El procesu de revisión de la toponimia oficial d’Asturies empezó nel añu 2004 pa cumplir el mandáu de la Llei 1/1998, de 23 de marzu, d’usu y promoción del bable/asturianu, qu’establez que “los topónimos de la Comunidá Autónoma del Principáu d’Asturies han tener la denominación oficial na so forma tradicional”.

Ye un procesu llargu y exhaustivu, realizáu conceyu a conceyu y a pidimientu de los conceyos, onde intervienen: la Xunta Asesora de Toponimia, los partíos con representación municipal, colectivos vecinales y investigadores y espertos en toponimia. El resultáu ye un decretu aprobáu pol Conseyu de Gobiernu del Principáu d’Asturies, pol que se determinen los topónimos d’un conceyu determináu; caún d’estos decretos publíquense nel BOPA.

Nomenclátor de topónimos oficiales

Pa simplificar y entainar la consulta sobre los nomes oficiales delles entidaes de población ellabora el Nomenclátor Xeográficu de la Toponimia Oficial del Principáu d’Asturies.

Supón delles ventayes al respective de les consultes que se puen facer nos decretos d’oficialización:

• Recueye nun únicu documentu tola toponimia oficial, aforrando tener que facer la consulta conceyu a conceyu.
• Dexa buscar tanto pol nome oficial en vigor como pol anterior (según el códigu SADEI).
• Clasifica toos y caún de los topónimos, siguiendo una tipoloxía predefinida (parroquia, ciudá, barriu, casería...).
• Xerarquiza los topónimos, de manera qu’a golpe de vista ye posible ver qué pueblos conformen determinada parroquia, en qué barrios se divide determinada población, etc.
• Dota a caún de los topónimos d’una posición xeográfica, pudiendo saber fácilmente la so ubicación.

Ortofotomapa

Como una ferramienta más de difusión de la toponimia tradicional (en dellos casos yá oficializada y n’otros como propuesta) ellaboróse, nel añu 2010, l’Ortofotomapa de capitales y poblaciones importantes.

Ye un conxuntu de 122 fueyes, colos encuadres axustaos a toles capitales de conceyu del Principáu d’Asturies y a determinaes poblaciones que se consideraron relevantes p’apaecer nesta serie. Nelles apaez la ortofotografía de capa base, sobre la que s’añidió información vectorial, ente ella la información toponímica de la rodiada, non solo la referida a poblaciones, sinón tamién la referida a ríos, paraxes, picos, etc.