Gobiernu del Principau d'Asturies

Asturies, muncho más cerca

Tas en

Asturias.es Gobiernu Acuerdos del Conseyu de Gobiernu
 

Acuerdos del Conseyu de Gobiernu

  1. septiembre
  2. 19 de septiembre de 2019
    Alcuerdos del Conseyu de Gobiernu: 19/09/2019

       - Va financiar meyores tecnolóxiques n’equipos y procesos cola mira de menguar les emisiones de dióxidu de carbonu y el consumu final d’enerxía
       - Esta midida, dotada con fondos del Idae, complementa les subvenciones autonómiques, qu’en dos años sofitaron 77 proyectos con una inversión de 9,3 millones
       - L’Executivu autoriza una partida de 373.239 euros pa ufiertar a los centros docentes accesu a redes inalámbriques wifi
       - Pilar Varela va dirixir el Serviciu Públicu d’Emplegu y Eva Pando va siguir al frente del Institutu de Desenvolvimientu Económicu
       - Aprobada la estructura nueva de l’Axencia de Seguranza Alimentaria, Sanidá Ambiental y Consumu

    El Gobiernu d’Asturies aprobó un gastu plurianual de 4.688.692 euros destináu a la promoción de la eficiencia enerxética en pymes y grandes industries. Esta llinia d’ayudes, que cunta con financiamientu del Fondu Européu de Desenvolvimientu Rexonal (Feder), favorez la incorporación de meyores tecnolóxiques n’equipos y procesos industriales y la implantación de sistemes de xestión enerxética n’empreses.

    La convocatoria ta dotada con fondos del Institutu pa la Diversificación y Aforru de la Enerxía (Idae), dependiente del Ministeriu pa la Transición Ecolóxica, y ye la primera qu’aprueba esti organismu en materia d’eficiencia enerxética pa pymes y grandes industries. P’acoyese a estes subvenciones, les compañíes han llograr una mengua de les emisiones de dióxidu de carbonu (CO2) y del consumu d’enerxía final y cumplir coles condiciones establecíes nes bases.

    L’espediente aprobáu güei prevé esta distribución de creitos: 688.692 euros p’anguaño, dos millones nel 2020, 1,5 millones nel 2021 y 200.000 euros nel 2023.

    Estes ayudes enmárquense nel Plan Nacional d’Eficiencia Enerxética 2014-2020, que cunta con un presupuestu global de 307,6 millones pal desenvolvimientu d’actuaciones empobinaes al cumplimientu de los oxetivos d’aforru qu’afita la Comisión Europea pa tolos sectores consumidores. Esti organismu establez pa toa España un total de 15.979 tonelaes equivalentes de petroleu (tep) pal final del periodu. Al respective de la industria, que representa’l 25 % del consumu total nacional y tien un potencial d’aforru escomanáu, propónse llevar a cabu acciones qu’incidan na meyora de la eficiencia en tecnoloxíes y procesos y na implementación de sistemes de xestión.

    Esta llinia de subvenciones complementa les iniciatives que nos últimos años executó’l Principáu pa menguar les emisiones de dióxidu de carbonu y avanzar escontra un consumu eficiente na industria. Nesti sentíu, la Conseyería d’Industria, Emplegu y Promoción Económica realizó dos convocatories d’ayudes (2017 y 2018) que sofitaron 77 proyectos d’eficiencia enerxética por 9,3 millones y llograron una mengua anual d’emisiones de 4.900 tonelaes de CO2. Estos fondos facilitaron la sustitución d’equipos consumidores d’enerxía por otros más eficientes (quemadores de combustible, motores y lluminaries, sobre manera), amás de la ellaboración d’auditoríes enerxétiques n’empreses pequeñes y medianes.



    Dotación de redes wifi pa centros docentes

    L’Executivu autonómicu aprobó un gastu plurianual de 373.239 euros pa ufiertar a los centros docentes accesu a redes inalámbriques wifi, desque se remató la dotación de servicios de conectividá ultrarrápida a internet.

    Esta meyora enmárcase nel proyectu Escueles conectaes que la Conseyería d’Educación desenvolvió xunto al Ministeriu d’Educación y la empresa pública Rede.es pa la estensión de la banda ancha en centros públicos non universitarios, cola mira d’afitar l’usu de les tecnoloxíes de la información. Esta iniciativa, que supunxo una inversión de 6,5 millones, dexó dotar de conexón ultrarrápida a 400 centros y más de 90.000 estudiantes.

