La Llei de Patrimoniu Cultural d’Asturies, aprobada nel añu 2001, aboga, yá nel so preámbulu, pol estudiu y protección de les manifestaciones llingüístiques, los vezos, les espresiones artístiques de tradición oral y otres formes d’espresión comunitaries.

Nel apartáu de la Llei dedicáu al réxime del patrimoniu etnográficu, señálense como susceptibles de protección dellos elementos inmateriales de la tradición cultural asturiana. Ye’l casu de sitios vinculaos a tradiciones populares, ritos y lleendes; los xuegos, los deportes, la música, les fiestes y los bailles tradicionales; amás de los refranes, rellatos, cantares y poemes lligaos a la tresmisión oral.

L’artículu 72 de la Llei refierse n’esclusiva a estes espresiones culturales non materiales, indicando lliteralmente que “les conocencies, actividaes, usos, costumes y manifestaciones llingüístiques y artístiques, d’interés etnolóxicu, que tresciendan los aspectos materiales en que puedan manifestase, han ser recoyíos, documentaos, protexíos correctamente y puestos al serviciu de los investigadores y los ciudadanos polos poderes públicos y les instituciones educatives. Con esi fin, va sofitase’l llabor de les asociaciones, instituciones y persones que trabayen nel so caltenimientu y revitalización”.

Tamién n’apartáu dedicáu a la protección del patrimoniu histórico-industrial, hai un artículu, el 78, dedicáu a los testimonios de la historia social. Nel mesmu indícase que “van ser oxetu especial d’escoyeta y estudiu los aspectos sociales de la industrialización y perespecialmente los rellacionaos colos cambeos na vida cotidiana y cola historia del movimientu obreru, incluyendo los testimonios orales correspondientes”.

De magar entró en vigor la Llei de Patrimoniu Cultural d’Asturies, foi arriqueciéndose progresivamente’l marcu llegal de protección del patrimoniu inmaterial. España ratificó nel 2006 la Convención pa la Salvaguarda del patrimoniu cultural inmaterial de la UNESCO (aprobada en París el 17 d’ochobre del 2003). Y a resultes d’eso aprobóse nel 2015 la Llei 10/2015, de 26 de mayu, pa la salvaguarda del Patrimoniu Cultural Inmaterial.

P’acabar, el Decretu del Principáu d’Asturies 20/2015, de 25 de marzu, aprobó’l Reglamentu de Desenvolvimientu de la Llei de Patrimoniu Cultural d’Asturies. Nesi Reglamentu dedíquense dellos artículos a la protección del patrimoniu cultural inmaterial, clarificándose los mecanismos pa la so protección. Créase, igualmente, el Censu del Patrimoniu Cultural Inmaterial d’Asturies, “cola mira de reflexar y identificar les manifestaciones culturales inmateriales d’Asturies, colos sos datos básicos”.

Na actualidá, los instrumentos pa la protección d’esti patrimoniu n’Asturies son estos:

Declaración como Bien d’Interés Cultural, nel casu de les manifestaciones más significatives y relevantes dende’l puntu de vista identitariu y cultural. Documentación de la manifestación nel Censu del Patrimoniu Cultural Inmaterial d’Asturies.

En payares del 2018 la UNESCO incluyó pela primer vez un elementu del patrimoniu inmaterial asturianu na Llista Representativa del Patrimoniu Cultural Inmaterial de la Humanidá. Trátase de los conocimientos y técniques del arte de construyir muries de piedra en seco. Esti reconocimientu promoviéronlu dellos países europeos: Croacia, Chipre, Francia, Grecia, Italia, Suíza, Eslovenia y España, y delles comunidaes autónomes españoles (Galicia, Estremadura, Andalucía, Aragón, Cataluña, Comunidá Valenciana, Baleares y Asturies). Tola documentación sobre esta técnica pue consultase na páxina oficial de la UNESCO. La técnica constructiva de la piedra en seco n'Asturies incluyóse nel Censu del patrimoniu cultural inmaterial d'Asturies, pudiendo alcontrase nel apartáu dedicáu a ello nesta páxina la descripción d'esti elementu patrimonial

Bienes d’interés cultural de calter inmaterial declaraos n’Asturies:

• Misa asturiana de gaita
• Cultura de la sidra
• La Asturianada

Bienes d'interés cultural de calter inmaterial en tramitación na actualidá

• Los sidros y les comedies de Valdesoto, en Siero
• Memoria descriptiva de los Sidros y Comedies (Pdf: 13,7 Mb)
• El Corri-corri d'Arenas (Cabrales)
• Memoria descriptiva del Corri-corri (Pdf: 10,8 Mb)

En tramitación:

• Xuegu de los bolos
• Traxie d'aldeana y porruanu llaniscos

Censu del patrimoniu cultural inmaterial d’Asturies

Técnica constructiva de la piedra seco n'Asturies (Pdf: 995 Kb) (n'español)