Gobiernu del Principau d'Asturies

Asturies, muncho más cerca

Tas en

Asturias.es Gobiernu Acuerdos del Conseyu de Gobiernu
 

Acuerdos del Conseyu de Gobiernu

  1. septiembre
  2. 25 de septiembre de 2020
    Alcuerdos del Conseyu de Gobiernu: 25/09/2020

    • El gallardón, propuestu pola Xunta Xeneral, reconoz la entrega de toa una vida dedicada a la defensa de la democracia y los sos valores
    • El Principáu va formular un requerimientu previu contra l’Alministración Xeneral del Estáu pa que se compensen los perxuicios económicos derivaos de la modificación del sistema de xestión y liquidación del IVA correspondiente al 2017
    • Autorizáu un gastu de 2,7 millones que va dexar ufiertar orientación profesional a más de 11.000 desempleaos
    • L’Executivu va destinar 7,3 millones en subvenciones p’ameyorar la eficiencia enerxética d’edificios los trés años vinientes

    El Conseyu de Gobiernu decidió güei conceder la Medaya d’Oru d’Asturies, a títulu póstumu, a Vicente García Riestra, en reconocencia a la so defensa de la democracia y los sos valores. L’Executivu rinde homenaxe asina al postrer superviviente español del campu de concentración nazi de Buchenwald “n’exerciciu de la obligación ética, política y moral como poder públicu na recuperación de la memoria democrática”.

    D’esta manera, dase cumplimientu tamién al alcuerdu adoptáu’l 16 de setiembre del 2019 pola Mesa de la Xunta Xeneral pa proponer al Conseyu de Gobiernu la concesión d’esta alta distinción a Vicente García Riestra.

    Nacíu en La Pola Siero’l 20 de xineru de 1925, García Riestra morrió en Trélissac (Francia) el 9 de mayu del 2019, depués de sobrevivir al horror nazi en Buchenwald (Weimar-Alemaña). Exiliáu al país vecín tres de la guerra civil, ellí xuntóse a la resistencia francesa cuando la Segunda Guerra Mundial. El 24 de xineru de 1944 foi deteníu pola Gestapo, torturáu y unviáu al campu de concentración alemán, del que foi lliberáu’l 11 d’abril de 1945, xunto a los demás prisioneros.

    A lo llargo de tola so vida lluchó pola recuperación de la memoria histórica y nos sos últimos años dio charles divulgatives en centros educativos d’España y Francia pa cuntar la so esperiencia, defender la llibertá y concenciar a la mocedá sobre les consecuencies del nazismu.

    Vicente yera’l séptimu de los diez fíos del matrimoniu formáu por Gregorio García Lavilla y Áurea Riestra Morilla, y la so historia recoyóse nel llibru 42.533: Depués de Buchenwald, de Xuan Santori, que ganó’l XXIII Premiu Máximu Fuertes Acevedo d’Ensayu, concedíu nel 2017 pol Principáu.

    La Medaya d’Asturies acútase, según la Llei 4/86, de 15 de mayu, Reguladora d’Honores y Distinciones del Principáu, pa premiar méritos verdaderamente singulares que tengan persones o instituciones con una importancia y trescendencia pa los intereses xenerales de la comunidá que los faiga acreedores d’esta reconocencia pública. Según recueye la norma, va poder otorgase a persones muertes, siempre que l’espediente empiece primero de que pasen dos años de la fecha del decesu, y va dase “preferentemente” coincidiendo cola celebración del Día d’Asturies, el 8 de setiembre. La situación tan escepcional provocada anguaño pola pandemia del coronavirus retrasó l’aprobación del correspondiente alcuerdu del Conseyu de Gobiernu. El próximu 8 de setiembre va superase’l plazu llegal previstu pa la concesión de la medaya.



    Reclamación del IVA del exerciciu 2017

    El Gobiernu alcordó autorizar a la conseyera de Facienda a formular el requerimientu previu contra l’Alministración Xeneral del Estáu pa que s’adopten les midíes pertinentes cola mira de compensar al Principáu polos perxuicios económicos, directos y indirectos, derivaos del cambéu del sistema de xestión, liquidación y contabilización del IVA correspondiente al exerciciu 2017.

