El Patrimoniu industrial constituye una de les señes d'identidá de la nuestra Comunidá Autónoma. Asturies, pola so trayectoria histórica, tien un papel destacadísimu dientro del ámbitu del patrimoniu industrial español al ser, nel sieglu XIX y primer metá del XX, ún de los grandes focos de la industrialización española, al pie de Cataluña y el País Vascu.

La intensa industrialización que conoció Asturies tien el so reflexu evidente nel paisaxe d’anguaño, dando llugar a ún de los patrimonios industriales más interesantes y diversos d'España, reflexu al empar d’unes formes de trabayu y de vida yá en bona parte superaes, no que constitúi la vertiente inmaterial del procesu industrializador, non siempre tenida en cuenta a la hora d’abordar la problemática d'esta variante patrimonial pero que tien una presencia mui especial na memoria colectiva de delles xeneraciones d'asturianos.

La importancia d’esta variante patrimonial tuvo el so reflexu na nuestra llexislación autonómica, siendo la Llei de Patrimoniu Cultural d’Asturies del añu 2001, una de les primeres qu'a nivel nacional incluyó un apartáu específicu dedicáu a la protección del patrimoniu históricu industrial, contemplando mesmo los sos apartaos materiales como inmateriales. Nos artículos 76, 77 y 78 de la referida Llei, recuéyense tolos bienes y manifestaciones qu'integren el Patrimoniu Industrial asturianu, materiales (muebles ya inmuebles), inmateriales y documentales oxetu de protección y caltenimientu.

Nel artículu 76 de la mentada Llei concreta qué s’entiénde llegalmente por patrimoniu industrial n'Asturies, al señalar que lo integren “los bienes muebles ya inmuebles que constitúin testimonios significativos de la evolución de les actividaes técniques y productives con una finalidá d'esplotación industrial y de la so influencia sobre'l territoriu y la sociedá asturiana. N'especial, de les derivaes de la estracción y esplotación de los recursos naturales, de la metalurxa y siderurxa, de la tresformación de productos agrícoles, la producción d'enerxía, el llaboréu de tabacu, y la industria química, d'armamentu, naviera, conservera o de la construcción”.

Esti artículu 76 indica que les muestres más destacaes del patrimoniu industrial asturianu van incluyise en dalguna de les categoríes de protección definíes na Llei: declaración como Bien d'Interés Cultural, inclusión nel Inventariu del Patrimoniu Cultural d'Asturies o nos catálogos urbanísticos de protección. Igualmente, va dar na recoyida sistemática y organización de los fondos documentales y maquinaria industrial d'interés; a l'aplicación de normes específiques de protección; y al sofitu al llabor d'asociaciones, instituciones y persones que realicen llabores d'investigación nesti ámbitu del patrimoniu industrial.

L'artículu 77 prohibe la destrucción de maquinaria industrial de fabricación anterior a 1940, salvo autorización espresa de la Conseyería competente en materia de patrimoniu cultural, ente que l'artículu 78 encamienta la escueya y estudiu de los aspectos sociales de la industrialización, n’especial los rellacionaos cola vida cotidiana y la historia del movimientu obreru.

A nivel nacional, en 2001 aprobóse’l Plan Nacional de Patrimoniu Industrial, revisáu y actualizáu en 2011. Trátase d'un preséu de xestión coordináu ente l'Estáu y les comunidaes autónomes, que s'articula en trés grandes exes: fixación d'una metodoloxía d'actuación unificada sobre'l patrimoniu industrial; programación d'inversiones acordies coles necesidaes de caltenimientu detectaes; y coordinación de la participación de les distintes instituciones qu'intervienen na xestión d'esta variante patrimonial.

Protección del Patrimonio Industrial asturianu

La protección xurídica de los bienes de calter industrial asturianos llévase a cabu cola so inclusión en dalgún de los trés niveles de protección reconocíos na Llei de Patrimoniu Cultural:

- Bienes d'Interés Cultural. Trátase de los bienes más relevantes que, pol so valor singular, declárense d'Interés Cultural per aciu’l Decretu del Conseyu de Gobiernu.

- Bienes integrantes del Inventariu del Patrimoniu Cultural d'Asturies. Intégrenlu los elementos que tienen en grau notable valores patrimoniales y culturales y qu’han ser especialmente calteníos y conocíos.

- Bienes incluyíos nos Catálogos Urbanísticos de Protección. Inclúyense nesti preséu municipal d'ordenación urbanística los elementos que tienen interés patrimonial pero non la relevancia abonda pa ser declaraos Bien d'Interés Cultural o incluyíos nel Inventariu. Otórgase-yos un nivel de protección (integral, parcial o ambiental) en función del que s’autoricen delles actuaciones sobre los bienes. Nel casu de la protección integral, les actuaciones que precisen de llicencia han contar con informe previu venceyante de la Conseyería competente en materia de patrimoniu cultural.

