Categories Navigation

Categories Navigation

L'Axencia Asturiana de Cooperación al Desenvolvimientu convoca'l so primer concursu lliterariu sobre los derechos humanos

12/10/2021

  • El certame, que se dirixe al alumnáu d'Educación Secundaria Obligatoria y Bachilleratu, busca fomentar los valores de solidaridá, respetu y xusticia social.
  • Los premios incluyen un llote de llibros y equipos electrónicos valoraos ente 50 y 250 euros.

L'Axencia Asturiana de Cooperación al Desenvolvimientu convocó la primer edición del so concursu lliterariu sobre los derechos humanos, dirixíu al alumnáu d'Educación Secundaria Obligatoria (ESO) y Bachilleratu matriculao nel Principáu.

Esta iniciativa pretende fomentar los valores de solidaridá, respetu y xusticia social, amás d'incentivar la creatividá. Tamién pretende divulgar ente los estudiantes la conocencia sobre la vulneración de los derechos humanos nel mundu, con cuenta de que puedan actuar como axentes d'una sociedá asturiana cada vez más solidaria y inclusiva.

Les obres que se presenten han tar rellacionaes colos artículos recoyíos na Declaración Universal de los Derechos Humanos promulgada pola Asamblea Xeneral de les Naciones Xuníes en 1948. Han ser trabayos orixinales y inéditos y escritos en castellanu, asturianu o eonaviegu.

El certame establez trés categoríes en función del nivel d'estudios y de la estensión de les obres: l'alumnáu de primeru y segundu, y el de tercer y cuartu cursu de la ESO, respectivamente, van optar a unu de los dos premios de microrrellatos, mentes que la categoría de rellatos ye pa estudiantes de bachilleratu.

Cada centru educativu va tener la posibilidá de presentar un máximu de 3 obres por aula adscrita a caúnu de los ciclos educativos y nengún estudiante va poder presentar más d'un testu inéditu y orixinal.

Los premios incluyen un llote de llibros y equipos electrónicos valoraos ente 50 y 250 euros.


 Bases concurso literario derechos humanos (Pdf: 1,5 Mb)

 ​​​​​​​Cartel concurso literario derechos humanos (Jpg: 3,9 Mb)