Categories Navigation

Categories Navigation

Nun Tris gana’l premiu Nel Amaro de teatru cola obra La reina de la guapura de Leenane

26/10/2021

  • El xuráu destaca un “montaxe que brilla en tolos aspectos: reparto, dirección, puesta n’escena, testu y traducción”.

Nun Tris resultó ganadora de la quinta edición del premiu Nel Amaro de Teatru Profesional en llingua asturiana y eonaviegu, que concede la Conseyería de Cultura, Política Llingüística y Turismu. La compañía asturiana foi gallardonada pola obra La reina de la guapura de Leenane. El Nel Amaro ta dotáu con 6.000 euros.

El xuráu encargáu de valorar les obres finalistes, que se reunió ayeri baxo la presidencia d’Antón García, director xeneral de Política Llingüística, tuvo integráu por María Cotiello, actriz y filóloga, Pilar Fernández, escritora y filóloga, Mar Friera, filóloga y profesora, Chechu García, escritor y profesor, y Eva Vallines, actriz y crítica teatral. Actuó como secretaria Laura Marcos, filóloga adscrita de la Dirección Xeneral de Política Llingüística.

El xuráu decidió conceder el premiu a La reina de la guapura de Leenane por ser “un apueste pol teatru contemporaneu”. Nel acta del gallardón, los miembros del xuráu destaquen tamién que la obra “brilla en tolos aspectos: repartu, dirección, puesta n’escena, testu y traducción, y que nos enfrenta con una problemática irlandesa d’emigración, conflictu llingüísticu y d’identidá que s’afaya mui bien a la nuestra tierra”.

La reina de la guapura de Leenane, del autor irlandés Martin McDonagh y traducida por Antón Caamaño, impúnxose a los otros trés espectáculos finalistes del V Festival Nel Amaro y que se representaron a lo llargo d’esti mes d’ochobre nel Teatru Filármonica d’Uviéu: Grana de cardamomu, d'El Callejón del Gato, Les piripirates con parches y a lo xole, de Factoría Norte, y Setiembre, d'Arte Producciones.

Nun Tris, fundada en 1992 como compañía amateur y profesional dende 1997, ye una de les compañíes más versátiles y veteranes del panorama teatral en Asturias, con más de 54 espectáculos de tou tipu. Tamién ye una de les compañíes que más apuesta pol asturianu, yá que la metá d’estes propuestes, aproximao, tán nesta llingua. Primero d’esto foi finalista del Festival Nel Amaro n’otres dos ocasiones, con ¡Aire!, y cola adaptación de la ópera de Mozart Los amorinos de Bastián y Bastiana.