Categories Navigation

Categories Navigation

El Principáu presenta énte una ventena d'empreses chines los atractivos d'Asturies como llugar pa la inversión

14/04/2021

- L'apueste pola industria, una localización estratéxica, el talentu profesional y un ecosistema innovador, ente les ventayes de la comunidá pa desenvolver proyectos empresariales.

- El conseyeru Enrique Fernández inaugura una xornada entamada pol Idepa y la Cámara de Comerciu del país asiáticu n'España .

La Conseyería d'Industria, Empléu y Promoción Económica presentó güei les fortaleces d'Asturies como destín pa la inversión a una ventena de corporaciones y empreses chines. L'Institutu de Desenvolvimientu Económicu del Principáu (Idepa), en collaboración cola Cámara de Comerciu y Inversiones de China n'España (Ccince), entamó un seminariu online, que cuntó cola participación de representantes de compañíes chines con sede n'España de distintos sectores productivos y con potencial interés n'invertir na comunidá.

L'alcuentru, convocáu nel marcu de la Estratexa d'Atracción d'Inversiones impulsada pol Principáu, cuntó cola participación del conseyeru, Enrique Fernández, quien destacó la relevancia de la collaboración ente l'Executivu autonómicu y Ccince. “Ye importante pa conectar les estratexes de les empreses chines con intereses n'España y les posibilidaes d'inversión qu'ufierta Asturies”, señaló.

Fernández sorrayó l'apueste del Principáu pol sector industrial que, na so opinión, representa una de les principales fortaleces de la comunidá. “Sigue siendo la exa de la nuestra economía, gracies al fuerte compromisu políticu ente l'Alministración rexonal, les empreses y los actores sociales”, valoró.

“Esta crecedera de la economía y de l'actividá industrial asturiana podría esplicase fácilmente nel trabayu collaborativu y l'esfotu de les empreses y l'Alministración autonómica escontra un oxetivu común: superar los retos de la cuarta revolución industrial, basaos tanto na calidá como nel compromisu, y asitiar Asturies como referente industrial n'Europa”, añedió Fernández.

Pela so parte, la directora xeneral del Idepa, Eva Pando, presentó Asturies como llugar d'oportunidaes pa la inversión y insistió en que'l Principáu “cunta con una redolada fuertemente competitiva, una localización estratéxica, el talentu de les persones, un ecosistema innovador, el sofitu de l'Alministración al traviés del financiamientu adaptáu a cada proyectu y una estraordinaria calidá de vida”.

Na xunta tamién participaron dos empreses líderes n’ámbitu internacional asitiaes nel Principáu: TK Elevator y Reny Picot, representaes, respectivamente, por Juan Carlos Menéndez y Javier Suárez, quien amosaron les ventayes del desenvolvimientu productivo de la so actividá n'Asturies.

Amás, l'alcalde de Siero, Ángel García, resaltó'l potencial del polígonu de Bobes p'atraer proyectos nuevos, como'l d’Amazon. La clausura de la xornada corrió al cargu del presidente de la Ccince y director xeneral de China Construction Bank n'España, Bo Wang.

 

Idepa, sociu d'honor de Ccince

Les xeres de promoción d'Asturies como llugar d'inversión dieron como resultáu una cartera de más de 60 proyectos susceptibles d'implantase na comunidá, pertenecientes a actividaes bien diverses y procedentes de países como Reinu Xuníu, Corea del Sur, Israel, India, China y Colombia, ente más otros.

Xunto coles llabores de presentación de la rexón, la estratexa cunta con otres trés exes d'actuación: l'aceleración de proyectos estratéxicos, la oficina Asturies Industrial y el pool d'inversores. D'esta miente, el Principáu ufierta a promotores y potenciales inversiones un tratu personalizáu n'asuntos rellacionaos col accesu a un esquema de financiamientu a la midida de cada proyectu, recursos humanos disponibles en cada sector, entidaes d'innovación y tecnoloxía, entornu industrial y localizaciones disponibles según los requerimientos plantegaos.

Ccince, fundada en 2012, ye la única cámara de comerciu billateral ente China y España. Cunta con 62 socios, ente los que s'atopa l’Idepa, que forma parte de los ocho miembros d'honor. La cámara representa a una gama amplia de sectores, como'l financieru, les telecomunicaciones, el tresporte aéreo y marítimo, el sector siderúrxicu, l'hosteleru o les enerxíes anovables. El so principal oxetivu ye promover intercambios económicos y empresariales ente China y España.