    Una conectividá rápida, segura, de gran capacidá y calidá n’escueles y institutos dexa menguar la resquiebra dixital y impulsar una educación más moderna y innovadora.

    La partida aprobada güei, que cunta con financiamientu del Fondu Européu de Desenvolvimientu Rexonal (Feder), estrémase en dos anualidaes: 97.042 euros pa esti exerciciu y 276.197 pal que vien.



    Nomamientos na Conseyería d’Industria

    El Conseyu de Gobiernu tamién aprobó dos nomamientos a propuesta de la Conseyería d’Industria, Emplegu y Promoción Económica. Trátase d’estos:

       - Directora xerente del Serviciu Públicu d’Emplegu del Principáu (Sepepa): Pilar Varela Díaz (Avilés, 1960).
       - Diplomada en Maxisteriu y llicenciada en Pedagoxía pola Universidá d’Uviéu, foi directora de Formación na Ciudá Industrial Valle del Nalón (Valnalón) y participó na comisión executiva de la Fundación del Metal d’Asturies. Na llexislatura pasada (2015-2019) foi conseyera de Servicios y Derechos Sociales y, primero, alcaldesa d’Avilés (2007-2015), que na so corporación tamién foi conceyala de Facienda y Polítiques Actives d’Emplegu y de Facienda y Promoción Económica.
       - Directora xeneral del Institutu de Desenvolvimientu Económicu del Principáu (Idepa): Eva Pando Iglesias (Ayer, 1971).

    Inxeniera industrial pola Universidá d’Uviéu y MBA pola Universidá Politécnica de Madrid, dirixe l’Idepa dende setiembre del 2015. Desenvolvió una parte importante de la so trayectoria profesional na Sociedá Rexonal de Promoción del Principáu (1997-2004). Depués, dende xineru del 2005 hasta setiembre del 2015 trabayó nel Centru Européu d’Empreses y Innovación (CEEI), onde ostentó’l cargu de directora.



    Estructura de l’Axencia de Seguranza Alimentaria

    L’Executivu aprobó’l decretu que regula la estructura, amás del réxime interior y funcionamientu, de l’Axencia de Seguranza Alimentaria, Sanidá Ambiental y Consumu. La novedá principal ye’l cambéu de denominación d’esti órganu -enantes llamábase Axencia de Sanidá Ambiental y Consumu- cola mira d’identificar meyor toles sos árees de competencia y dar más visibilidá a les sos actuaciones nel campu de la seguranza alimentaria.

    Estes actividaes empobínense a la protección de la salú énte los riesgos derivaos del consumu d’alimentos, con vixilancia y control, pa verificar el cumplimientu de la normativa vixente en toles mayes de la cadena, sacante la producción primaria.

    Otra manera, caltiénense les competencies y responsabilidaes de l’axencia en materia de sanidá ambiental y consumu, árees que cada vez garren más importancia.

    L’axencia ye un órganu adscritu a la dirección xeneral de Salú Pública qu’asume la tramitación d’espedientes sancionadores por vulneración de la normativa rellacionada cola defensa de consumidores y usuarios, amás del sofitu na investigación y control de brotos epidémicos y na implantación y siguimientu de programes de prevención y promoción de la salú nes árees sanitaries.

     

    Formatu orixinal (PDF : 261 Kb )
  3. 12 de septiembre de 2019
    Alcuerdos del Conseyu de Gobiernu: 12/09/2019

       - La partida más importante, de 18.400.000 euros, va permitir a los conceyos contratar a más de 400 persones desemplegaes y ufiertar práctiques a más d'un centenar de mozos
       - Otros 3,5 millones van facilitar la continuidá de la iniciativa PIOME, de formación pa paraos de llarga duración

    El Conseyu de Gobiernu aprobó güei un gastu tresañal de 21,9 millones pal desenvolvimientu de dellos programes empobinaos a la meyora del empléu y al insertamientu llaboral de colectivos en dificultaes.

    La partida económica más importante, de 18.400.000 euros, va destinase a subvencionar actuaciones de los conceyos, concretamente a financiar les contrataciones de técnicos d'empléu y de desenvolvimientu local, contratos en práctiques pa mocedá, y al desenvolvimientu de los planes locales d'empléu. El gastu aprobáu garantiza la cobertura de les necesidaes financieres d'estos programes en 2019 y 2020, colo que se va dar continuidá a les convocatories actuales financiaes pol Serviciu Públicu d'Empléu del Principáu (Sepepa).

