Categories Navigation

Categories Navigation

Asturies axúntase a la Carta Internacional de Datos Abiertos

12/04/2021

- El Principáu conviértese na tercer comunidá autónoma española en sumase al Open Data Charter.

- Más de 150 gobiernos y organizaciones internacionales respaldaron yá esti documentu .

El Principáu d'Asturies xuntóse a la Carta Internacional de Datos Abiertos, conocíu tamién Open Data Charter, lo que la convierte na tercer comunidá autónoma en sumase a esta iniciativa, tres Cataluña y Castiella y Llión.

Open Data Charter ye un proyectu de collaboración ente más de 150 gobiernos y organizaciones que trabayen de mancomún pa promover polítiques y práctiques que dexen axuntar, compartir y usar datos gubernamentales baxo un conxuntu de principios y bones práctiques.

La Carta Internacional de Datos Abiertos nació n'ochobre de 2015 y yá cunta ente los sos miembros con países como Francia, Italia o Reinu Uníu, y organizaciones como la Fundación World Wide Web, l'Alianza pal Gobiernu Abiertu o la empresa IBM.

La conseyera de Presidencia, Rita Camblor, esplicó que l'adhesión del Principáu a esti documentu supón la confirmación del compromisu del Executivu asturianu colos principios de Gobiernu Abiertu. “Ye una doble oportunidá porque los datos abiertos nun son namás el corazón d'una nueva Alministración, tresparente, cercana y enfocada a algamar les meyores soluciones a los retos qu'encaramos como sociedá, sinón que tamién les empreses y la ciudadanía van poder beneficiase del so accesu a ellos”.

L'apueste del Principáu por avanzar nesta materia va complementase con un nuevu portal autonómicu de Open Data que va ver la lluz a lo llargo d’esti añu.