La cultura sidrera asturiana declaróse Bien d'Interés Cultural de calter inmaterial nel 2014, pente medies de Decretu del Conseyu de Gobiernu. Destácase nesta declaración que la cultura sidrera asturiana ye una manifestación qu'acueye práctiques sociales, rituales y eventos festivos, amás de tradiciones orales, paisaxes culturales y oficios tradicionales, configurándose como ún de los elementos identitarios de mayor caláu de la comunidá.

Depués d'esi primer pasu de protección llegal n'Asturies, alcordóse pol Gobiernu asturianu empezar los trámites pa llograr la so inclusión na Llista del Patrimoniu Cultural Inmaterial.

Con esa mira constituyóse un Comité Director de la candidatura, onde s'integren representantes del sector productor sidreru (Denominación d'Orixe Protexida), de la hostelería y especialistes del ámbitu de l'antropoloxía, la historia y la comunicación, amás de técnicos de l'Alministración especializaos en tramitar propuestes d'esti tipu y tamién los responsables de les direcciones xenerales de Patrimoniu Cultural y Desenvolvimientu Rural.

Alcuerdu pol que se crea'l Comité Director (pdf: 31 Kb) (n'español)

La cultura de la sidra ye plural. Incluye tol procesu d'ellaboración de la sidra, dende'l plantíu de los pumares al corcháu y la posterior comercialización. Too ello configura una cultura inmaterial xenuina, onde tienen acoyida tamién manifestaciones artístiques (cantares típicos de sidrería, reflexu de la cultura sidrera na pintura y na lliteratura d'Asturies…) y colos sos propios rituales y normes internes escrites y non escrites. Ye, amás, ún de los principales iconos d'Asturies, cola figura del echador como símbolu induldable d'esta cultura.

Ha apostase por una visión integradora de la cultura sidrera, tanto no que tien que ver cola cuestión de xéneru (aparcando una visión tradicional escomanadamente masculina del mundu rellacionáu cola sidra y sacando a la lluz el papel desempeñáu pola muyer de manera tradicional en munches de les fases de la cadena productiva d'esta manifestación cultural) como la vinculada a la integración de persones de tou orixe y situación social.