Navegación por categorías

Navegación por categorías

El Principáu y la Fundación “la Caixa” convoquen los primeros talleres virtuales contra l'aislamientu social de les persones mayores

31/01/2021
  • La inscripción va tar abierta hasta'l 12 de febreru al traviés del teléfonu 900 293 178
  • Los alcuentros van centráse nes árees de la salú, el desenvolvimientu personal, les competencies dixitales y la promoción de la llectura 

La Conseyería de Derechos Sociales y Bienestar y la Fundación “la Caixa” convoquen los primeros talleres virtuales empobinaos a combatir l'aislamientu y la soledá de les persones mayores de 60 años, nos que se va fomentar el bienestar y l'autonomía personal. 

El Gobiernu d'Asturies y la fundación bancaria trabayen nesti programa dende 1998, anque nesta ocasión optóse pola modalidá telemática como mediu d'adaptación a les midíes sanitaries y de seguridá derivaes de la pandemia del coronavirus y pa garantizar, al empar, la participación de la ciudadanía. 

Pa empezar los talleres online van crease distintos grupos en redol a cuatro temátiques principales: salú, desenvolvimientu personal, competencies dixitales y promoción de la llectura. 

Toles persones interesaes en participar pueden inscribise hasta'l 12 de febreru nel teléfonu 900 293 178. Ye mester que dispongan  d'un dispositivu con conexón a internet y cámara, lo mesmo que d’una dirección de corréu electrónicu p'aportar a la formación. 

“Tenemos la capacidá d'adaptanos a una situación estraordinaria na que nun vamos dexar a naide atrás. Por eso, esti añu'l programa va llevase a cabu de forma virtual, porque lo importante ye que les persones mayores puedan participar n'actividaes que-yos resulten interesantes y que nos ayuden a lluchar contra la soledá ensin deseyar y l'aislamientu que, en munchos casos, causó la pandemia”, aseguró la conseyera Melania Álvarez. 

Esti programa de la Fundación “la Caixa” facilitó'l siguimientu y analís a nivel nacional de los efectos de la pandemia y el confinamientu na tercer edá. L'estudiu conclúi que les persones con visión más proactiva y positiva son les que meyor superaron l'aislamientu, polo que la entidá destaca la importancia de combatir la soledá ensin deseyar y fomentar les relaciones d’apoyu y el cuidáu nesti colectivu. Esta estratexa allíniase col modelu col que trabaya tamién la Conseyería de Derechos Sociales y Bienestar.