    Esti procedimientu quedó paralizáu tres de la declaración del estáu d’alarma. Agora, cola presentación inmediata del requerimientu pola conseyería, va dase un pasu más en defensa de los intereses d’Asturies, al reclamar unos recursos que-y correspuenden.

    El Principáu va siguir optando pola negociación y l’alcuerdu como vía preferente, pero ta dispuestu a usar tolos medios políticos, alministrativos y xudiciales al so algame pa obtener la mensualidá pendiente del IVA correspondiente al 2017, porque se trata d’unos fondos p’ameyorar los servicios públicos, impulsar la economía y, en resumíes cuentes, atender los intereses de la comunidá autónoma.



    Acciones pa la orientación profesional y l’autoempléu

    L’Executivu autorizó un gastu plurianual de 2,7 millones destináu a subvenciones p’acciones d’orientación profesional. Esta convocatoria va dexar atender a más de 11.000 paraos, a los que se-yos va brindar la posibilidá de realizar itinerarios personalizaos d’empléu.

    Xuntu col diseñu d’esos itinerarios, que van entender acciones individuales y grupales, va realizase un siguimientu individual, que va dexar afaer les actuaciones a la evolución de cada persona p’ameyorar les sos competencies y empleabilidá. Na so execución collaboren entidaes ensin ánimu d’arriquecimientu de toa Asturies, lo que dexa esaniciar cualquier discriminación por razón de residencia en núcleos rurales alloñaos del centru.

    Amás, nel programa rematáu nel mes de mayu pasáu, que se vio afectáu pol periodu de confinamientu, les entidaes siguieron dando apoyu a les persones desempleaes de forma telemática, una midida pervalorada polos participantes.

    La convocatoria nueva va volver desenvolvese a lo llargo de 24 meses, como yá asocedió cola de 2018-2020. D’esta manera, el Serviciu Públicu d’Empléu (Sepepa) ufierta más estabilidá nesti recursu pa la orientación llaboral, que complementa la xera realizada pol personal propio nes oficines d’empléu.

    Esta midida enmárcase na Estratexa Española d’Activación pal Empléu 2017-2020 como una ferramienta fundamental pa rebaxar el paru y los periodos de desempléu, amás de p’aumentar el grau de satisfacción de la ciudadanía colos servicios públicos d’empléu.



    Medio millón pa menguar riesgos llaborales

    El Conseyu de Gobiernu aprobó un gastu de 525.000 euros pa dar continuidá a la llinia d’ayudes empobinaes a menguar o eliminar riesgos llaborales cola meyora del parque de maquinaria y los equipos de trabayu.

    Les subvenciones cubren inversiones pa la renovación de máquines, equipos, instalaciones o otros elementos que dexen aumentar la seguranza na redolada llaboral. Estes ayudes, recoyíes nos alcuerdos de concertación hasta l’añu pasáu, intégrense nel plan +Prevención+Empresa. Dada la importancia de caltener los oxetivos d’esa iniciativa, el Principáu considera necesariu’l so caltenimientu.



    Ayudes p’amenorgar el consumu enerxéticu n’edificios

    El Gobiernu d’Asturies aprobó una partida de 7,3 millones que se va destinar a una convocatoria plurianual de subvenciones pa la rehabilitación enerxética d’edificios. Con estos fondos, la Conseyería de Derechos Sociales y Bienestar va sofitar actuaciones n’inmuebles que precisen sistemes más eficientes de consumu.

    Los fondos pártense en trés anualidaes: 2.937.052 euros nel 2021, 3.671.316 nel 2022 y 734.263, nel 2023.



    Ver en formatu orixinal (PDF : 182 Kb )
  3. 18 de septiembre de 2020
    Alcuerdos del Conseyu de Gobiernu: 17/09/2020

    • Esta iniciativa quier también concienciar sobre la importancia de la vacunación contra’l gripe, col envís de fomentar la inmunización entre profesionales y residentes
    • La modificación del reglamento del salario social permitirá agilizar las revisiones motivadas por trabajos temporales de los perceptores, que suponen el 20% de los expedientes pendientes
    • Cristina Vega Morán, nueva directora general de Planificación e Infraestructuras Educativas

    El Gobiernu del Principáu empecipió una ronda d'evaluación en toles residencies del organismu autónomu Establecimientos Residenciales pa Mayores d'Asturies (ERA) pa detectar posibles necesidaes derivaes de la pandemia de la covid-19. Esta iniciativa busca tamién concenciar sobre la importancia de la vacunación contra'l gripe, col propósitu de fomentar la inmunización na próxima campaña ente la plantiya y les persones residentes.

