Categories Navigation

Categories Navigation

El plan director d’abastecimientu d’agua del Principáu prevé una inversión de 423 millones hasta’l 2030

23/04/2021

- La Conseyería de Mediu Ambiente y Cambéu Climáticu empieza güei’l trámite d’información pública pa un periodu de 45 díes.

- El proyectu busca asegurar la calidá y cantidá del agua, reforzar el sistema central y estender el suministru n’alta a tola comunidá.

La Conseyería d’Alministración Autonómica, Mediu Ambiente y Cambéu Climáticu sacó güei a información pública’l Plan Director de Suministru d’Agua del Principáu 2020-2030, que prevé una inversión de 423 millones nesi periodu, col oxetivu principal de garantizar el suministru sostenible a tola población asturiano y a los sectores económicos. Amás, les actuaciones incluyíes diríxense, ente otros aspectos, a la meyora de la calidá tanto del agua abastecío como de les mases naturales.

“Esta meta tien de dir acompañada inescusablemente de la protección de les mases d’agua natural y del mediu ambiente, respetando los caudales ecolóxicos y l’usu sostenible del recursu”, señaló la viceconseyera de Mediu Ambiente y Cambéu Climáticu, Nieves Roqueñí. Nesti sentíu, amestó que tamién ye menester “tener en cuenta la sostenibilidá financiera”, lo qu’obliga a asegurar la recuperación de los costos de los servicios rellacionaos col agua, incluyíos los medioambientales.

El documentu estructúrase en cuatro programes: infraestructures, xestión y gobernanza, calidá del agua y sostenibilidá. Estos programes desenvuélvense, amás, al traviés de 16 llinies d’actuación.

Al respective de les infraestructures, el diagnósticu del plan constata qu’Asturies dispón d’un recursu total superior a les demandes anuales conxuntes de tolos usos. Sicasí, n’años de seca produzse’l riesgu de desabastecimientu de resultes de la capacidá insuficiente de regulación del sistema actual. Esti fechu, amás, pue vese agraváu polos efectos del cambéu climáticu. Por eso, el plan propón reforzar el recursu reguláu disponible pal sistema de suministru de la zona central, dotar a tolos conceyos d’una fonte de suministru garantizada, diversificar les fontes pa suministru y amenorgar la presión sobre los recursos naturales non regulaos.

La viceconseyera manifestó que, acullá de les infraestructures nueves o la renovación de les existentes, ye menester encarar tamién “toos aquellos aspectos rellacionaos col ciclu integral y sostenible del agua, incluyendo los efectos del cambéu climáticu, la economía circular del agua y la so gobernanza”.

En cuanto al futuru de la xestión, Roqueñí resaltó la importancia del Consorciu d’Agua d’Asturies (Cadasa): “Esti modelu de consorciu, que’l so meyor exemplu ye Coxersa, demostró’l so éxitu n’Asturies, polo que la nuestra intención ye que Cadasa asuma más protagonismu y se convierta na entidá responsable de la xestión del suministru d’agua n’alta, lo que se va traducir na espansión de la so área d’influencia a los 78 conceyos d’Asturies”.

Amás, el plan busca reforzar la coordinación ente les alministraciones locales, autonómiques y nacionales, dixitalizar la xestión, y asegurar la equidad de los costos n’alta del agua, amás de la sostenibilidá de les tases municipales.

Al respective de la calidá, l’oxetivu fundamental recoyíu nel documentu consiste n’apurrir a tolos sistemes de suministru un procesu de tratamientu y potabilización afayadizu pa les característiques del so recursu.

P’acabar, les trés llinies d’actuación incluyíes nel programa de sostenibilidá van dirixíes a poner en marcha iniciatives d’investigación y innovación, amás d’a desenvolver una campaña potente empobinada a la concienciación y sensibilización de la población pa un usu más responsable y eficiente del agua. Aparte, van establecese calces de comunicación ente los xestores del agua y los usuarios.

El documentu inicial del plan director, xunto al estudiu ambiental estratéxicu, va tar n’información pública 45 díes hábiles.