Gobiernu del Principau d'Asturies

Asturies, muncho más cerca

Tas en

Asturias.es Gobiernu Alcuerdos del Conseyu de Gobiernu: 05/09/2018
 

Alcuerdos del Conseyu de Gobiernu: 05/09/2018

  1. 5 de septiembre de 2018
    Alcuerdos del Conseyu de Gobiernu: 05/09/2018
    El Gobiernu d'Asturies destina 5,7 millones a ameyorar la formación de los trabayadores y a facilitar la so movilidá llaboral

       - El Principáu va abonar la totalidá del sueldu a los emplegaos públicos que s'atopen en situación d'incapacidá temporal con independencia de cuál seya la causa de baxa

       - Aprobáu'l decretu que regula les condiciones del tresporte sanitariu

     

    El Gobiernu d'Asturies destinó 5.714.495 euros a la convocatoria de subvenciones para diversos programes de formación empobinaos, principalmente, a trabayadores ocupaos. La convocatoria toma los exercicios 2018 y 2019.

    En concreto, van desenvolvese programes de formación tresversales dirixíos a trabayadores per cuenta ayena, a trabayadores socios de la economía social y a autónomos.

    Estes iniciatives van incluyir acciones que van favorecer el llogru de competencies tresversales coles mires de facilitar tanto l'accesu al empléu como la movilidá de los trabayadores en diversos sectores d'actividá.

    Con esti fin, polo menos el 25% de cada programa ha tener un calter tresversal. Asina, ha tar dirixíu a formación n'idiomes, ofimática, tecnoloxíes de la información y la comunicación, conocimientos financieros, xurídicos y del funcionamientu de les alministraciones públiques, emprendimientu, prevención de riesgos llaborales, mediu ambiente, primeros auxilios, protección de datos, calidá, marketing, recursos humanos o I+D+i.

    Les actividaes tamién van poder tar dirixíes al llogru de competencies clave pal accesu a los certificaos de profesionalidá.

    L'anterior convocatoria, qu’entá tien en marcha los sos cursos, cuntó con 5.092.000 euros. En 2017, desenvolviéronse 389 acciones formatives de les que se beneficiaron 6.057 persones partíes en 28 cursos nel plan d'autónomos pa 445 participantes; 344 nel plan por cuenta ayena que formó a 5.423 persones, y 17 cursos nel plan d'economía social con 189 inscritos.

     

    Meyora pa los empleaos públicos

    El Principáu aprobó güei l'alcuerdu pol que va abonar la totalidá del sueldu nel tiempu nel qu'un emplegáu públicu s’atope en situación d'incapacidá temporal (baxa). Lo que fixo'l Conseyu de Gobiernu ye ratificar l'alcuerdu al que llegó coles organizaciones sindicales a finales d'agostu.

    La Llei de Presupuestos Xenerales del Estáu de 2018 concedió la potestá a les comunidaes autónomes de reestablecer el complementu qu'abona a losl trabayadores de baxa pa que sigan cobrando'l cien por cien de les sos retribuciones. Dende 2012, el Gobiernu central llindara'l cobru d'esti complementu a una serie de situaciones concretes. Lo que se llogra con esti alcuerdu ye que d'equí p'arriba nun haya llimitaciones, y que cada trabayador en situación d'incapacidá temporal caltenga la totalidá del so sueldu mientres tea de baxa.

    A pesar de les restricciones establecíes en 2012, el Principáu yá articulara una serie d'instrucciones para ampliar lo más posible les situaciones nes que'l trabayador pudiera siguir recibiendo'l complementu al so sueldu. Cola ratificación de güei, dase un pasu más y asegúrase que los trabayadores públicos caltengan el nivel de les sos retribuciones nel momentu que tean de baxa, con independencia de la causa que la motive.

     

    Contratación del serviciu de tresporte a centros de día

    El Gobiernu aprobó la contratación del serviciu de tresporte pa persones mayores dependientes y usuaries de los siguientes centros de día del ERA: La Vega (Mieres), Los Canapés (Avilés), Clara Ferrer (Xixón), El Cristo (Uviéu), Valentín Palacio (Pola de Siero), Les Arriondes, El Nodo (Avilés), Belmonte, Palaciu de Villar (Castrillón), El Miráu (Tinéu), El Naranco (Uviéu) y Riañu. El serviciu de tresporte empréstase dende'l llugar más próximu posible a la casa del usuariu y hasta’l correspondiente centru de día, incluyida la vuelta. El plazu de vixencia del contratu va ser de dos años y el presupuestu xube a 2.615.002,16 euros.

