Categories Navigation

Categories Navigation

El Principáu saca a llicitación por más de 281.000 euros la meyora d’un tramu del corredor del Nalón

18/10/2021

  • La Conseyería de Mediu Rural y Cohesión Territorial tamién convoca un concursu p’axudicar la redacción del proyectu d’enanche de l’AS-35 ente Villayón y Carriu.

El Gobiernu d’Asturies sacó a llicitación por 281.835 euros la meyora del tramu del corredor del Nalón (AS-117) que xunta Riañu col puertu de Tarna, ún de los que rexistren más siniestralidá nesta vía.

L’actuación va centrase nun segmentu d’alredor de 800 metros de llargor, allugáu ente los quilómetros 3,6 y 4,4, nel conceyu de Llangréu, y va consistir nel fresáu, asfaltáu y renovación de la señalización de la vía.

Los trabayos cunten con un plazu d’execución de cuatro meses y les empreses interesaes puen presentar les sos ufiertes hasta’l día 4 de payares.

Otra manera, la Conseyería de Mediu Rural y Cohesión Territorial tamién sacó a llicitación por 55.076 euros la redacción del proyectu p’anovar los cuatro primeros quilómetros de l’AS-35 (Villayón-Bual), que comuniquen Villayón y Carriu. Trátase d’un plan pal enanche y meyora de la calzada, cola mira d’ampliar la so sección hasta los 6 metros d’anchu, aprovechando la caxa existente.

El presupuestu de la obra ye de calter plurianual y dispón d’una partida de 20.000 euros p’anguaño y otra de 25.076 pal añu que vien.

Nesti casu, el plazu d’execución del proyectu ta afitáu en siete meses y l’últimu día pa presentar ufiertes ye’l 2 de payares.