Gobiernu del Principau d'Asturies

Asturies, muncho más cerca

Tas en

Asturias.es Gobiernu Alcuerdos del Conseyu de Gobiernu: 24/10/2019
 

Alcuerdos del Conseyu de Gobiernu: 24/10/2019

  1. 24 de octubre de 2019
    Alcuerdos del Conseyu de Gobiernu: 24/10/2019
    El Principáu aprueba’l proyectu de Llei de Garantía de Derechos y Prestaciones Vitales, qu’asegura la cobertura social a toles persones en situación de vulnerabilidá
    • La norma, que se va remitir a la Xunta Xeneral pa la so tramitación, fai entainar la xestión del salariu social básicu y blinda les ayudes en vivienda, discapacidá y dependencia
    • El Conseyu de Gobiernu autoriza una partida de 3,3 millones pa impulsar la convocatoria nueva del programa Mozu, ocúpate, destináu a ameyorar l’inxerimientu llaboral de desempleaos
    • L’Executivu destina 702.187 euros a los trabayos preparatorios de 21 concentraciones parcelaries n’oriente y occidente

    El Gobiernu d’Asturies aprobó güei’l proyectu de Llei de Garantía de Derechos y Prestaciones Vitales, que blinda les midíes principales pa dar cobertura a persones en situación de vulnerabilidá. La norma, que se va unviar a la Xunta Xeneral pa la so tramitación, va dexar asegurar, consolidar y facer entainar los sofitos económicos destinaos a aquellos colectivos que más lo precisen.

    La Conseyería de Derechos Sociales y Bienestar aspira a crear un sistema más eficiente, qu’evite les duplicidades y impulse la cooperación interalministrativa. Nesti sentíu, cola mira de recortar los plazos de tramitación, va promovese la xestión simplificada, el réxime de concesión directa de subvenciones y l’alministración electrónica.

    El testu llegal incluye midíes p’acelerar el pagu del salariu social básicu, amás d’exenciones pa los ingresos provinientes del trabayu y de determinaes pensiones. Tamién prevé l’actualización de los programes personalizaos d’incorporación social y llaboral lligaos a esta renta mínima.

    Amás, propón sofitos adicionales pa families con menores y mocedá, miembros con discapacidá y dependencia. La norma propón, amás, midíes pa garantizar la cobertura de les necesidaes básiques de menores n’acoyimientu familiar, de la que recueye les garantíes xurídiques pa pagar les compensaciones económiques a estes families de manera directa.

    N’ámbitu de la vivienda, aspira a asegurar el derechu de tola sociedá a una casa digna. Con esa finalidá, simplifica la concesión d’ayudes, que van pasar a otorgase de forma directa.

    Tamién garantiza unos mínimos comunes en tol territoriu al respective de les ayudes d’emerxencia social que xestionen les entidaes locales y pon un énfasis especial na atención a la infancia, aparte de nos sofitos pal accesu y caltenimientu na vivienda y contra la probeza enerxética.

    El testu cunta col preste del Conseyu Asesor de Bienestar Social y de la Comisión Asturiana d’Alministración Local. Tamién se presentó a los axentes sociales nel ámbitu de la concertación, a los grupos parllamentarios, a la comisión executiva de la Federación Asturiana de Conceyos (FACC) y a les entidaes del tercer sector. Otra manera, arriquecióse con delles alegaciones recibíes na fase d’información pública.

    El proyectu de llei foi aprobáu pol Conseyu de Gobiernu na llexislatura pasada, concretamente’l 14 de payares del 2018. Sicasí, como la so tramitación na Xunta Xeneral nun se completó, la iniciativa decayó nel mandatu pasáu, polo que ye menester volver principiala.



    Meyora de la empleabilidá de la población mozo

    El Conseyu de Gobiernu autorizó un gastu de 3.328.458 euros pa impulsar una convocatoria nueva del programa Mozu, ocúpate, que busca ameyorar l’inxertamientu llaboral de paraos mozos con un modelu que combina formación teórica con periodos de práctiques.

    La mocedá, sobre manera lo que nun cunta con formación, encara más dificultaes d’accesu al mercáu de trabayu, por eso ye ún de los colectivos d’atención prioritaria pal Serviciu Públicu d’Empléu del Principáu (Sepepa).

    La iniciativa Mozu, ocúpate consiste nun programa de 6 meses de duración qu’alterna la formación col empléu. Esti modelu dexa que muncha mocedá obtenga formación profesional en competencies clave. Amás, facilita l’adquisición d’habilidaes pal so inxertamientu llaboral, al traviés del fomentu d’actitúes positives que refuercen la iniciativa, l’interés y l’afán de superación.

