Categories Navigation

Categories Navigation

Patrimoniu históricu y cultural

Camín de Santiago: patrimoniu de la humanidá
Información sobre'l Camín de Santiago al so pasu per Asturies

Asturies caltién col Camín de Santiago una relación privilexada dende'l mesmu momentu del descubrimientu de la tumba del apóstol no que güei ye Compostela, hai cerca de 1200 años. En cierta midida, pue afirmase que la ruta xacobea ye una de les grandes aportaciones d'Asturies a la historia de la humanidá, al igual que lo son l'arte paleolíticu de les nuestres cueves y abrigos o l'arquitectura prerrománica vinculada a la dómina del Reinu d'Asturies.


La pelegrinación xacobea que, con mayor o menor intensidá se caltuvo nel tiempu a lo llargo de casi 1200 años, xeneró alredor de sí una historia de relaciones y intercambios ente los distintos pueblos de la Europa occidental, tanto nel ámbitu cultural na Edá Media, pero qu’anguaño volvió cobrar un impulsu, tres de la revitalización que'l Camín de Santiago esperimentó nes dos últimes décades.


Esos intercambios son los que-y dan un calter tan especial al Camín de Santiago, que va muncho más allá de lo puramente relixoso. Fenómenos como la estensión del arte románicu pel occidente européu, la creación d'una rede de villes y pequeñes ciudaes nel norte d'España con población franca o l'impulsu al comerciu urbanu nes centuries centrales de la Edá Media tán estrechamente lligaos la estensión de les pelegrinaciones xacobees.


Anguaño'l Camín de Santiago suma al so papel relixosu, de vía de pelegrinación, el factor cultural y turísticu, convirtiéndose nuna de les exes culturales más actives del continente européu, daqué atestiguao pol númberu de persones que lu transiten y pol movimientu asociativu surdíu alredor del mesmu, reflexáu nes decenes d'asociaciones d'amigos del Camín que fueron surdiendo nes últimes décades y que tienen por oxetu la promoción y revitalización de tolo rellacionao coles rutes xacobees, no que constitúi un casu escepcional d'implicación social na preservación y resalte d'un bien cultural.


Asturies cunta anguaño con 560 kilómetros de ruta xacobea oficialmente reconocida como bien d'interés cultural (BIC) per aciu un Decretu de fecha 22 de xunu del 2006, publicáu nel Boletín Oficial del Principáu d'Asturies del 29 de xunu del 2006.


Distribúyense al traviés de los siguientes itinerarios:

  • Camín primitivu ente Uviéu y Santiago pel interior del occidente asturianu.
  • Camín costeru ente Bustiu (en Ribadedeva) y A Veiga.
  • Camín del Salvador, que procedente de Llión entra n'Asturies per Payares y allega a Uviéu.
  • Enllaz ente'l camín costeru y el primitivu al traviés de Villaviciosa, Sariegu, Siero y Uviéu.


El 5 de xunetu del 2015 fueron inscritos na Llista del patrimoniu mundial de la UNESCO'l camín primitivu y el camín costeru, asina como l'enllaz ente dambos Camíns, nel contestu de la reconocencia a los Camíns de Santiago del norte de españa. Igualmente, reconocióse cola máxima distinción patrimonial del mundu a cuatro bienes culturales vinculaos a les rutes xacobees asturianes: la catedral d'Uviéu, el monesteriu de San Salvador de Corniana (Salas), dambos nel camín primitivu, y a la ilesia prerrománica de San Salvador de Priesca (Villaviciosa) y la ilesia y casa rectoral de Santa María de Soutu Lluiña (Cuideiru), dambos nel camín costeru.


Esisten n'Asturies más d'una trentena d'albergues de pelegrinos que dan soporte a la pelegrinación de los cientos de persones que cada añu traviesen la nuestra comunidá camín de la tumba del apóstol Santiago. Munchos d'esos albergues alcuéntrense nos mesmos llugares que na Edá Media conocieron la presencia d'hospitales o alberguerías de pelegrinos, siendo destacable el casu de Borres, nel conceyu de Tinéu, el primer llugar nel que se documenta la esistencia d'un albergue xacobéu, a finales del sieglu IX, y qu’anguaño cunta con un centru d'idéntica finalidá.


Portal web de consulta

Tola información sobre diferentes rutes (descrites tramu a tramu con abondosa información cartográfica y fotográfica), asina como sobre la rede d'albergues de pelegrinos.


Turismu Asturies

El Camín de Santiago na web Turismoasturias


Visor cartográficu

Nesti visor pue conocese al detalle la situación actual de tolos tramos asturianos del Camín, con indicación del so estáu de caltenimientu.


Camín de Santiago del Norte

Páxina web oficial de la candidatura a patrimoniu mundial del Camín de Santiago del Norte d'España qu'impulsaron les comunidaes d'Asturies, Galicia, La Rioxa, País Vascu y Cantabria y que llogró, en xunetu del 2015, la inscripción d'estes rutes na Llista del patrimoniu mundial.


Trazáu del Camín de Santiago, a la so paso per Asturies, en formatu KMZ (Google Earth)

De siguío, ufiértase l'archivu pa la descarga del trazáu del Camín de Santiago al so paso pel Principáu d'Asturies, en formatu KMZ de Google Earth. D'esta miente, el pelegrín va poder conocer de mano el trazáu del Camín, los puntos d'interés, variantes nel so percorríu y les distancies o paraxes polos que pasa. El formatu KMZ ye compatible con munches aplicaciones que dexen la so visualización en dispositivos móviles.


Mapes oficiales del itinerariu del Camín de Santiago al so pasu per Asturies

Cartografía oficial del Camín de Santiago n'Asturies per rutes y per conceyos, tramos reconocíos como BIC per aciu Decretu 63/2006 de 22 de xunu, pol que s'afita y delimita el conxuntu históricu del Camín de Santiago nel Principáu d'Asturies, y determínase la so redolada de protección provisional (Ruta del Interior y Ruta de la Costa).

Asset Publisher

Contenidos con Jerarquía Webasturias Patrimoniu históricu y cultural .

Contacta columna derecha

Contacta

Serviciu d'atención ciudadana

Iconu - Llámanos

Llámanos al 012 (985 279 100 dende fuera d'Asturies)

Iconu - Buzón del ciudadanu

Escríbinos al buzón ciudadanu

Iconu - Ven a venos

Ven a venos a les nuestres oficines

Iconu - Solicita cita previa

Solicita cita previa