    La conseyera de Derechos Sociales y Bienestar, Melania Álvarez, informó güei al Conseyu de Gobiernu sobre esta midida, que yá se punxo en marcha y que quier reforzar, de cara a la seronda, la protección del colectivu de mayores, ún de los más vulnerables énte'l coronavirus.

    Hasta agora, la xerente del ERA, Ana Suárez, visitó los centros de Grau, El Cristu (Uviéu) y Clara Ferrer (Xixón) y mañana va siguir la ronda nel Centru Polivalente de Recursos de Llaviana.

    Esti periplu respuende al oxetivu del Gobiernu d'Asturies de conocer en fondura la situación de caúna de les residencies públiques, según les demandes de personal y usuarios. Col mesmu propósitu, dende'l fin del estáu d'alarma celebráronse xuntes periódiques con representantes de les families, de les direcciones de los centros y de los axentes sociales pa facilitar la so participación na xestión del sistema residencial y fortalecer la seguridá.



    Mayor axilidá nes revisiones del salariu social

    La Conseyería de Derechos Sociales va modificar el reglamentu del salariu social, una midida que va facer posible entainar coles revisiones motivaes pol empléu temporal de persones perceptores de la renta mínima.

    La proliferación de contrataciones temporales d'escasa duración, inclusive de menos d'una selmana, o de temporada, derivó nuna medría notable nes comunicaciones de variaciones o revisiones del salariu social. Gran parte d'elles nun traen finalmente un cambéu de la prestación, pero impliquen que, per una parte, les persones beneficiaries tengan que s’allegar al so centru municipal de servicios sociales cada vegada qu'empecipien o rematen una relación llaboral y, por otra, que l'Alministración empecipie les actuaciones revisores oportunes.

    Anguaño, 1.176 persones que cobren el salariu social tán a la espera de que s'analice'l so espediente por cuenta de variaciones por contratos de trabayu de duración inferior a seis meses, lo que representa'l 20% del total de revisiones pendientes. Nesti contestu, el cambéu aprobáu pola conseyería va facilitar que la revisión se faga una vegada al añu y va ufiertar mayor estabilidá a los beneficiarios, que van poder aceptar contratos temporales ensin tener que comunicalo cada vez que s'empecipien o rematen y ensin ver alteriáu'l cobru del salariu social, al regularizase la so situación va regularizase n’acabando l'añu natural.

    Esti cambéu enmárcase na sienda de simplificación alministrativa qu'entamó'l Principáu y ta na llínea del Decretu Llei 20/20, de 29 de mayu, pol que se regula l'ingresu mínimu vital, que toma como períodu de cómputu d'ingresos l'exerciciu anterior. El cambéu del decretu del salariu social atopar nel trámite de consulta pública.



    Relevu na Conseyería d'Educación

    El Gobiernu d'Asturies nomó directora xeneral de Planificación ya Infraestructures Educatives a Cristina Vega Morán. La nueva directora asume esta responsabilidá cola mano tendida a la comunidá educativa y coles mires de garantizar una enseñanza calidable pa tol alumnáu y faer de les aules el llugar de trabayu más seguru posible'l próximu cursu.

    Vega Morán (L.lena, 1969) ye diplomada pola Universidá d'Uviéu en Profesoráu de EGB cola especialidá de Pedagoxía Terapéutica y llicenciada en Filosofía y Ciencies de la Educación pola mesma institución académica. Tamién cursó'l Máster Universitariu en Tratamientu Educativu de la Diversidá na Universidá Nacional d'Educación a Distancia (UNED).

    Funcionaria de carrera del cuerpu de maestros pola especialidá de Pedagoxía Terapéutica, foi profesora dende 1997 en centros d'educación especial, colexos ya institutos del Principáu. Hasta agora, ocupaba la dirección del Colexu Públicu Santa Bárbara de Llugones, cargu qu'asumió en 2012.



    Conveniu con Siero pal plan d'ordenación d'escueles de 0 a 3

    El Conseyu de Gobiernu autorizó la firma d'un conveniu col Conceyu de Siero pal desenvolvimientu del plan d'ordenación de les escueles de primer ciclu d'Educación Infantil (0 a 3 años). La vixencia va ser de cuatro años y añalmente va roblase una adenda na que se va concretar la programación de cada cursu, según el so financiamientu.