    Nos dos últimos años, al traviés d’esti programa, 50 entidaes desenvolvieron 85 proyectos de formación y inxertamientu que beneficiaron a 870 mozos desempleaos. En total, en periodos de seis meses, impartiéronse más d’una ventena d’especialidaes formatives en families profesionales rellacionaes con actividaes agraries, edificación y obra civil, eletricidá, electrónica, seguranza y mediu ambiente.

    Estes actuaciones cunten con financiamientu del Fondu Social Européu y la Iniciativa d’Empléu Xuvenil (IEX), nel marcu del Programa Operativu d’Empléu Xuvenil pal periodu 2014-2020. Nel 2017 y 2018, el Serviciu Públicu d’Empléu destinó 4,71 millones al programa Mozu, ocúpate y los fondos aprobaos güei van cubrir la convocatoria d’anguaño y del que vien.



    Beques de formación pa cursos de formación pal empléu

    L’Executivu autorizó dos espedientes de gastu pal pagu de beques destinaes al alumnáu desempleao que participó en cursos y actividaes de formación pal empléu. Trátase d’ayudes de tresporte, mantención, agospedamientu y conciliación; estes postreres empobinaes a facilitar l’asistencia a quien tienen al cargu a menores de 12 años o familiares dependientes. Amás d’estes modalidaes, contémplense, con calter escepcional, beques pa determinaos colectivos de paraos y persones con discapacidá.

    P’anguaño y pal añu que vien van destinase 175.855 euros en conceptu de beques y ayudes p’alumnáu de centros de formación profesional pal empléu y otros 148.324 pal de centros integraos de FP.



    Impulsu a les concentraciones parcelaries n’occidente y oriente

    El Conseyu de Gobiernu autorizó un gastu de 702.188 euros pa los trabayos preparatorios de 21 concentraciones parcelaries que se van llevar a cabu dende anguaño y hasta’l 2021. Estes actuaciones cunten con financiamientu del Fondu Européu Agrícola de Desenvolvimientu Rural (Feader).

    Les concentraciones parcelaries a les que va destinada la inversión foron declaraes d’utilidá pública, interés social y execución urxente, cola mira d’ameyorar la xestión de la propiedá y los accesos a finques.

    Estos procesos son fundamentales pa superar la histórica fragmentación de la propiedá n’Asturies, un condicionante qu’enzanca la crecedera de les esplotaciones agraries, l’usu de maquinaria y l’aprovechamientu de la tierra. Al traviés de les concentraciones llogra la ordenación de la superficie agraria, que dexa un usu adaptáu a les necesidaes agrícoles, ganaderes y forestales de cada zona.

    Les concentraciones parcelaries a les que se destinen los fondos son estes:

    • Adralés-Vil.lar d’Adralés-Carbaéu-Amáu (Cangas del Narcea).
    • Grandamarina (El Franco).
    • A Braña (El Franco).
    • L’Artosa (Valdés).
    • Merías-Tueres-Combarciu (Tinéu).
    • Montes d’Abres y Guiar (A Veiga).
    • Montes de Fabal y A Lamisqueira (Taramundi).
    • Monte de Villayón (Villayón).
    • Ponticella (Villayón).
    • Sarceda (Santalla d’Ozcos).
    • Vilamartín (Santalla d’Ozcos).
    • Arcayana (Valdés).
    • Castru-Pereda-Vil.lar de Ayones (Valdés).
    • Faéu (Valdés).
    • Folgosa (Grandas de Salime).
    • Güerres- La Isla (Colunga).
    • A Lagúa (Ibias).
    • Mones- La Mortera-El Faidal-La Braña Arriba-La Braña Baxu (Valdés).
    • Piedrafita-Xalón (Cangas del Narcea).
    • Tabláu-Francos (Tinéu).
    • Vil.lar de Bergame (Cangas del Narcea).


    Cesión al Conceyu de Bual de trés locales n’A Pilella

    L’Executivu aprobó la cesión gratuita al Conceyu de Boal de trés locales allugaos nos suétanos de les viviendes de protección autonómica de La Pilella. El conceyu va utilizar los locales, que suman una superficie total de 243,88 metros cuadraos, p’almacén municipal y arquivu de documentación.



    Cese del xerente del Serviciu d’Emerxencies del Principáu

    El Conseyu de Gobiernu alcordó’l cese, a pidimientu propiu, del xerente del Serviciu d’Emerxencies del Principáu d’Asturies (Sepa), Eugenio García. Tamién aprobó les bases de la convocatoria pa cubrir esta plaza, que se van publicar mañana nel Boletín Oficial del Principáu (Bopa).



    formatu orixinal (PDF : 184 Kb )

Información sobre el documento

© Copyright 2006. Gobiernu del Principau d'Asturies