Categories Navigation

Categories Navigation

El Gobiernu d'Asturies autoriza la prórroga de 868 ERTE covid, qu'incluyen a 6.748 persones trabayadores

26/10/2021

  • L'autoridá llaboral aprueba 809 solicitúes correspondientes a espedientes de fuerza mayor y 59 a causes económiques, técniques, operatives o productives.
  • El 26,54 % del personal intégrase na hostelería y hotelería y el 25,6 % al sector metalúrxicu y la fabricación de productos metálicos.

La Dirección Xeneral d'Empléu y Formación, como autoridá llaboral nel Principáu, autorizó la prórroga de 868 espedientes de regulación d'empléu rellacionaos cola covid-19, qu'impliquen a 6.748 persones trabayadores.

D'ellos, 809 correspuenden a causes de fuerza mayor y 59, a motivaciones económiques, técniques, operatives o productives (ETOP). En dambos casos trátase de prórrogues solicitaes poles mesmes empreses d’alcuerdu col Real Decretu 18/2021 de midíes urxentes pa la protección del empléu, la recuperación económica y la meyora del mercáu de trabayu, que dexa la estensión de los ERTE vinculaos a la pandemia hasta febreru del 2022.

Por sectores, los servicios concentren les más de les prórrogues (747), siguíos pola industria (111) y la construcción (10). Sicasí, por persones implicaes produzse ciertu equilibriu ente servicios e industria, porque nesti últimu sector concéntrense los espedientes ETOP, menores en númberu que los de fuerza mayor pero qu'incluyen a más persones trabayadores.

Por actividaes, el 26,54 % de los trabayadores afectaos tán rellacionaos con empreses d'hostelería y hotelería y el 25,6 %, a compañíes del sector metalúrxicu y la fabricación de productos metálicos.

El númberu total de trabayadores incluyíos nos ERTE (6.748 persones) correspuende a los datos declaraos nes sos solicitúes poles empreses, que nun tienen la obligación de comunicar a l'autoridá llaboral autonómica, y sí al Ministeriu de Trabayu, la llista de persones afectaes. Sicasí, el Principáu incluyó nel modelu de solicitú un espaciu onde facilitar esta cifra pa tener una estimación de les persones incluyíes. Por ello, los trabayadores identificaos nes solicitúes aprobaes nun tienen por qué tar necesariamente en regulación d'empléu, sinón que namás les empreses tienen l'autorización pa ello en función de les sos necesidaes.

El director xeneral d'Empléu y Formación, Pedro Fernández-Raigoso, esplicó qu'estos datos representen “un descensu claru nel númberu d'espedientes que van estendese hasta'l 28 de febreru, tanto si se compara col de les autorizaciones vixentes como colos espedientes utilizaos efectivamente el mes pasáu”.

Según los datos de la Seguridá Social, el 30 de setiembre había n'Asturies 1.814 empreses con ERTE autorizaos y 3.908 persones trabayadores efectivamente regulaes d'empléu.


Declaraciones del Director General de Empleo y Formación, Pedro Fernández Raigoso (mp3: 601 Kb)