    Por exemplu, al traviés d'estos proyectu abonen los costos salariales de 40 axentes de desenvolvimientu local, los contratos en práctiques de 140 persones moces inscrites nel Sistema Nacional de Garantía Xuvenil y les contrataciones venceyaes a los planes locales d'empléu cofinanciaes pol Fondu Social Européu, que na convocatoria actual algamen les 432. Acordies con les estimaciones del Sepepa, el númberu de trabayadores que se va beneficiar de la nueva convocatoria ye asemeyáu.

    Per otra parte, el Conseyu de Gobiernu tamién autorizó un gastu tresañal de 3,5 millones para sufragar la convocatoria de subvenciones nel marcu del Programa Integral d'Orientación y Meyora de la Empleabilidá (PIOME), empobináu a facilitar la empleabilidá de paraos de llarga duración y colectivos con dificultaes p’aportar al mercáu llaboral.

    Al traviés d'esti proyectu, que se va desenvolver anguaño y el próximu, finánciense acciones de formación y orientación que se complementen con píldores formatives en collaboración con entidaes y organizaciones que trabayen con colectivos en riesgu o con mayores dificultaes d'insertamientu, como muyeres y persones con discapacidá.

    N'anteriores ediciones collaboraron con esti programa Cocemfe Asturies, la Fundación Muyeres, la Fundación Asturiana de la Construcción (FLC), la Federación Asturiana de Conceyos (FACC), Acción Llaboral, Fundación Metal, la Fundación de Trabayadores de la Siderurxa Integral, l'Agrupación de Sociedaes Asturianes de Trabayu Asociáu y Economía Social (Asata), Comisiones Obreres Asturies y la Fundación de les Comarques Mineres (Fucomi).



    Casi 50.000 euros d'ayuda para Campoastur

    El Conseyu de Gobiernu autorizó destinar 49.713 euros a la Organización de Productores de Frutes y Hortolices de Campoastur Productos y Servicios, Sociedá Cooperativa Asturiana. Trátase d'una ayuda de la Unión Europea, financiada al traviés del Fondu Européu Agrícola de Garantía (Feaga).

    La organización común de los mercaos (OCM) de los productos agrarios inclúi dientro de los los llabradores, l'aumentu del consumu y el respetu pol mediu ambiente. L'ayuda aprobada güei enmárcase na llinia empobinada a organizaciones de productores que punxeron en marcha un programa operativu p'ameyorar la so competitividá.

     

    Formatu orixinal (PDF : 189 Kb )
  4. 2 de septiembre de 2019
    Alcuerdos del Conseyu de Gobiernu: 30/08/2019

       - El Conseyu de Gobiernu aprueba la nueva estructura, que caltién el númberu de viceconseyeríes (3) y aumenta en trés direcciones xenerales (44) al respective de la llexislatura anterior
       - Tanto'l Comisionáu pal Retu Demográficu como la dirección d'Igualdá van depender del área de la xefatura del Executivu
       - La creación de les conseyeríes de Cultura y Ciencia respuende al apueste estratéxicu pa fomentar la innovación, el turismu y les iniciatives culturales y llingüístiques
       - Melania Álvarez, titular de Derechos Sociales y Bienestar, va exercer la portavocía del Executivu
       - El Principáu va cuntar con una dirección xeneral específica pa la mocedá y va poner en marcha l'Institutu de la Memoria Democrática

    El Conseyu de Gobiernu aprobó esta mañana la nueva estructura del Executivu, que va tar formáu por diez conseyeríes, una d'elles con rangu de vicepresidencia, trés viceconseyerías y 44 direcciones xenerales. L'aumentu al respective de la pasada llexislatura -dos conseyeríes y trés direcciones xenerales, igual númberu de viceconseyeríes- respuende al oxetivu de reforzar la ciencia ya innovación, l’ área cultural y llingüística y conceder mayor relevancia al turismu y la xusticia. El Comisionáu pal Retu Demográficu y la dirección d'Igualdá van depender directamente del presidente del Principáu.