    Amás, autorizóse la concesión de la subvención pa sufragar los gastos de funcionamientu del cursu escolar 2019-2020, por un importe de 365.789 euros, de los que 130.320 correspuenden col periodu de setiembre a avientu de 2019 y los 235.469 que queden, a los meses de xineru a agostu.

    Siero cunta anguaño con dos escueles infantiles: El Carmín, con trés aules y capacidá pa 78 neños y neñes, y La Mazana, con 4 aules y 114 places.



    Protección de les cueves asturianes

    La Conseyería de Cultura, Política Llingüística y Turismu, al traviés de la Dirección Xeneral de Cultura y Patrimoniu, autorizó la firma de convenios colos conceyos de Cangues d'Onís, Peñamellera Baxa y Candamo cola cuenta de caltener trés elementos emblemáticos del patrimoniu cultural asturianu: el dolme de Santa Cruz (Cangues d'Onís) y les cueves de La Peña (Candamo) y La Loja (Peñamellera Baxa).

    Estos convenios inclúin una subvención per parte del Gobiernu d'Asturies (3.900 euros per caúnu d'ellos) pal caltenimientu, l'apertura al públicu y l'espardimientu del monumentu neolíticu de Cangues d'Onís y los xacimientos de Candamo y Peñamellera Baxa, elementos d'induldable valor ya interés turísticu.

    Pela so parte, los conceyos van ocupase de la contratación del personal adecuáu pa los horarios y los plazos previstos, igual que del mantenimientu y llimpieza de los accesos.



    Ver en formatu orixinal (PDF : 175 Kb )
  4. 16 de septiembre de 2020
    Alcuerdos del Conseyu de Gobiernu: 03/09/2020

    • L’Executivu autoriza 21 millones pa la contratación de 565 docentes destinaos a los centros públicos
    • La llinia d’ayudes pa ONG con cargu al recuadru solidariu del IRPF aumenta un millón en comparanza col 2019 y algama los 5,5
    • El Principáu intensifica l’apueste pola movilidá sostenible y incentiva con hasta 5.500 euros la compra de coches eléctricos
    • L’Executivu va invertir 7,5 millones en trés obres de saniamientu y depuración d’agua en Llanes, Siero y Uviéu

    El Conseyu de Gobiernu autorizó güei un gastu de 16.160.716,14 euros pal nomamientu de personal temporal docente pa facer frente a les necesidaes derivaes de la covid-19 en centros públicos. A esti importe hai qu’añedir 5.042.143,44 euros en conceptu de costos sociales, lo que xube’l montu a 21.202.859,58 euros. En total, l’Executivu va dedicar esti cursu más de 40 millones a reforzar Educación pa facer frente a la covid.

    Los fondos que recibieron lluz verde pol Conseyu de Gobiernu van dexar contratar a 565 docentes nos centros públicos n’Educación Infantil y en tolos cursos de Primaria, amás de primeru y segundu de Secundaria y Educación Especial. Toes estes contrataciones formen parte del refuerzu estraordinariu anunciáu pol Gobiernu d’Asturies dientro de les polítiques entamaes pa encarar la pandemia.

    Na convocatoria vinientes de personal interino, que la conseyería va adelantar al vienres 11 de setiembre inclúyese la provisión de places n’Infantil y Primaria xeneraes de resultes del aumentu de grupos. Na convocatoria del día 22 van incluyise, ente otres, les places pa los grupos xeneraos en 1.u y 2.u d’Educación Secundaria.

    L’esfuerciu económicu va ser, sicasí, más altu que l’autorizáu esta tarde pol Executivu. Pa realizar les 865 contrataciones estraordinaries previstes -565 pa los centros públicos y lo demás pa los concertaos- van disponese más de 30 millones. A esa cantidá hai qu’añedir otres, rellacionaes colos costos sociales, la compra de material de protección, l’adecuación d’espacios, etcétera. El resultáu va superar los 40 millones. El total sobrepasa notablemente les ayudes estatales previstes (32,5 millones).

    L’oxetivu del Gobiernu del Principáu ye’l derechu a la educación cola mayor seguranza sanitaria posible. Pa eso, van estremase les rutines d’hixene y prevención en colexos y institutos p’aforrar riesgos. Alumnáu, profesoráu y families van tener a la so disposición formación y información, porque la concienciación, collaboración y responsabilidá de toes y toos va ser esencial.



