Categories Navigation

Categories Navigation

El Gobiernu d’Asturies saca a llicitación la meyora de la carretera AS-118, ente Veriña y Perecil, en Carreño, por 604.000 euros

18/10/2021

  • ​​​​​​​La primer fase de la obra, que tien un plazu d’execución de cuatro meses, céntrase nos últimos cuatro quilómetros del vial

El Gobiernu d’Asturies sacó a llicitación les obres de renovación del pavimentu de la carretera AS-118 (Lluanco-Veriña), de la que pasa pel conceyu de Carreño, con un presupuestu de 604.929 euros. L’actuación, que tien un plazu d’execución de cuatro meses, tien financiamientu del Fondu Européu Agrícola de Desenvolvimientu Rural (Feader).

 

La primer fase de la remodelación de la vía va centrase nos postreros cuatro quilómetros, dende’l puntu 7+250 hasta la conexón cola rotonda final en Veriña, porque esti tramu, de 3.810 metros de llargor, ye’l que presenta mayores defectos na capa de rodadura.

Les obres previstes incluyen llabores de llimpieza y roza de la carretera, l’aplicación d’una capa nueva de rodadura de cinco centímetros de gordor y la renovación de la señalización vertical y horizontal.

En concreto, van echase cuasi ocho tonelaes d’aglomeráu, que van cubrir una superficie d’alredor de 62.000 metros cuadraos. Tamién se va implantar una rede de drenaxe nel puntu quilométricu 10+550 pa recoyer l’agua que se filtria y enrialo hasta la cuneta.

El plazu pa que les empreses interesaes presenten les sos ufiertes acaba’l 2 de payares.