    El principal cambéu sobre'l mandatu anterior consiste na creación de les conseyeríes de Cultura, Política Llingüística y Turismu y de Ciencia, Innovación y Universidá. Dambes traen dos apuestes estratéxiques: trátase de fomentar la innovación científica y técnica, lo mesmo que de fortalecer les polítiques turístiques, culturales y llingüístiques. Aprobada la estructura, nes próximes xuntes del Conseyu de Gobiernu alcordaránse los nomamientos correspondientes. Güei decidióse el de la vocera del Executivu, responsabilidá que recayó en Melania Álvarez, titular de Derechos Sociales y Bienestar. Tolos conseyeros van solicitar la so comparecencia na Xunta Xeneral pa esplicar los respectivos planes de los sos departamentos.

    De siguío resuménse les estructures de cada área:



    Presidencia

    La Presidencia del Principáu cunta con dos órganos de sofitu, dambos con rangu de viceconseyeríes: el Gabinete de la Presidencia y la Oficina de Comunicación del Gobiernu.

    Al respective de les competencies que s’adscriben a esti área, créense dos direcciones xenerales: d'Igualdá y el Comisionáu pal Retu Demográficu. De la primera va depender l'Institutu Asturianu de la Muyer, que trabaya pola promoción de la igualdá d'oportunidaes, l'impulsu de la participación activa de les muyeres na actividá social, política, económica y cultural, y la eliminación de cualesquier discriminación por razón de sexu.

    La segunda va ocupase del desenvolvimientu de la estratexa frente al retu demográficu, empobinada a la identificación y puesta en práctica de midíes y acciones pa desaniciar l'avieyamientu y el despoblamientu territorial.



    Conseyería d'Infraestructures, Mediu Ambiente y Cambéu Climáticu

    Esta conseyería, que s'alza a la categoría de Vicepresidencia, caltién la mayoría de les competencies de la pasada llexislatura, sacantes les relatives a biodiversidá, protección d'especies naturales y espacios monteses, que pasen a depender de nuevo de la Conseyería de Desenvolvimientu Rural.

    Como órganos centrales, amás de la Secretaría Xeneral Técnica, inclúyense los siguientes:

       - Dirección Xeneral de la Vicepresidencia
       - Dirección Xeneral d’ Infraestructures
       - Dirección Xeneral de Movilidá y Conectividá
       - Dirección Xeneral d’ Ordenación del Territoriu y Urbanismu
       - Viceconseyería de Mediu Ambiente y Cambéu Climáticu:
       - Dirección Xeneral de Calidá Ambiental y Cambéu Climáticu

    La Viceconseyería de Mediu Ambiente y Cambéu Climáticu tien una vocación tresversal en relación con toles polítiques qu'inflúin nel cambéu climáticu y va ser la interlocutora del Principáu col Gobiernu central y la Unión Europea. D'ella depende la Dirección Xeneral de Calidá Ambiental y Cambéu Climáticu, que funde dos direcciones xenerales anteriores por razones d'eficacia y pa optimizar los procedimientos.

    Pela so parte, la Dirección Xeneral de Movilidá y Conectividá busca planiar la movilidá intermodal n'Asturies, incluyíes les conexones aérees, y mui particularmente nel área central. Esta dirección va consensuar les soluciones con tolos axentes implicaos y va tener el sofitu de l'Axencia Asturiana de Tresportes y Movilidá y del Consorciu de Tresportes d'Asturies.

    Siguen formando parte d'esta conseyería la Xunta de Saneamientu, el Consorciu de Tresportes (CTA), la Comisión d'Urbanismu y Ordenación del Territoriu (CUOTA) y el Xuráu d'Espropiación. Tamién va exercer les competencies que s'atribúin al Principáu en Coxersa, Cadasa, Sedes, Soxepsa, les sociedaes Mista Centru de Tresportes de Xixón, S.A. y Mista Ciudá Asturiana del Tresporte, S.A., Avilés Isla de la Innovación S.A., Xixón al Norte S.A. y la Zona d'Actividaes Loxístiques ya Industriales d'Asturies S.A.



    Conseyería de Presidencia

    La Conseyería de Presidencia va cuntar con una Viceconseyería de Xusticia de la que van depender directamente les direcciones xenerales de Función Pública y de Sector Públicu, Seguridá y Estratexa Dixital. Les trés direcciones xenerales restantes son Alministración Local; Emigración y Memoria Democrática, y Gobernanza Pública, Tresparencia, Participación Ciudadana y Axenda 2030 (l'Axenda 2030 pal Desenvolvimientu Sostenible ye un plan d'acción que lidera Naciones Xuníes a favor de les persones, el planeta y la prosperidá).

