Categories Navigation

Categories Navigation

La Comisión d'Urbanismu y Ordenación del Territoriu d'Asturies alcuerda redactar unes normes provisionales pa Llanes

23/09/2021
  • La midida va facer posible la ordenación urbanística del conceyu al curtiu plazu, hasta que cunte con un plan xeneral

 

El plenu de la Comisión d'Urbanismu y Ordenación del Territoriu del Principáu (CUOTA) alcordó güei redactar unes normes urbanístiques provisionales pa Llanes. La midida va dar seguridá xurídica y va facer posible la ordenación de les necesidaes urbanístiques del conceyu al curtiu plazu.

Llanes ye l'únicu conceyu d'Asturies qu'escarez de plan xeneral d'ordenación, yá que los sos socesivos planiamientos dende los años 80 anuláronlos los tribunales. Por esta razón, el Principáu ufiertó en xunu al conceyu trabayar a comuña pa sacar alantre unes normes provisionales, baxo’l principiu de collaboración entre dambes alministraciones.

Eses normes provisionales van tar vixentes hasta que'l conceyu cunte con un plan xeneral d'ordenación y van tener un algame más llimitáu qu'esti. Sicasí, constituyen un pasu importante pa que Llanes se dote d’instrumentos urbanísticos adaptaos a les sos necesidaes actuales. La tramitación alministrativa, que va incluyir la fase d'información pública, va empezar nos meses próximos, tres la ellaboración del documentu cola participación del conceyu.

Al empar, el plenu de la CUOTA alcordó anular l'aplicación de les Normes Urbanístiques Rexonales nel Medio Rural, que daten de los años 80, desque entren en vigor les provisionales. L'ausencia d'un plan d'ordenación en Llanes motivó que se tean aplicando les citaes normes.

En payares del 2020, la CUOTA informó al Conceyu de Llanes sobre la necesidá de retrotrayese na tramitación del plan xeneral d'ordenación (PXO). Nel so informe, l'órganu autonómicu señalaba que'l documentu taba tramitándose de manera incorrecta, al nun aprobase de forma simultánea y paralela al catálogu urbanísticu, tamién en redacción, lo que podría provocar una nueva anulación del PXO por defectu de forma. Esto implica que'l Gobiernu local ha realizar una nueva aprobación inicial de dambos documentos, esponelos a información pública y siguir cola so tramitación.