Categories Navigation

Categories Navigation

El Gobiernu d'Asturies amplía con cinco viviendes nueves el programa Housing First pa persones ensin techu

17/10/2021

​​​​​​​ 
 

  • La conseyera de Derechos Sociales visita'l centru d'atención d'Avilés, que facilitó pisos públicos a 31 persones mientres los cinco años últimos.
  • Melania Álvarez destaca que “el sistema funciona y garantiza una segunda oportunidá a quien tuvieron qu'enfrentase a un momentu duru nes sos vides”.

El Gobiernu d'Asturies va ampliar con cinco viviendes nueves primero de final d'añu'l programa Housing First. Esta iniciativa, que xestiona la Conseyería de Derechos Sociales y Bienestar, da la oportunidá de llograr un pisu públicu a persones ensin techu, con un siguimientu que garantiza la so inclusión na sociedá. Con esta ampliación, Asturies va cuntar yá con 41 viviendes destinaes a esti fin.

La conseyera de Derechos Sociales y Bienestar, Melania Álvarez, anunció güei esta ampliación mientres la so visita al centru d'atención a persones ensin techu d'Avilés, que dispón de 25 places y dende’l cual 31 persones accedieron como inquilinos a una vivienda del parque públicu asturianu nos cinco años últimos.

Álvarez destacó la “vital importancia” d'esti tipu d'iniciatives enfocaes a ufiertar soluciones a les persones que más lo precisen. “El sistema funciona y da respuesta, el trabayu coordináu dexa garantizar una segunda oportunidá a quien por distintes circunstancies tuvieron qu'enfrentase a un momentu duru y d'incertidume nes sos vides”, destacó sobre'l trabayu que se desenvuelve nel centru avilesín.

Con cuenta del Día internacional pa la Erradicación de la Probeza que se celebra güei, Queen Aduwa cuntó la so esperiencia como una de les persones usuaries d'esti tipu de viviendes y gracies al centru avilesín pudo recuperar la so vida, el so trabayu y les sos ilusiones. Queen Aduwa sigue residiendo xunto colos sos fíos, na mesma casa.

La conseyera tuvo acompañada na visita pol director xeneral de Vivienda, Fermín Bravo, y l'alcaldesa d'Avilés, Mariví Monteserín. Bravo informó que n'Avilés hai más de 500 pisos públicos n'arriendu y otros 150 n'arriendu a preciu llimitáu; en total, más de 650 domicilios con un arrendamientu asequible.

Nel siguiente enllaz puen vese testimonios de delles persones que llograron retomar los sos proyectos de vida gracies al sofitu de les alministraciones públiques https://cutt.ly/JRsylGx.


 Declaraciones consejera de Derechos Sociales y Bienestar (Mp3: 655 Kb)