Categories Navigation

Categories Navigation

Asuntos Europeos entama un ciclu pa informar a pymes y conceyos sobre'l plan de recuperación

29/04/2021

- Les xornaes, que van ser virtuales y van celebrase los díes 3, 4 y 6 de mayu, van cuntar cola presencia de dellos miembros del Executivu .

La Dirección Xeneral d'Asuntos Europeos, al traviés de la Oficina de Proyectos Europeos, entama, xunto cola Federación Asturiana d'Empresarios (Fade) y la Federación Asturiana de Conceyos (FACC), una serie de xornaes informatives virtuales nes que se van esplicar les principales llinies del Plan de Recuperación, Tresformamientu y Resiliencia, aprobáu esta selmana pol Gobiernu d'España.

Les xornaes destinaes a pymes van celebrase’l llunes próximu, día 3 de mayu, y el xueves 6, mentes que la reservada a los conceyos convocóse pal día 4.

Caúna d'estes xornaes, que la so moderación va correr al cargu de la directora de la Oficina de Proyectos Europeos, Raquel García, va cuntar cola participación de distintos miembros del Gobiernu d'Asturies. Asina, el llunes van intervenir los directores xenerales d'Industria y d'Innovación, Investigación y Tresformamientu Dixital, Rosana Prado y Iván Aitor Lucas del Amo, respectivamente, mentes que'l xueves va ser el turnu de la directora xeneral d'Enerxía, Minería y Reactivación, Belarmina Díaz; el director xeneral del Mediu Natural, David Villar, y va repitir Lucas del Amo.

Na xornada reservada a los conceyos van participar el viceconseyeru d'Infraestructures, Movilidá y Territoriu, Jorge García, y el director xeneral de Vivienda, Fermín Bravo, amás de Belarmina Díaz.