    L'Institutu Asturianu de la Mocedá y l'Axencia Asturiana de Cooperación al Desenvolvimientu adquieren agora rangu de dirección xeneral. Como novedá, créase l'Institutu de la Memoria Democrática. Coles mesmes, caltiense dientro de les sos competencies, como en llexislatures pasaes, l'Institutu Asturianu d'Alministración Pública Adolfo Posada.

    La so estructura, amás de la Secretaría Xeneral Técnica, va tar formada por:

       - Viceconseyería de Xusticia

       - Dirección Xeneral de Sector Públicu, Seguridá y Estratexa Dixital
       - Dirección Xeneral de Función Pública •
       - Dirección Xeneral d'Alministración Local
       - •Dirección Xeneral d'Emigración y Memoria Democrática •

       - Dirección Xeneral de Gobernanza Pública, Tresparencia, Participación Ciudadana y Axenda 2030

    Como órganos d'asesoramientu y sofitu va cuntar colos siguientes:

    • Comisión Superior de Personal

    • Comisión Paritaria de formación local del Principáu d'Asturies

    • Comisión de Coordinación de les Policías Locales

    • Conseyu Asesor d'Espectáculos Públicos y Actividaes Recreatives del Principáu d'Asturies

    • Comisión técnica d'espertos pa la ellaboración d'un catálogu de muertes relatives a la Guerra Civil y la Dictadura •

    Conseyu de la Memoria Democrática del Principáu d'Asturies

    • Conseyu Asturianu de Cooperación al Desarrollu•

    Comité d'estratexa dixital y de Seguridá de la Información del Principáu d'Asturies

    • Comisión de Comunicación Institucional

    • Comisión de Protección Civil del Principáu d'Asturies



    Conseyería de Facienda

    Ente les novedaes destaquen l'asunción de les competencies sobre'l xuegu y la creación de la Dirección Xeneral d'Asuntos Europeos, dambes dependientes de la Conseyería de Presidencia na pasada llexislatura. Xunta cola Secretaría Xeneral Técnica, ta integrada polos siguiente órganos centrales:

    • Intervención Xeneral

    • Dirección Xeneral de Presupuestos

    • Dirección Xeneral de Finances y Economía

    • Dirección Xeneral de Patrimoniu y Xuego

    • Dirección Xeneral d'Asuntos Europeos

    • Ente Públicu de Servicios Tributarios.

    Como órganos d'asesoramientu y sofitu cunta colos conseyos d'Estadística y del Xuegu del Principáu d'Asturies. Exerz, amás, los derechos políticos derivaos de la propiedá de les sos acciones nes empreses públiques Sociedá de Servicios del Principáu d'Asturies, S.A. (Serpa) y Xestión d'Infraestructures Sanitaries del Principáu d'Asturies S.A.O. (Xispasa)



    Conseyería d'Industria, Empléu y Promoción Económica

    Xuntu cola Secretaría Xeneral Técnica, cuenta colos siguientes órganos centrales:

    • Dirección Xeneral d'Industria •

    Dirección Xeneral d'Enerxía, Minería y Reactivación

    • Dirección Xeneral d'Empléu y Formación

    • Dirección Xeneral de Comerciu, Entamadores y Economía Social

    Amás, son órganos d'asesoramientu y sofitu:

    • Conseyu Asesor de Comerciu del Principáu d'Asturies

    • Comisión de Precios del Principáu d'Asturies

    • Conseyu d'Artesanía •

    Comisión Rexonal de Seguridá Minera •

    Conseyu de Relaciones Llaborales y Polítiques Actives d'Empléu •

    Conseyu Asturianu de la Economía Social

    Adscritu a esti departamentu ta l'organismu autónomu Serviciu Públicu d'Empléu del Principáu d'Asturies. D'esta conseyería dependen, amás, la Inspección Técnica de Vehículos S.A. y l'Institutu de Desenvolvimientu Económicu del Principáu d'Asturies (Idepa).

    Destaca la creación d'una Dirección Xeneral d'Industria para *encauzar el contactu coles compañíes y diseñar la estratexa empresarial pa la comunidá autónoma, en cumplimientu del compromisu del Gobiernu asturianu con esti sector. Tamién se constituyó una Dirección Xeneral d'Enerxía, Minería y Reactivación, que va encetar la xestión de los fondos y recursos que procedan del Estáu o d'Europa pa la reactivación de les contornes mineres.

