Categories Navigation

Categories Navigation

El CEEI y la Finba impulsen la creación de compañíes innovadores pa llevar al mercáu los resultaos de proyectos d’investigación

01/10/2021

De izqda. a dcha.: el director de la Finba, Faustino Blanco; la directora del CEEI, Cristina Fanjul, y la investigadora Andrea Acebes.

  • El Centru Européu d’Empreses y la Fundación Biosanitaria soscriben un conveniu pa potenciar el texíu productivo nel ámbitu de la salú

El Centru Européu d’Empreses y Innovación (CEEI) y la Fundación pa la Investigación y la Innovación Biosanitaria del Principáu (Finba) soscribieron un conveniu de collaboración pa impulsar la creación d’empreses de base tecnolóxica que consigan treslladar al mercáu’l resultáu de la investigación nel ámbitu de la salú.

El documentu firmóse esta mañana pola directora del CEEI, Cristina Fanjul, y el director de Finba, Faustino Blanco. Ún de los proyectos pioneros que se beneficien d’esti conveniu ye’l lideráu pola investigadora Andrea Acebes, del Llaboratoriu d’Investigación en Plaquetes del Institutu d’Investigación Sanitaria del Principáu (ISPA), porque la so propuesta llogró financiamientu de la convocatoria de la Conseyería de Ciencia, Innovación y Universidá pa la creación d’empreses ente entamadores universitarios col títulu de doctor.

Dambes entidaes comprométense a xenerar, detectar y captar proyectos empresariales de base tecnolóxica, y asesorar na puesta en marcha de modelos nuevos de negociu dientro del ámbitu biosanitariu. 

Cristina Fanjul destacó que l’alcuerdu “representa la oportunidá de dar un mayor impulsu a la collaboración entre Finba, entidá puntera na xeneración d’escelencia científico-técnica, y el CEEI”, lo que va reforzar el rol del centru como oficina de tresferencia de conocimientu al mercáu nes árees de la bioeconomía y la salú.

Pela so parte, Faustino Blanco indicó que la Finba busca ferramientes de sofitu pa los sos investigadores, cola mira de facilitar que les aplicaciones innovadores productu del so trabayu lleguen hasta la creación d’empreses.

El CEEI cunta dende’l 2002 col programa BIOCEEI, una iniciativa de bioeconomía y salú centrada nel sofitu a proyectos empresariales nel ámbitu de la biotecnoloxía, les ciencies de la vida y la salú. Nesti tiempu asesoró en 190 proyectos empresariales y favoreció la puesta en marcha de 57 compañíes. 

Precisamente güei abrióse una convocatoria nueva d’esti programa, al que puen presentase entamadores, investigadores que quieran un proyectu empresarial a partir d’una idea de negociu orixinal y innovadora nel ámbitu de la bioeconomía y de la salú. 

Pa más información: https://www.ceei.es/bioceei/