     

    Decretu de tresporte sanitariu

    El Conseyu de Gobiernu dio'l vistu bonu al decretu pol que se regulen les condiciones del equipamientu y la dotación de personal de los vehículos destinaos a la realización de servicios de tresporte sanitariu terrestre, según el réxime xurídicu de les certificaciones técnicu sanitaries y el Rexistru de Tresporte Sanitariu.

    Tratar d'una regulación que sustitúi a l'actual, que data de 1997 y que, magar les socesives adaptaciones a los cambeos introducíos pola lexislación estatal posterior, quedárase daqué obsoleta, sobremanera no que se refier a los niveles de calidá y eficiencia del serviciu.

    El tresporte sanitariu terrestre del Serviciu d'Atención Médica Urxente del Principáu d'Asturies (SAMU) realiza tolos años alredor de 64.000 intervenciones con ambulancies urxentes y unidaes móviles de cuidos intensivos.

    Pela so parte, la unidá que s'encarga de coordinar el tresporte sanitariu programáu atiende tolos años a más de 7.500 pacientes con problemes de movilidá que realicen alredor de 260.000 desplazamientos n'ambulancies tanto individuales como colectives. Na so mayoría son desplazamientos p’aportar a servicios bien especializaos o que precisen tecnoloxía sanitaria peravanzada, como son oncoloxía médica, oncoloxía radioterápica, rehabilitación o diálisis, por mentar los más habituales.

     

    Compra d'ocho ecógrafos

    L'Executivu tamién alcordó la celebración d'un contratu pal suministru d'ocho ecógrafos destinaos a los Servicios de Xinecoloxía y Obstetricia de diverses Árees Sanitaries del Serviciu de Salú del Principáu d'Asturies (Sespa) por un importe de 356.950 euros.

     

    Abonu de la xusticia gratuita

    El Principáu autorizó tamién un gastu por importe de 1,58 millones (1.587.064 euros) para costear los honorarios d'abogaos y procuradores relativos a los servicios d'Asistencia Xurídica Gratuita emprestaos por estos profesionales mientres el segundu trimestre d'anguaño. De la cuantía global, 1,5 millones correspuenden a los honorarios de les abogaes y barganal de 85.000 euros al de el procuradores.

    Ésti ye'l tercer espediente d'abonu de los servicios venceyaos a l'asistencia xurídica gratuita aprobáu en 2018, lo que supon que'l Gobiernu d'Asturies autorizó una partida total de 4,5 millones.

    Dende 2012, el Principáu destinó a esti derechu reguláu al traviés de la Llei 1/1996 d'Asistencia Xurídica Gratuita un total de 37 millones, cuantía qu'asitia a Asturies como la quinta comunidá autónoma con mayor inversión por habitante nesti serviciu.

     

    FP de grau superior de Marketing y Publicidá

    El Gobiernu aprobó'l decretu qu'establez el currículu del ciclu formativu de grau superiorde FP de Marketing y Publicidá.

    Esti ciclu respuende a les necesidaes de formación de técnicos superiores nel sector granible y del comerciu y marketing públicu y priváu. Integra el conocimiento de les polítiques de marketing y de promoción y publicidá de productos y servicios, lo mesmo que de organización y xestión d'actividaes de marketing, investigación comercial, publicidá y relaciones públiques.

     

    Cese del director xeneral de Desarrollu Rural y Agroalimentación

    L'Executivu aceptó güei el cese del director xeneral de Desarrollu Rural y Agroalimentación, Jesús Cases Grande, que va pasar a presidir el Conseyu d'Alministración de la Empresa de Tresformación Agraria (Tragsa). Esti cese va facese efectivu mañana, xueves, cola so publicación nel Boletín Oficial del Principáu d'Asturies (Bopa).

     

    Oficina Comarcal Agraria

    El Conseyu de Gobiernu tamién autorizó'l gastu tresañal y la contratación de les obres d'acondicionamientu y adecuación d'un local en Tinéu pa la sede de la Oficina Comarcal Agraria (OCA), por importe de 448.204,53. D'esta cantidá, 150.000,00 euros son con cargu al presupuestu actual y 298.204,53 euros pal presupuestu 2019.

     

     

    Formatu orixinal (PDF : 69 Kb )

Información sobre el documento

© Copyright 2006. Gobiernu del Principau d'Asturies