    La Dirección Xeneral d'Empléu y Formación, na que s'inclúi l'anterior Dirección Xeneral de Trabayu con cometíos similares, va poner l'acentu, amás d'en la mediación nos conflictos llaborales, na importancia del empléu y la formación. A lo último, la Dirección Xeneral de Comerciu, Entamadores y Economía Social fórmase como elementu de sofitu a l'actividá de losl trabayadores por cuenta propia, centráu, pola so relevancia, nel sector comercial y n'especial nos autónomos, consideraos como entamadores, según na busca de fórmules de trabayu rellacionaes cola economía social.



    Conseyería d'Educación

    La nueva estructura de la Conseyería d'Educación, amás de la Secretaría Xeneral Técnica, ta integrada polos órganos centrales:

    • Dirección Xeneral de Personal Docente.

    • Dirección Xeneral de Planificación ya Infraestructures Educatives.

    • Dirección Xeneral d'Ordenación, Evaluación y Equidá Educativa.

    • Dirección Xeneral d'Enseñances Profesionales.

    Como órganos d'asesoramientu y sofitu cunta con:

    • Conseyu Escolar del Principáu d'Asturies.

    • Conseyu Asturianu de la Formación Profesional.

    • Observatoriu de la Escuela rural n'Asturies

    La conseyería va cuntar con dos nuevos servicios, el primeru d'ellos, de Planificación d'Educación Infantil 0-3 años, dependiente de la Dirección Xeneral de Planificación ya Infraestructures Educatives, tien atribuyíes funciones como la cooperación coles entidaes locales pa la progresiva implantación del primer ciclu d'Educación Infantil

    El segundu serviciu, de Equidá Educativa, adscritu a la Dirección Xeneral d'Ordenación, Evaluación y Equidá Educativa, va ser responsable de potenciar la equidá de los servicios educativos y garantizar la igualdá d'oportunidaes; d'ellaborar, desenvolver, siguir y evaluar el Plan Rexonal de Formación Permanente del Profesoráu; de coordinar y siguir los proyectos d'innovación educativa, y de fomentar el trabayu en rede ente centros educativos y d'equipos docentes.



    Conseyería de Salú

    La Conseyería de Salú va articulase sobro una Secretaría Xeneral Técnica y cuatro direcciones xenerales:

    • Dirección Xeneral de Salú Pública •

    Dirección Xeneral de Política y Planificación Sanitaries

    • Dirección Xeneral calidable, Tresformamientu y Xestión de la Conocencia •

    Dirección Xeneral de Cuidos, *Humanización y Atención Sociosanitaria

    Esta última dirección creaser pa facer frente al retu del avieyamientu, que va suponer más afectaos por enfermedaes cróniques, lo que va esixir de la mesma polítiques sanitaries que potencien l'autonomía y el autocuidáu dende un puntu de vista integral d'atención a les persones. Va Coordinar, amás, en conxunto cola Conseyería de Derechos Sociales y Bienestar, el desenvolvimientu del Plan Sociosanitariu.

    Esta dirección va tener dos servicios: el de Cuidos n'Atención Sanitaria y Sociosanitaria, y el Serviciu Centráu nes Persones y Autonomía. Ente los sos oxetivos de llexislatura destaca'l desenvolvimientu de la Llei de Derechos de les Persones a la fin de la so vida.

    La nueva Dirección Xeneral de calidá , Tresformación y Xestión de la Conocencia va centrase n'impulsar la calidá asistencial, la seguridá clínica, Sistemes y Tecnoloxía, y el de Tresformación y Xestión de la Conocencia.

    Per otra parte, unifícase nuna sola dirección les árees de Política y Planificación Sanitaries, qu'asume Inspección de Servicios y Centros Sanitarios, Farmacia y Planificación y Siguimientu. A lo último, la Dirección de Salú Pública va disponer de los servicios de Salú Poblacional y el de Vixilancia Epidemiolóxica. A ella adscriíbese l'Axencia de Seguridá Alimentaria, Sanidá Ambiental y Consumu.



    Conseyería de Derechos Sociales y Bienestar

    Amás de la Secretaria Xeneral Técnica, esti área cunta colos siguientes órganos centrales:

    • Dirección Xeneral de Planificación, Ordenación y Adaptación al Cambéu Social

    • Dirección Xeneral de Servicios Sociales y Mayores

    • Dirección Xeneral de Xestión de Derechos Sociales

    • Dirección Xeneral de Vivienda

    Esta estructura respuende a la necesidá d'adaptar el marcu normativu del sistema de servicios sociales a los oxetivos de xestionar con axilidá la respuesta a les necesidaes de les persones y de fortalecer l'enfoque comunitariu y la participación social pa facer más eficientes los servicios sociales.