    Sofitu a la iniciativa social

    El Principáu va dedicar 5,5 millones a la llinia d’ayudes pa les organizaciones non gubernamentales (ONG) d’iniciativa social, un presupuestu que supón un aumentu de más d’un millón en comparanza col añu pasáu. La convocatoria, financiada con cargu al 0,7 % del recuadru solidariu del Impuestu sobre la Renta de les Persones Físiques (IRPF), va publicase la selmana que vien. Esta iniciativa refuerza les midíes específiques destinaes a estes entidaes que cada añu programa la Conseyería de Derechos Sociales y Bienestar.

    En concreto, el Conseyu de Gobiernu autorizó una partida inicial de 4.466.519,00 euros pa financiar la convocatoria de subvenciones empobinaes a la realización de programes d’interés xeneral p’Asturies con cargu a l’asignación tributaria del Impuestu sobre la Renta de les Persones Físiques. Sicasí, la cantidá final va algamar los 5.503.659,94 euros, tal como se recueye nel alcuerdu del Conseyu Territorial de Servicios Sociales y del Sistema pa l’Autonomía y Atención a la Dependencia celebráu en xunu.

    La convocatoria del 2019 cuntó con 4.466.518,26 euros, colos que se financiaron 438 proyectos de 147 entidaes, qu’anguaño se tán desenvolviendo.

    Dende’l 2017, les autonomíes xestionen el 80 % de los fondos de la “x solidaria” -qu’enantes alministraba namás l’Estáu- en cumplimientu d’una sentencia del Tribunal Constitucional que valoró parcialmente la inconstitucionalidá del modelu anterior.

    Estes ayudes, que se financien coles aportaciones de los contribuyentes que marquen el recuadru de fines sociales na so declaración de la renta, van dirixíes a oenegués que desenvuelven programes de sofitu a la infancia, families, mocedá, colectivos de mayores, persones con discapacidá o en situación de vulnerabilidá y riesgu d’esclusión social. En concreto, la convocatoria subvenciona midíes d’atención integral, respaldu educativu o asistencia pal inxertamientu llaboral.



    Fomentu de la movilidá eficiente y sostenible

    El Gobiernu dio lluz verde a una partida de 2.068.929 euros cola que se va financiar la convocatoria del Plan Moves II, destináu a incentivar la compra de vehículos alternativos por empreses y particulares, la instalación d’infraestructures de recarga y la promoción de sistemes d’empréstamu de bicicletes eléctriques. El documentu tamién incluye ayudes al desenvolvimientu de planes de movilidá escontra los centros de trabayu y midíes de sofitu a los conceyos na implantación de midíes p’adaptar la movilidá urbana al escenariu nuevu deriváu de la covid-19.

    La segunda edición d’esti programa, que’l so financiamientu cuerre al cargu de la Alministración central y ye xestionada poles comunidaes autónomes, va tar en vigor anguaño y l’añu que vien, y dobla’l repartu de la primer convocatoria. Esti aumentu va d’alcuerdu cola medría del programa a nivel estatal, que pasa de 45 a 100 millones.

    Amás d’esta medría, incluye estes novedaes:


    • El plazu de presentación va ser d’un añu de magar se publique la convocatoria.
    • L’achatarramientu d’un vehículu vieyu yá nun va ser obligatoria, anque se si lleva a cabu l’ayuda pa la compra d’ún nuevu va ser mayor.
    • Énte la demanda xenerada, amplíase’l presupuestu máximu que pue dedicase a vehículos pesaos de gas.
    • Cola mira d’incentivar la sustitución del parque móvil por vehículos sostenibles, nun va haber qu’esperar a la publicación de la convocatoria de les ayudes pa tramitar la solicitú. Quier dicise, que va poder adquirise un vehículu eléctricu, híbridu, propulsáu por gas natural licuao (GNL) o hidróxenu, y solicitar depués l’ayuda.

