Categories Navigation

Categories Navigation

El Principáu destina 356.719 euros a les 30 oficines xóvenes como elementu esencial d’apoyu a la mocedá en tola comunidá

14/04/2021

- El Gobiernu d'Asturies anueva'l so compromisu con esta rede, clave p’apoyar les iniciatives y proyectos d'esti grupu de población.

- Presidencia súmase a la celebración del Día Européu de la Información Xuvenil, dedicáu esti añu a la salú mental .

L'Institutu Asturianu de la Mocedá va destinar esti añu 356.719 euros a los convenios con 24 conceyos pal caltenimientu de les 30 oficines xóvenes qu'empresten serviciu a esti grupu de población en tol territoriu. El Gobiernu d'Asturies anueva asina'l so compromisu con estos centros.

“Les oficines xóvenes constitúin la meyor forma de facer llegar la información relevante a la mocedá d'Asturies, de sofitar los sos proyectos y de sofitar les sos iniciatives. Amás, faciliten que la población mozo del centru y de los estremos de la comunidá apuerte a los mesmos servicios”, destacó la conseyera de Presidencia, Rita Camblor.

Camblor fixo estes declaraciones na so visita a la Oficina Xoven de Pola de Siero, con motivu del Día Européu de la Información Xuvenil, que se celebra'l próximu sábadu, 17 d'abril. Nel actu tuvo acompañada pola directora xeneral de Mocedá, Diversidá Sexual y Derechos LGTB, Clara Sierra; l'alcalde de Siero, Ángel García, y la conceyala de Cultura; Mocedá y Recursos Humanos del conceyu, Aurora Cienfuegos.

Amás, el Gobiernu d'Asturies tamién presentó en Siero'l nuevu logotipu de la Rede d'Oficines Xóvenes, que va dexar unificar la imaxe d'esti serviciu esencial.

Les persones moces de toa Europa conmemoren cada 17 d'abril la declaración en 1983 d'esti día por parte de l'Axencia Europea de la Información y l'Asesoramientu Xuvenil (Eryica), a la que se xunta l'Institutu de la Xuventú d'España (Injuve), como oportunidá pa reconocer el llabor de los servicios d'información xuvenil en toa Europa.

Por esta razón, delles oficines entamen estos díes actividaes rellacionaes cola salú mental ente la mocedá, tema escoyíu anguaño pa la celebración. L'oxetivu ye animar a la población mozo a exteriorizar les sos emociones, problemes y medranes, mesmo que concenciar sobre la importancia del bienestar emocional. Pa llograr esti propósitu, la programación inclúi talleres, consultorios, reportaxes televisivos y espacios radiofónicos.

   

 

Audio (Mp3: 482 Kb)