Bienes d'Interés Cultural de calter industrial declaraos n'Asturies

• Castillete de la Mina d’Arnáu, en Castrillón
• Pozu San Luis, en Llangréu
• Pozu Santa Bárbara, en Mieres
• Pozu Sotón, en Samartín del Rei Aurelio
• Conxuntu históricu industrial de Bustiello, en Mieres

Elementos industriales incluyíos nel Inventariu del Patrimonio Cultural d’Asturies

• Pozu San Antonio, n’ Ayer
• Pozu San Fernando, n’ Ayer
• Pozu San Jorge, en Ayer
• Conxuntu históricu industrial d’Arnáu, en Castrillón
• Llavaderu Modesta, en Llangréu
• Pozu Candín 1, en Llangréu
• Pozu Candín 2, en Llangréu
• Pozu María Luisa, en Llangréu
• Pozu Mosquitera 2, en Llangréu
• Pozu Samuño, en Llangréu, en Llaviana y Samartín del Rei Aurelio
• Estación de ferrocarril de Villabona, en Llanera
• Pozu Figareo, en Mieres
• Pozu Llamas, en Mieres
• Pozu Polio, en Mieres
• Pozo San José, en Mieres
• Pozu San Nicolás, en Mieres
• Pozu Tres Amigos, en Mieres
• Pozu San Frechoso, n’ Uviéu
• Pozu Monsacro, en Riosa
• Pozu Cerezal, en Samartín del Rei Aurelio
• Pozu Solvay, en Siero
• Pozu Mosquitero 1, en Siero
• Pozu Pumarabule, en Siero
• Antigua fábrica de conservas Lis, en Sotu’l Barcu

Igualmente, incluyéronse nel Inventariu 31 fornos de cal de tipoloxía tradicional existentes en distintos conceyos asturianos https://sede.asturias.es/bopa/2015/07/01/2015-10838.pdf

Situación del patrimoniu industrial nos Catálogos Urbanísticos

El Gobiernu d'Asturies, al traviés de la Viceconseyería de Cultura y Deporte, ellaboró un estudiu detalláu sobre'l patrimoniu industrial del Principáu como primer pasu p'actualizar y ampliar l'inventariu, que data de los años 80 del pasáu sieglu, y promover actuaciones de meyora de la protección, caltenimientu y divulgación d'estos bienes, munchos d'ellos fundamentales na historia recién de la comunidá.

El documentu reflexa la situación d'esti patrimoniu en tolos conceyos según los distintos inventarios y ufierta per primer vez una base de datos unificada, na que se contabilizaron 1.700 elementos o conxuntos inventariaos, de los qu'un millar cuenta con protección. Esti trabayu supón la culminación d'una primer fase d'analís que va siguir a lo llargo de los próximos meses col imprescindible trabayu técnicu de campu.

El trabayu, realizáu pola arquiteuta Clara Rei-Stolle, anguaño técnica del Serviciu de Patrimoniu Cultural, permite conocer la situación del patrimoniu históricu-industrial nos catálogos urbanísticos y, a partir d'ehí, l'analís de la so situación nes trés categoríes de protección reconocíes na Llei de Patrimoniu: Bienes d'Interés Cultural (BIC), elementos incluyíos nel Inventariu de Patrimoniu Cultural d'Asturies (IPCA) y bienes incluyíos nos catálogos urbanísticos municipales.

Nel estudiu comparáronse los datos pescanciaos de los catálogos urbanísticos colos inventarios temáticos ellaboraos nes últimes décades, la mayor parte promovíos pola Conseyería d'Educación y Cultura. Los resultaos de la escueya d'esta documentación y del so analís ye una base de datos única que contién tola información sobre'l númberu esactu d'elementos del patrimoniu industrial protexíos anguaño y la so categoría de protección.

El trabayu contabilizó más de 1.700 elementos o conxuntos inventariaos, de los qu'un millar cuenta con protección. Por citar dellos datos de relevancia, Mieres axunta'l mayor númberu d'elementos inventariaos, con 271, de los que tán protexíos 96 namás. Llangréu, otramiente, cuenta con 197 inventariaos y 131 protexíos; Samartín del Rei Aurelio tien 132 inventariaos y 13 protexíos; Xixón tien 120 inventariaos y 82 protexíos, y Uviéu cuenta con 113 inventariaos y 59 protexíos. Quince municipios nun tienen nengún elementu inventariáu nin protexíu.

Al respective de les tipoloxíes, casi la cuarta parte de los elementos protexíos son equipamientos y viviendes, y los sectores con mayor númberu d'inmuebles con protección son les esplotaciones mineres, les edificaciones de sistemes ferroviarios y les de sistemes portuarios.

Les conclusiones del estudiu permiten encarar con garantíes l'actualización del rexistru de patrimoniu industrial con que se cuenta dende mediaos de la década de los 80 del sieglu pasáu, ampliándolu a ámbitos como la industria agroalimentaria o les mineríes ayenes al carbón.

A partir d'esti nuevu rexistru, va abordase una fase previa de selección y valoración patrimonial de los elementos existentes, de manera que se rexistren aquellos que seyan susceptibles de protección.

L'estudiu y la base de datos pueden consultase nos siguientes archivos:

• Base de datos de Patrimoniu Industrial (pdf: 813 Kb) (n'español)
• El Patrimoniu industrial de Asturies-1ª fase (pdf: 4 Mb) (n'español)