Categories Navigation

Categories Navigation

El Gobiernu d'Asturies va usar el modelu de rehabilitación del barriu de San José de Lada n'otres viviendes y edificios públicos

18/09/2021
  • La conseyera Melania Álvarez recuerda qu'esta iniciativa convirtióse nun referente a nivel européu
  • L'actuación nesta zona de Llangréu, que supón trabayos de renovación en 258 cases y más de 6,7 millones d'inversión, va rematar anguaño

 

El Gobiernu d'Asturies va usar el modelu de rehabilitación integral que s’aplicó nel barriu de San José de Lada n'otres viviendes y edificios públicos. La conseyera de Derechos Sociales y Bienestar, Melania Álvarez, visitó güei xunto cola alcaldesa de Llangréu, Carmen Arbesú, les obres que se tán desenvolviendo na zona, qu'impliquen la renovación total de 258 cases y cunten con una inversión de más de 6,7 millones, cofinanciaos con fondos mineros y recursos propios del Principáu. Los trabayos, que van rematar anguaño, céntrense agora en dellos remates nel interior de les cases y en zones comunes.

“El modelu de rehabilitación integral nesti barriu convirtióse nun referente a nivel européu y pue llevase a otres edificaciones que precisen una meyora y que los sos proyectos puedan financiase al traviés de los fondos europeos NextGeneration”, esplicó Álvarez.

La obra de San José de Lada supón una rexeneración urbana integral qu'incluye meyores nos accesos a les viviendes, l'arreglu de teyaos, fachaes, carpintería esterior y actuaciones d'eficiencia enerxética p’aumentar la comodidá nos domicilios. Amás del aislamientu térmicu, instaláronse máquines de ventilación forzada nel esterior de los edificios y intercambiadores de calor, colo que s'evita la condensación del aire y favorezse l'aforru enerxéticu. D'esta miente, los pisos van poder ventilase ensin necesidá d'abrir les ventanes, automáticamente, y increméntase la eficiencia del sistema de calefacción.

“Trátase d'una actuación que tuvo en cuenta les necesidaes del vecinderu y les cuestiones que se nos plantegaron”, valoró la conseyera.

L'Observatoriu Européu de la Vivienda destacó esti proyectu nel so informe anual del 2019 como exemplu de rexeneración urbana que dexó qu'un barriu calificáu como “desfavorecíu”, dientro de los parámetros que remana esti organismu, se revitalice y tresforme nuna redolada afayadiza, segura y eficiente pa vivir.