Categories Navigation

Categories Navigation

La osezna recoyida en Somiedu a finales d’ agostu del añu pasáu, reintroducida nel Parque Natural de Redes

17/04/2021
  • L'exemplar foi lliberáu nesta Reserva de la Biosfera nuna zona con disponibilidá d'alimentu y escasa presencia humana
     
  • Mediu Natural caltián un dispositivu de siguimientu activu del plantígradu pa comprobar la so adaptación

 

La cría d'osu cantábricu recoyida a finales del pasáu agostu por axentes del Mediu Natural del Principáu nel conceyu de Somiedu, foi reintroducida, el xueves, 15 d'abril, nel Parque Natural de Redes. Remata asina'l trabayu coordináu ente la Conseyería de Mediu Natural y Cohesión Territorial d'Asturies, les árees homólogues de Cantabria y Castiella y Llión, y el Ministeriu pa la Transición Ecolóxica y el Retu Demográficu.
 
La zona de la suelta foi escoyida n'analizando múltiples variables, ente les que destaquen la disponibilidad d'alimentu y la baxa presencia de persones. El so treslláu al núcleu oriental del cordal cantábricu podría contribuyir a conectar la población osera presente nesta área, non bien numberosa, cola del occidente, muncho más estabilizada. Nesta progresión de la población occidental, resulta vital el sofitu de les comunidaes locales como la de Somiedu (llugar de procedencia), na qu'esta especie forma yá parte indisoluble del so territoriu y del so desenvolvimientu socioeconómicu.
 
Cola reintroducción de la osezna nesta redolada favorable pal so desenvolvimientu concluyó solo xuna parte del procesu. Agora, pa siguir la so adaptación al mediu, empieza la fase de siguimientu activu per parte del cuerpu técnicu y axentes del Mediu Natural de la conseyería, na que se va utilizar tecnoloxía de xeolocalización y monitorización en tiempu real. Amás, va siguir col trabayu coordináu coles otres comunidaes autónomes y el ministeriu.
 
Axentes de la Guardería del Mediu Natural alcontraron el pasáu branu xuna osa con dos críes nel Valle de Saliencia, en Somiedu. Mientres el siguimientu, comprobaron qu’ún de los esbardos perdía condición corporal y costába-y cada vez más siguir al grupu. A finales d'agostu, la cría foi recoyida nos alredores de la localidá d’ Éndriga y por cuenta del so estáu foi treslladada a una clínica d'Uviéu. 
 
La osezna presentaba hipotermia, hipoglucemia, un pesu bien per debaxo de lo normal pa la so edá -6,5 quilos (cuando'l pesu averáu d'un esbardo de 8 meses ye de 15-20 quilos)- mesmo que mancadures cutanees y numberoses firíes infectaes compatibles con mordedures.
 
Una vegada estabilizada, foi treslladada al Centru de Recuperación de la Fauna Montesa del Gobiernu de Cantabria pa siguir cola so recuperación. Ellí permaneció hasta avientu, momentu en que foi movida al Centru de Valsemana, en Llión. Nesti espaciu en semillibertá permaneció los postreros cuatro meses, como pasu previu a la so reintroducción.
 
La evolución de la osezna mientres esti tiempu, nel qu'algamó una complexón  propia de la so edá (aproximao 36 quilos de pesu), foi bien positiva, tanto a nivel clínicu como de comportamientu, y amosó cada vez mayores periodos d'actividá y xuegu. Amás, siguió una rutina d'arriquecimientu ambiental y de cuidaos veterinarios n'aislamientu total y baxu videovixilancia, coles mires de fomentar les actitúes normales d'un esbardu y evitar la so habituación a les persones.