    El Principáu va dedicar la mayor parte del presupuestu a promover la compra de vehículos de combustible alternativo y va intentase que la mayor parte de les ayudes puedan concedese esti mesmu añu. Les subvenciones varien a tenor de la motorización y categoría del vehículu:


    • Dende 600 euros pa cuadriciclos llixeros eléctricos hasta 15.000 pa la compra de camiones y autobuses eléctricos.
    • La subvención pa la compra de turismos eléctricos puen llegar hasta los 5.500 euros (con achatarramientu) y inclusive hasta los 6.000 (tamién con achatarramientu) nel casu de vehículos comerciales d’hasta 3.500 quilogramos.
    • Pa la instalación de puntos de recarga eléctrica, les ayudes van ser del 30 % o’l 40 % del costu subvencionable, según la clas de beneficiariu, con un tope de 100.000 euros.

    Asturies ye líder nacional en movilidá eléctrica: la primer comunidá en númberu de puntos de recarga, la quinta en penetración de vehículos d’estes característiques y la primera en carga rápida. Amás, la primer convocatoria del Moves recibió una gran acoyida y dexó executar tol presupuestu.



    Refuerzu de les polítiques d’igualdá y contra la violencia de xéneru

    L’Executivu autorizó la suscripción de 16 convenios de collaboración con otros tantos conceyos y mancomunidaes, dotaos en total con 1.101.535,5 euros pal caltenimientu y xestión de la rede de centros asesores de la muyer.

    Estos alcuerdos dexen destinar una subvención individual de 78.681 euros a los conceyos d’Uviéu, Xixón, Llangréu, Mieres, Valdés, Cangas del Narcea, Ayer, A Veiga, Llanes y Piloña y a les mancomunidadades de la Comarca de la Sidra y de les Cinco Villes. Amás, los conceyos d’Avilés, Llaviana y Teberga van recibir una ayuda de 39.341 euros, mentes que la subvención de Siero va ser de 39.340,50 euros.

    Estos centros ufierten asesoramientu xurídicu gratuitu, amás de dar asistencia especializada a muyeres víctimes de violencia machista.

    El compromisu del Principáu coles polítiques d’igualdá y cola llucha contra la violencia de xéneru reflexóse tamién na renovación, en xunetu, de los convenios de collaboración con seis conceyos pal caltenimientu de la Rede de Cases d’Acoyida, que’l Gobiernu asturianu financia con más d’un millón. Tamién en xunetu, l’Executivu dio’l preste a la concesión de 149.527,56 euros n’ayudes directes a muyeres víctimes de violencia de xéneru amás d’a fíes y fíos de víctimes mortales por violencia de xéneru. Estos fondos enmárquense nes midíes integrales de protección, atención y asistencia a les víctimes amás d’a les sos fíes y fíos, y tán financiaes con cargu al Pactu d’Estáu contra la Violencia de Xéneru.



    Obres de meyora del saniamientu

    El Gobiernu autorizó’l gastu y la contratación de trés obres de saniamientu y depuración d’agua nos conceyos de Llanes, Siero y Uviéu con una inversión global de 7.513.977 euros.

    Estes actuaciones, incluyíes nel plan de contratación p’anguaño de la Xunta de Saniamientu del Principáu, organismu dependiente de la Conseyería d’Alministración Autonómica, Mediu Ambiente y Cambéu Climáticu, son les siguientes:

    • Valmori y Posada (Llanes)

    Va acometese’l proyectu de colector d’incorporación del saniamientu de Valmori y Posada a la Estación Depuradora d’Agua Residual (EDAR) de San Xurde, en Llanes, con un plazu d’execución de 16 meses y una inversión plurianual de 2.293.184 euros. D’esta cantidá, 150.000 euros consígnense anguaño, 793.184 nel 2021 y 1.350.000 nel 2022. Les obres van consistir en conducir el vertíu d’agua residual de la población d’estos dos llugares a la EDAR de San Xurde coles mires d’optimizar la esplotación del sistema de depuración de la costa central de Llanes.

    • Ríu Nora (Siero)

    El proyectu d’ampliación de la capacidá del interceptor d’El Río Nora (Siero) cunta con un presupuestu de 2.454.285 euros, de los que 300.000 van invertise anguaño, 954.285 nel 2021 y 1.200.000 nel 2022. Esta actuación, que tien un plazu d’execución de 24 meses, rique la meyora de les instalaciones de la Estación de Bombéu d’Agua Residual (EBAR) de Bergueres y doblar un tramu del colector interceptor del Nora, cola mira d’aumentar la so capacidá hidráulica, faciendo posible desaguar el caudal d’agua residual xenerao en La Pola.

