Categories Navigation

Categories Navigation

Asturies, declarada zona llibre de tuberculosis bovina pola Unión Europea

05/11/2021
  • La comunidá lleva cuatro años con una prevalencia de la enfermedá na cabaña ganadera inferior al 0,1 %.
  • Mediu Rural va caltener la campaña de saniamientu en tola cabaña ganadera los dos años vinientes pa prevenir posibles brotos.

Asturies foi declarada zona llibre de tuberculosis bovina pola Unión Europea. La midida supón un pasu importante pa la sanidá animal de la rexón, porque, ente otres ventayes, les ganaderíes nun van tener que realizar pruebes a los animales pa la so venta o pa dir a pastiar a otres comunidaes.

Según recueye’l Diariu Oficial de la UE “España presentó a la Comisión información que demuestra que la comunidá autónoma del Principáu d’Asturies cumple les condiciones establecíes nel Reglamentu Delegáu (UE) 2020/689 pa la reconocencia del estatus de llibre d’enfermedá al respective de la infección pol complexu Mycobacterium tuberculosis” y conclúi que “dicha comunidá autónoma tien que figurar como zona llibre d’infección”.

Asturies lleva dende’l 2017 con una prevalencia de la enfermedá na cabaña ganadera inferior al 0,1 %, cuando’l Gobiernu central establez como requisitu mínimu llevar trés años siguíos per debaxo d’esi baremu pa ser zona llibre de tuberculosis bovina. Por eso, la Conseyería de Mediu Rural y Cohesión Territorial empezó nel mes de xunu pasáu los trámites pa llograr esta declaración.

La directora xeneral de Ganadería y Sanidá Animal, Rocío Huerta, señaló que, a pesar d’estos bonos resultaos, ye imprescindible nun baxar la guardia, polo que nos dos años vinientes van caltenese les campañes de saniamientu en tola cabaña ganadera pa prevenir posibles brotos. Tamién va siguir la vixilancia pasiva nos mataderos y los controles na fauna montés.

Igual qu’Asturies, tola comunidá gallega tamién foi declarada zona llibre de tuberculosis bovina.

L’orixe de les campañes oficiales contra la tuberculosis bovina n’Asturies remóntase a la década de los años 80 del sieglu pasáu y son obligatories pa toles esplotaciones dende 1986. El programa d’erradicación ye una normativa d’ámbitu nacional, ellaborada pol Ministeriu d’Agricultura en collaboración con toles comunidaes y aprobáu pola Unión Europea.

La tuberculosis ye una enfermedá crónica qu’afecta a delles especies d’animales. La prueba oficial de diagnósticu in vivo ye la intradermotuberculinización (tuberculina), que diagnostica exemplares infectaos, amás d’enfermos. Nun existen pruebes contradictories nin contraanálisis pa esta prueba.