Categories Navigation

Categories Navigation

El Principáu impulsa la creación d’empreses innovadores lideraes por doctores universitarios

29/08/2021
  • La Conseyería de Ciencia va financiar, al traviés de Ficyt, cinco proyectos pa poner en marcha esti tipu de compañíes
  • Les propuestes incluyen dende la fabricación d’una bebida refrescante derivada del té hasta’l desenvolvimientu de distintos dispositivos d’análisis clínicu y medioambiental

El Principáu punxo en marcha un programa pa impulsar la creación d'empreses lideraes por titulaos universitarios que cunten con un doctoráu. La fabricación d'una bebida refrescante derivada del té, el desenvolvimientu de bioproductos con aplicaciones clíniques y el diseñu de distintos dispositivos d'análisis de contaminantes o de diagnósticu d'infecciones son dalgunes de les propuestes que participaron na primer convocatoria d'ayudes pa reforzar el texíu productivu innovador.
 
La Conseyería de Ciencia, Innovación y Universidá destina 90.000 euros a esti programa, xestionáu pola Fundación pal Fomentu n'Asturies de la Investigación Científica Aplicada y la Tecnoloxía (Ficyt). Esta primer edición recibió cinco proyectos lideraos por personal investigador col títulu de doctor nes árees de ciencies, bioquímica, ciencies medioambientales y economía.
 
A la espera de la resolución definitiva, ta previsto que tolos proyectos puedan cuntar con financiación. Amás de la subvención, les persones promotores van cuntar col sofitu y tutorización del Centru Européu d'Empreses ya Innovación (CEEI) pa la puesta en marcha de la empresa.
 
Les iniciatives inclúin propuestes empresariales bien desemeyaes:

  • Ellaboración y comercialización de kombucha, productu lleldáu deriváu del té, afechu a población con determinaes necesidaes: celiaca, diabética, vegana.
  • Diseñu d'un dispositivu portátil capaz de determinar la presencia d'un xenoma infecciosu en muestres humanes.
  • Xeneración de bioproductos derivaos de plaquetes con aplicaciones clíniques diverses.
  • Desenvolvimientu d'un serviciu de xestión de suministros y subcontrataciones de base tecnolóxica pa organizaciones empresariales.
  • Diseñu y fabricación de ferramientes analítiques tresportables p'analizar elementos contaminantes n'agües, que faciliten el control de calidá en tiempu real.

Esta primer convocatoria, presentada en xunetu, enmárcase nel programa In Itineras, concebíu p'ameyorar la formación y capacitación del personal investigador. Los proyectos proceden del ámbitu de la investigación, polo que suponen tamién un impulsu a la tresferencia de conocimientu.