    Un exemplu de la necesidá d'adaptación ye la Dirección Xeneral de Xestión de Derechos Sociales, qu'asume les competencies de valoración de la situación de dependencia y ellaboración del Programa Individual d'Atención que recayíen na Dirección Xeneral de Servicios Sociales de Proximidá, p'ameyorar la xestión y asina amenorgar los tiempos d'espera na tramitación de les prestaciones.

    Tamién dependen d'esta conseyería l'Institutu Asturianu pa l'Atención Integral a la Infancia y a les Families, l'organismu Establecimientos Residenciales p’Ancianos d'Asturies (YERA) y cola empresa pública Viviendes del Principáu d'Asturies, S.A. (Vipasa).

    Cuenta colos siguientes órganos d'asesoramientu y sofitu:

    • Conseyu Asesor de Bienestar Social del Principáu d'Asturies

    • Conseyu de Persones Mayores del Principáu d'Asturies

    • Conseyu Asesor de Discapacidá del Principáu d'Asturies

    • Comisión de Tuteles del Principáu d'Asturies

    • Conseyu del Voluntariáu del Principáu d'Asturies

    • Conseyu pa la promoción de l'accesibilidá y la supresión de barreres

    • Observatoriu de la Infancia y l'Adolescencia

    • Comité d'Ética n'Intervención Social del Principáu d'Asturies.

    • Conseyu Autonómicu de la Vivienda

    La conseyería va exercer les competencies que s'atribúin al Principáu nes siguientes entidaes:

    • Fundación Asturiana d'Atención y Protección a Persones con Discapacidaes y/o Dependencies (Fasad)

    • Fundación Asturiana pa la Promoción del Empléu y la Reinserción Sociu-Llaboral de Persones con Discapacidáes y en Grave Riesgu de Marxinación Social (Faedis)

    • Fundación Estudio Calidá Edificación Asturies (Fecea)



    Conseyería de Desenvolvimientu Rural, Agroganadería y Pesca

    Los órganos centrales de la conseyería, xuntu cola Secretaría Xeneral Técnica, son:

    • Dirección Xeneral de Ganadería •

    Dirección Xeneral de Desenvolvimientu Rural ya Industries Agraries

    • Dirección Xeneral de Planificación, Infraestructures Agraries y Montes

    • Dirección Xeneral de Mediu Natural

    • Dirección Xeneral de Pesca Marítima

    Na nueva estructura de la conseyería, anque'l númberu de servicios caltiense, créase unu nuevu dedicáu al Desenvolvimientu Rural y Modernización d'Esplotaciones coles mires d'impulsar midíes que favorezan el relevu xeneracional y la modernización, el programa Leader y la coordinación de los grupos d'acción local, mesmo qu’al impulsu de midíes de diversificación ya innovación de la economía rural.

    D'ella dependen tamién la entidá pública'l Serviciu d'Investigación y Desenvolvimientu Agroalimentariu del Principáu d'Asturies (Serida) y la Comisión Rexonal del Bancu de Tierres. Y como órganos d'asesoramientu y sofitu dispón de:

    • Conseyu Forestal del Principáu d'Asturies

    • Conseyu Agrariu del Principáu d'Asturies

    • Conseyu Agroalimentario del Principáu d'Asturies

    • Conseyu Rexonal de Caza •

    Conseyu de los Ecosistemes Acuáticos y de la Pesca n'Agües Continentales del Principáu d'Asturies



    Conseyería de Cultura, Política Llingüística y Turismu

    Esta conseyería, hasta agora venceyada al departamentu d'Educación, recupera un espaciu Llargamente solicitáu y amplía el so marxe d'acción al asumir, con una viceconseyería, les competencies en materia de turismu, coles mires de que converxan dos de los potenciales más reconocibles del Principáu, al traviés d'acciones globales y tresversales.

    Esti departamentu pretende coles mesmes dar un fuerte impulsu a la política llingüística, asumida como valor esencial ya identitariu d'Asturies. Presenta, tamién como novedá, la creación del Conseyu Asesor de Política Llingüística.

