Categories Navigation

Categories Navigation

Salú convoca la fase autonómica del concursu escolar Consumópolis 16

14/04/2021

- Curia'l to planeta con un consumu responsable ¿Atrévesti? ye'l lema d'esta edición, que va desenvolvese de forma virtual.

- El plazu d'inscripción va permanecer abiertu hasta'l 21 de mayu pal alumnáu a partir de 5.u de Primaria .

La Conseyería de Salú convoca la fase autonómica del concursu escolar Consumópolis 16, que nesta edición celébrase col lema Curia'l to planeta con un consumu responsable ¿Atrévesti? El Boletín Oficial del Principáu (BOPA) publica güei’l nomamientu del xuráu y les bases del certame, empobináu al alumnáu a partir de 5.u d'Educación Primaria.

Consumópolis ye una plataforma educativa pa promover la reflexón de forma consciente, crítica y solidaria sobre'l consumu responsable y la calidá de vida. Los equipos que participen nel concursu van tar integraos por cinco estudiantes. Cada alumnu va escoyer un avatar y va completar un percorríu pela ciudá de Consumópolis, resolviendo diverses pruebes, de calter pedagóxicu y lúdicu.

Daes les escepcionales circunstancies que supón la pandemia sanitaria, esta edición va desenvolver de forma virtual. D'esta miente, los ganadores de la fase autonómica van ser quien más puntuación llogren nesti percorríu virtual.

El plazu d'inscripción va permanecer abiertu hasta'l 21 de mayu na páxina web: www.consumopolis.es.

Les bases establecen trés categoríes:

  • Nivel 1: pa 5.u y 6.u d'Educación Primaria.
  • Nivel 2: primer y segundu cursos d'Educación Secundaria Obligatoria.
  • Nivel 3: tercer y cuartu cursos d'Educación Secundaria Obligatoria.

Los premios van consistir nuna dotación económica pa la compra de material escolar y/o actividaes educatives vinculaes a la formación del alumnáu en materia de consumu. Asina, los vencedores de cada nivel van llevase 600 euros y los segundos clasificaos, 400 euros, amás d'un diploma acreitativu pa los integrantes de los equipos. Asina mesmo, los ganadores de cada categoría van representar al Principáu na fase nacional.

Na edición del añu pasáu participaron 65 equipos, once más que na convocatoria anterior, procedentes de 15 centros educativos.

Tola información ta disponible nel siguiente enllaz: http://www.cfc-asturias.es/noticias/show/1728-convocatoria-autonomica-del-concurso-escolar-consumopolis16