Gobiernu del Principau d'Asturies

Asturies, muncho más cerca

Tas en

Asturias.es Gobiernu Alcuerdos del Conseyu de Gobiernu: 10/10/2019
 

Alcuerdos del Conseyu de Gobiernu: 10/10/2019

  1. 10 de octubre de 2019
    Alcuerdos del Conseyu de Gobiernu: 10/10/2019
    El Gobiernu d’Asturies va invertir 7,3 millones na meyora de les redes de saniamientu y depuración d’agua de Bual, Quirós y Piloña
    • Les obres ayuden a la preservación del mediu ambiente y van beneficiar a más de 1.800 habitantes de los trés conceyos
    • La partida más alta, de 5.468.627 euros, destínase a la creación d’un sistema y una instalación de tratamientu en Bual
    • Belén González Díaz, directora xeneral nueva de Patrimoniu y Xuegu de la Conseyería de Facienda

    El Gobiernu d’Asturies autorizó güei un gastu de más de 7,3 millones pa la meyora de les redes de saniamientu y depuración d’agua de Bual, Quirós y Piloña. Estes iniciatives, que van beneficiar a más de 1.800 habitantes de los trés conceyos, ayuden a la preservación del mediu ambiente y aumenten la calidá de vida de la población de la redolada rural, dos oxetivos prioritarios pal Executivu autonómicu.

    Les trés actuaciones previstes son estes:

    • Proyectu de saniamientu y estación depuradora d’agua residual de Bual: 5.468.627 euros. Esta iniciativa, financiada al traviés del Fondu Européu de Desenvolvimientu Rexonal (Feder), tien un plazu d’execución de 28 meses y va dar serviciu a 865 habitantes. En concreto, consiste na execución d’un sistema pa la recoyida del agua residual de Bual, Armal, Os Mazos y As Cabanas. Tamién se va construyir una depuradora, con capacidá p’atender a una población d’hasta 1.600 vecinos, onde se van tratar los caudales recoyíos primero del so vertíu final a un calce natural. Los fondos aprobaos van partise en cuatro anualidaes: 50.627 euros anguaño, 250.000 nel 2020, 3.788.000 nel 2021 y 1.380.000 nel 2022.
    • Proyectu de saniamientu de Las Agüeras y La Fábrica (Quirós): 1.035.782 euros. Esta intervención ta recoyida nel conveniu marcu de collaboración soscritu en payares del 2017 ente’l Gobiernu d’Asturies y el Ministeriu d’Enerxía, Turismu y Axenda Dixital pal impulsu socioeconómicu de les contornes mineres del carbón. Los trabayos, que van beneficiar a 403 habitantes, van allargase 24 meses y la inversión va partise en trés anualidaes: 130.000 euros anguaño, 850.000 el que vien y 55.782 nel 2021. L’actuación consiste nel desenvolvimientu de la primer fase de la rede de colectores de la parroquia de Las Agüeras y la creación d’una planta de depuración pa evitar vertíos ensin tratar al ríu Quirós. Tamién se va facilitar la recoyida del agua residual de la población de La Fábrica y la so conexón al colector interceptor de Quirós pal so tratamientu na estación depuradora de Bárzana.
    • Proyectu de saniamientu de La Piñera: 812.733 euros. La obra va dar serviciu a 570 habitantes y va impulsar la conexón de la rede d’alcantarelláu de Valle, La Piñera y delles viviendes de L’Infiestu col colector interceptor de Ricao, en Cangues d’Onís, lo que va evitar el vertíu d’agua ensin tratar al ríu Piloña. L’actuación tien un plazu d’execución de 24 meses y la inversión va executase en trés años: 100.000 euros nel 2019, 550.000 nel 2020 y 162.733 nel 2021.

    En tolos casos, la contratación de les obres va tramitase pente mediesde procedimientu abiertu y, pa l’axudicación, van tenese en cuenta dellos criterios, amás del preciu.



    Nomamientu na Conseyería de Facienda

    El Conseyu de Gobiernu nomó directora xeneral de Patrimoniu y Xuegu a Belén González Díaz. Esta decisión completa l’organigrama de la Conseyería de Facienda y remata tamién la estructura nueva de l’Alministración autonómica.

    Belén González Díaz (Xixón, 1973) ye doctora n’Alministración y Dirección d’Empreses pola Universidá d’Uviéu y profesora del departamentu de Contabilidá, onde desenvolvió la so carrera docente y investigadora nes dos últimes décades. Dende’l 2008 exerce tamién como tutora nel centru asociáu de la Universidá Nacional d’Educación a Distancia (Uned) n’Asturies. Foi secretaria de la Facultá de Comerciu, Turismu y Ciencies Sociales Xovellanos cuatro años y responsable d’alcuerdos d’intercambéu con delles universidaes europees nel marcu del programa Erasmus +. Forma parte del conseyeru directivu de l’Asociación Española de Profesores Universitarios de Contabilidá y les sos llinies d’investigación difundiéronse en más de mediu centenar de ponencies en congresos nacionales y internacionales y en 34 publicaciones.

     

    Formatu orixinal (PDF : 247 Kb )

Información sobre el documento

© Copyright 2006. Gobiernu del Principau d'Asturies