Accesu al emplegu público
Tolos ciudadanos tienen derechu al accesu al emplegu público acordies colos principios constitucionales d’igualdá, méritu y capacidá, y a xeitu colo previsto nel presente Estatutu y nel restu del ordenamientu xurídicu. L’accesu ha facese per aciu de procedimientos nos que se garanticen los principios constitucionales enantes espresaos, asina como los establecíos darréu:
- Publicidá de les convocatories y de les sos bases. Tresparencia.
- Imparcialidá y profesionalidá de los miembros de los muérganos de seleición.
- Independencia y discrecionalidá téunica na actuación de los muérganos de seleición.
- Adecuación ente’l conteníu de los procesos selectivos y les funciones o xeres a desendolcar.
- Axilidá, ensin perxuiciu de la oxetividá, nos procesos de seleición
Sistemes selectivos
Los procesos selectivos tienen calter abiertu y garanticen la llibre concurrencia, ensin perxuiciu de lo establecío pa la promoción interna y de les midíes de discriminación positiva previstes nesti Estatutu.
Los muérganos de seleición velen pol cumplimientu del principiu d’igualdá d’oportunidaes ente sexos.
Los procedimientos de seleición cuiden especialmente la conexón ente la frasca de pruebes a superar y l’adecuación al desempeñu de les xeres de los puestos de trabayu convocaos, incluyendo, nel so casu, les pruebes práutiques que seyan precises.
Les pruebes pueden consistir na comprobación de los conocimientos y la capacidá analítica de los aspirantes, espresaos de forma oral o escrita, na realización d’exercicios que demuestren la posesión d’habilidaes y estolaxe, na comprobación del dominiu de llingües estranxeres y, nel so casu, na superación de pruebes físiques.
Los procesos selectivos qu’incluyan, amás de les preceutives pruebes de capacidá, la valoración de méritos de los aspirantes solo pueden conceder a tala valoración una puntuación proporcionada que nun determina, en nengún casu, por sí mesma’l resultáu del procesu selectivu.
Les Alministraciones Públiques pueden crear muérganos especializaos y permanentes pa la organización de procesos selectivos, pudiéndose encomendar estes funciones a los Institutos o Escueles d’Alministración Pública.
P’asegurar la oxetividá y la racionalidá de los procesos selectivos, les pruebes pueden completase cola superación de cursos, de periodos de práutiques, cola esposición curricular polos candidatos, con pruebes sicotéuniques o cola realización d’entrevistes. Poles mesmes pueden esixise reconocimientos médicos.
Los sistemes selectivos de funcionarios de carrera son los d’oposición y concursu-oposición qu’han incluyir, en tou casu, una o delles pruebes pa determinar la capacidá de los aspirantes y establecer l’orde de prelación. Namas en virtú de llei pue aplicase, con calter esceicional, el sistema de concursu que consiste únicamente na valoración de méritos.
Los sistemes selectivos de personal llaboral fixo son los d’oposición, concursu-oposición, coles carauterístiques establecíes nel apartáu anterior, o concursu de valoración de méritos.
Les Alministraciones Públiques pueden negociar les formes de collaboración que nel marcu de los convenios coleutivos fixen l’actuación de les Organizaciones Sindicales nel desarrollu de los procesos selectivos.
Los muérganos de seleición nun pueden proponer l’accesu a la condición de funcionariu d’un númberu superior d’aprobaos al de places convocaes, nun siendo cuando asina lo prevea la propia convocatoria.
Sicasí, siempre que los muérganos de seleición propongan el nomamientu d’igual númberu d’aspirantes que’l de places convocaes, y cola fin d’asegurar la cobertura de les mesmes, cuando se produzan arrenuncies de los aspirantes seleicionaos, enantes del so nomamientu o toma de posesión, el muérganu convocante pue riquir del muérganu de seleición llistáu complementariu de los aspirantes que sigan a los propuestos, pal so posible nomamientu como funcionarios de carrera.
Llei 3/1985, de 26 d’avientu, d'Ordenación de la Función Pública de l'Alministración del Principado d'Asturies.
