Categories Navigation

Categories Navigation

Tinéu va disponer de cobertura de banda ancha na práctica totalidá del municipiu

15/04/2021

- Los planes d’ estensión de fibra óptica van facilitar la conectividá a más de 9.000 habitantes en 323 localidaes .

- El conseyeru de Ciencia ya Innovación, Borja Sánchez, destaca l’esfuerzu por reducir la brecha dixital nel territoriu .

La conectividá va cubrir casi la totalidá de la población del conceyu de Tinéu cuando concluyan los Planes d'Estensión de la Banda Ancha (PEBA). Les últimes actuaciones tán n'execución ya impliquen la llegada de la fibra óptica a 323 localidaes con más de 2.000 viviendes. El conseyeru de Ciencia, Innovación y Universidá, Borja Sánchez, visitó güei el conceyu y axuntóse col alcalde, José Ramón Feito, con quien analizó les telecomunicaciones y tamién visitó la Ganadería de Baldomero pa conocer la robotización de la esplotación.

Les actuaciones incluyíes nos Planes d'Estensión de la Banda Ancha (PEBA) van ameyorar la conectividá de más de 9.000 habitantes y van permitir la eliminación nel conceyu de les denominaes zones blanques, núcleos de población con una velocidá de navegación inferior a 30 megabytes per segundu.

Con 540 kilómetros cuadraos, Tinéu ye'l segundu conceyu con más estensión y con más del 80% de dispersión xeográfica, yá que cunta con 272 localidaes con menos de 30 habitantes. Sánchez destacó l'esfuerzu realizáu nos últimos años por combatir la fienda dixital nel territoriu asturianu.

Cuando concluya el desplegue de la banda ancha na rexón, van ser casi 108.000 los llares que van disponer d'esta nueva tecnoloxía, lo que supón un 97% de la población. Pa aquelles zones onde nun pueda llegar la fibra y queden entá en zona blanca, el conseyeru recordó que se van buscar alternatives de la mano de los conceyos.

 

Audio