Categories Navigation

Categories Navigation

El Principáu destina 36.749 euros a localizar, delimitar y investigar siete foses de la represión franquista

19/05/2021

  • Los trabayos van financiase con cargu al fondu estatal pa la recuperación de la memoria democrática, que destina 187.000 euros a Asturies.
  • Van analizase estos emplazamientos con rigor científicu pa la posible exhumación posterior de los restos.

El Gobiernu d’Asturies sacó a concursu’l primer contratu pa la indagación, investigación, localización y delimitación de víctimes de la Guerra Civil y de la dictadura franquista en siete foses allugaes na comunidá: Bimeda, Veiga Rengos y La Vuelta’l Cáscaru, en Cangas del Narcea; l’altu d’El Palombo, en Gozón; Gúa, en Somiedu; El Molín de Xilu-Llandriu, en Les Regueres, y El Fitu, en Parres.

L’importe del contratu xube a 36.749 euros y va financiase con cargu a los 187.000 euros que’l Principáu va recibir del fondu estatal pa la recuperación de la memoria democrática. L’oxetivu que se busca ye analizar les foses con rigor científicu y en fondura, pa una posterior exhumación de los restos que puedan topase.

Esta actuación enmárcase na fase d’investigación preliminar del Protocolu d’actuación n’exhumaciones de víctimes de la Guerra Civil y de la Dictadura, amás de nel Protocolu de Minnesota de 1991 de la ONU pa la prevención y investigación d’execuciones sumaries estraxudiciales, arbitraries y illegales.

El Principáu trabaya tamién, xunto al Gobiernu d’España, na recoyida d’ADN pa facilitar la identificación de los restos. Pa eso, adhirióse al bancu d’ADN nacional que, según les previsiones, va entrar en funcionamientu esti mesmu añu.

Otra de les llinies nes que se centra la Conseyería de Presidencia ye la puesta en marcha d’una aplicación informática onde se ta volvando la base de datos de víctimes, conectaes colos llugares onde hai constancia de la so presencia (campos de concentración, sitios de detención, campos nazis nel casu de les persones deportaes y foses, ente otros). Esti llabor riquió la creación d’una ficha de serviciu pa que cualquiera pueda cursar la solicitú pa introducir a persones nesa llista. Amás, cada rexistru va tar lligáu cola documentación de cada persona como informes, semeyes y vídeos.

La ferramienta va incluyir tamién tolos datos actualizaos del mapa de foses en tiempu real. Eso significa que cada meyora na investigación va tar a disposición de la ciudadanía de manera inmediata.

El trabayu, que va tar disponible nuna páxina web, afecta a 27.118 víctimes identificaes con tolos datos, 200 persones deportaes a campos de concentración nazis, polo menos 603 desapaecíes, 404 foses alcontraes y un mapa históricu con 243 símbolos, de los que la inmensa mayoría tán retiraos.

Toes estes actuaciones enmárquense nel desenvolvimientu de la Llei Asturiana de Memoria Democrática y van dexar zarrar firíes y dignificar la democracia. La mesma norma señala: “la recuperación de la memoria democrática ye una obligación ética, política y tamién llegal de los poderes públicos. Recuperar del olvidu a quien defendieron la democracia y los sos valores frente a la rebelión fascista ye un imperativu éticu y moral que’l Principáu d’Asturies nun pue desabrise”.




 Las siete primeras fosas a estudio (pdf: 866 Kb)