Categories Navigation

Categories Navigation

El plan especial de tresporte a Los Llagos algama cifres asemeyaes a les del 2019, con 240.514 usuarios hasta agora

21/10/2021
  • El domingu pasáu acabó l’operativu diariu de llanzaderes, que se va reactivar la fin de selmana que vien y nes pontes festives de Tolos Santos y la Constitución
  • Agostu foi’l mes con récord de viaxeros na historia del serviciu, con un total de 117.608
  • El serviciu ente Arenas y Sotres acaba la so primer temporada con 28.552 pasaxeros


Un total de 240.514 usuarios usaron anguaño’l plan especial de tresporte a los Llagos de Cuadonga. La cifra supón una medría de más del 64 % al respective de los 145.958 viaxeros que fixeron usu de les llanzaderes nel mesmu periodu del 2020, y avérase a los niveles del 2019, cuando se contabilizaron 249.001 pasaxeros hasta ochobre.

El domingu pasáu remató l’operativu diariu de llanzaderes al parque nacional, que llogró una afluencia curiosa de viaxeros nos meses de branu. Ello ye que xunetu, agostu y setiembre rexistraron cifres récord na serie histórica d’esti serviciu qu’impulsa’l Consorciu de Tresportes d’Asturies (CTA), dependiente de la Conseyería de Mediu Rural y Cohesión Territorial.

Asina, en xunetu usaron el serviciu 53.606 persones y el día 20 foi la xornada con más tránsitu del mes, con 3.171 usuarios. Pela so parte, agostu batió l’acumuláu mensual históricu dende la puesta en marcha d’esti serviciu nel 2005: 117.608 persones usaron el plan especial, con un máximu diariu de 6.040 viaxeros el día 5. Tamién setiembre zarró coles meyores cifres de la serie histórica, con una afluencia de 35.850 pasaxeros, y un picu máximu de 2.988 el día 4.

A falta de contabilizar los datos qu’ufierten los diez últimos díes nos que va volver operar el plan especial primero qu’acabe l’añu, les cifres globales aseméyense yá a les del 2019. Los díes nos que’l serviciu va volver tar operativu van ser la fin de selmana que vien (23 y 24 d’ochobre), la ponte festiva de Tolos Santos, ente’l 30 d’ochobre y el 1 de payares; y la de la Constitución, del 4 y al 8 d’avientu.

Cifres de los planes especiales de movilidá sostenible

A los bonos datos d’usuarios d’esti serviciu a Los Llagos súmense anguaño, la primer vez, les cifres del plan de tresporte de Cabrales, qu’empezó a operar el 14 de xunu ente Arenas y Sotres y remató’l 12 de setiembre.

Na so primer edición, el serviciu cuntó con 28.552 viaxeros. Agostu, con 16.878, foi’l mes con más afluencia, siguíu de xunetu, con 8.495; setiembre, con 2.061 y xunu, con 1.118.

El día con más afluencia de pasaxeros foi’l 19 d’agostu, cuando 1.062 usaron el tresporte públicu.