    La conseyería ta integrada, xunto cola Secretaría Xeneral Técnica, polos siguiente órganos centrales:

    • Viceconseyería de Turismu

    • Dirección Xeneral de Cultura y Patrimoniu

    • Dirección Xeneral de Política Llingüística

    • Dirección Xeneral de Deporte

    Como organismos autónomos cunta tamién col Centru Rexonal de Belles Artes y la Orquesta Sinfónica del Principáu d'Asturies, y dependen d'él l'Archuivu Históricu d'Asturies, la Biblioteca d'Asturies Ramón Pérez de Ayala y el Muséu Arqueolóxicu d'Asturies. Como órganos d'asesoramientu y sofitu cunta con:

    • Conseyu Asesor de Turismu •

    Conseyu de Patrimoniu Cultural d'Asturies

    • Conseyu Asesor de Deportes del Principáu d'Asturies

    • Xunta Asesora de Toponimia del Principáu d'Asturies

    • Comisión de Valoración de Bienes del Patrimoniu Cultural d'Asturies

    • Comisión Asesora del Muséu Barjola

    • Comisión d'Inversiones con cargu al unu por cientu cultural n'obres públiques

    • Conseyu Asesor de Política Llingüística

    La conseyería va exercer les facultaes que-y correspuendan al Principáu nel Consorciu pa la Xestión del Muséu Etnográficu de Grandas de Salime, que s'atopa en trámites de lliquidación, y adscritu a ella ta'l Comité Asturianu de Disciplina Deportiva. Tamién va exercer les competencies y funciones que-y correspuenden al Principáu nel Real Institutu d'Estudios Asturianos y va representar al Principáu nos órganos de gobiernu del Patronatu Real de la Cueva y Sitiu de Cuadonga.

    Coles mesmes, va exercer les competencies que-y pertenecen na sociedá pública de Xestión y Promoción Turística y Cultural del Principáu d'Asturies, SAU y na sociedá inmobiliaria del Real Sitiu de Cuadonga, S.A. Y se adscriben a ella, como Fundaciones del Sector Públicu autonómicu, la Fundación La Llaboral Centru d'Arte y Creación Industrial y la Fundación Centru Cultural Internacional Oscar Niemeyer-Principáu d'Asturies.



    Conseyería de Ciencia, Innovación y Universidá

    La Conseyería de Ciencia, Innovación y Universidá naz con una estructura que tien como oxetivu la coordinación de les polítiques d'investigación y la racionalización de recursos exstentes. Va cuntar, amás de con una Secretaría Xeneral Técnica y dellos órganos d'asesoramientu y sofitu, con dos direcciones xenerales:

    • Dirección Xeneral d'Universidá •

    Dirección Xeneral d'Innovación, Investigación y Tresformación Dixital

    Como principal novedá, la conseyería va axuntar nuna mesma dirección xeneral les polítiques rellacionaes cola innovación, la investigación y la tresformación dixital, nun apueste por coordinar y entainar les convocatories públiques enmarcaes nel Plan de Ciencia, Tecnoloxía ya Innovación (PCTI) d'Asturies y por venceyar la innovación al desarrollu de la sociedá de la información. Esta dirección xeneral va encargase, amás, del diseñu d'estratexes y propuestes dirixíes a la internacionalización del ecosistema investigador ya innovador asturianu.

    La Dirección Xeneral d'Universidá va caltener la misión de desenvolver la política autonómica y d'investigación en materia universitaria, n'estrecha collaboración cola institución académica asturiana.

    La conseyería va disponer tamién d'una Secretaría Xeneral Técnica que, amás del serviciu d'asuntos xenerales, va incorporar otru de contratación y réxime xurídicu, fundamental pal desenvolvimientu de la Llei de Ciencia que va poner en marcha'l Gobiernu d'Asturies.

    Otra de les novedaes d'esta nueva estructura ye l’adscripción de la Fundación pal Fomentu n'Asturies de la Investigación Científica Aplicada y la Tecnoloxía (Ficyt) a la conseyería como una Fundación del Sector Públicu autonómicu, que se va encargar de les convocatories rellacionaes cola I+D+i. Y como órganu d'asesoramientu y sofitu, va anovase'l Conseyu Asturianu de Ciencia, Tecnoloxía ya Innovación.

     

    Formatu orixinal (PDF : 179 Kb )

Buscar mas acuerdos

Buscar
Desde
/
/
Hasta
/
/

Información sobre el documento

© Copyright 2006. Gobiernu del Principau d'Asturies