabranes, Cangues d’Onís, Piloña y Noreña, baxo la batuta del maestru Daniel Sánchez Velasco

La Orquesta Sinfónica del Principáu d’Asturies (OSPA) va ufiertar esti mes seis conciertos de baldre en dellos conceyos del Camín de los Santuarios como parte del programa conmemorativu de los 1.300 años de la batalla de Cuadonga qu’impulsa’l Gobiernu d’Asturies. La OSPA va actuar en Nava, Cabrales, Cabranes, Cangues d’Onís, Piloña y Noreña, baxo la batuta del maestru avilesín Daniel Sánchez Velasco.

El primer recital va facese’l martes que vien, día 9, na plaza del Conceyu de Nava, a partir de les 19:00 hores. El repertoriu incluye la Obertura de Don Giovanni, de Mozart; la Sinfonía n.u 8 en sol mayor, de Dvorak, y la Danza húngara n.u 5, de Johannes Brahms.

La xira de la OSPA pelos conceyos del Camín de los Santuarios enmárcase nes actividaes programaes pola Conseyería de Cultura, Política Llingüística y Turismu pa celebrar l’aniversariu de la batalla de Cuadonga, qu’incluyen conciertos, esposiciones, xornaes científiques, conferencies, espectáculos teatrales o la edición de publicaciones específiques. L’apertura oficial del Camín de los Santuarios, celebrada ayeri nun actu onde participaron los presidentes d’Asturies, Adrián Barbón, y de Cantabria, Miguel Ángel Revilla, tamién forma parte de les acciones conmemoratives. 

El Camín de los Santuarios, la ruta que xunta Llébana con Uviéu, pasando per Cuadonga, representa un activu cultural y turísticu nuevu pa los once conceyos que traviesa: El Valle Altu de Peñamellera, El Valle Baju de Peñamellera, Cabrales, Onís, Cangues d’Onís, Parres, Piloña, Nava, Noreña, Siero y Uviéu.

El programa d’actuaciones de la OSPA ye esti:

• 9 d’agostu. Nava. Plaza del Conceyu (19:00 hores).
• 10 d’agosto. Cabrales. Esplanada del Conceyu, Carreña (19:00 hores).
• 11 d’agosto. Cabranes. Esplanada de la Hostería de Torazu (19:00 hores).
• 12 d’agosto. Cangues d’Onís. Basílica de Cuadonga (19:00 hores).
• 16 d’agosto. Piloña. Santuariu Virxe de la Cueva. L’Infiestu (19:00 hores).
• 17 d’agosto. Noreña. Ilesia de Santa María (20:00 hores).