    • Polígonu del Espíritu Santu y La Venta’l Gallo (Uviéu y Siero)

    La meyora de bombeos dende’l polígonu del Espíritu Santu y La Venta’l Gallo, nos conceyos d’Uviéu y Siero, respectivamente, va tener un costu de 2.767.544 euros. El proyectu incluye obres de meyora de les instalaciones nes respectives EBAR p’aumentar la so capacidá hidráulica, anovar equipos obsoletos, optimizar la esplotación y cumplir la normativa ambiental. El presupuestu de les obres, que tienen un plazu d’execución de 24 meses, pártese en trés anualidaes: 233.500 euros nel 2020, 907.544 nel 2021 y 1.626.500 nel 2022.

    Toles actuaciones tán cofinanciaes pol Fondu Européu de Desenvolvimientu Rexonal (Feder).



    Convenios n’ámbitu educativu

    L’Executivu autorizó la celebración de dos convenios pola Conseyería d’Educación, el primeru d’ellos, col Ministeriu d’Educación y Formación Profesional, dirixíu a promocionar el pensamientu computacional en toles etapes educatives non universitaries al traviés del proyectu Escuela de pensamientu computacional y intelixencia artificial (Epcia), que coordina l’Institutu Nacional de Tecnoloxíes Educatives y Formación del Profesoráu (Intef).

    El segundu de los convenios, col Institutu d’Evaluación y Asesoramientu Educativu (IDEA), de la Fundación Santa María (FSM), va dexar conocer l’impactu que’l confinamientu pola pandemia tuvo tanto nel alumnáu como nel profesoráu. Con eso búscase orientar les respuestes de les autoridaes y de los centros con una ufierta educativa de calidá, afecha a les circunstancies d’educadores y educandos.



    Ver en formatu orixinal (PDF : 220 Kb )
  5. 10 de septiembre de 2020
    Alcuerdos del Conseyu de Gobiernu: 10/09/2020

    • Pela primer vez, el númberu de dependientes atendíos nel Principáu supera los 23.000
    • Derechos Sociales actualiza dos decretos pa qu’entaíne la tramitación y se simplifique’l reconocimientu de les ayudes
    • La media de solicitantes pendientes de prestación a 31 d’agostu yera del 13,73 %, cuasi cuatro puntos per debaxo de la nacional, del 17,42 %

    El Gobiernu d’Asturies aplicó yá les últimes midíes recoyíes nel plan de choque de Dependencia, diseñáu pola Conseyería de Derechos Sociales va agora un añu pa entainar cola tramitación d’esta prestación. La conseyera Melania Álvarez informó güei al Conseyu de Gobiernu d’estes midíes y confirmó que, n’agostu, la conseyería foi quién a amenorgar la llista d’espera en 498 espedientes, que se correspuenden con 222 valoraciones y 276 programes individualizaos d’atención (PIA).

    El compromisu del Principáu pa rebaxar los tiempos d’espera y entainar colos espedientes alministrativos nel sistema de dependencia refléxase en que la media de solicitantes pendientes de prestación, a 31 d’agostu, yera de 13,73 %, cuasi cuatro puntos per debaxo de la nacional (17,42 %). En cuantes al númberu de persones dependientes atendíes, aumentó n’agostu en 376, lo que supunxo que pela primer vez n’Asturies superen les 23.000.

    Esti plan de choque, que la so duración ye de dos años de magar entró en vigor, incluye delles actuaciones que se foron adoptando de forma progresiva. Desque aplicaes toles actuaciones organizatives y de refuerzu de medios personales y materiales, va ponese en marcha’l procesu de tresformación del Sistema de Dependencia n’Asturies. Pa eso, la conseyería empezó la tramitación de dos decretos pa unificar la normativa en materia de dependencia coles mires de simplificar y modificar la reconocencia y facer entainar la tramitación de les solicitúes.

    Tamién se va fomentar l’atención domiciliaria con dos prestaciones clave: l’asistente personal y la promoción de l’autonomía personal. Amás, los decretos van dexar dotar d’una mayor equidá’l costu de los servicios poles persones beneficiaries y va materializar el cambéu del modelu d’atención.

    La evolución de los datos de beneficiarios amuésase nesti cuadru:



    Representación institucional

    L’Executivu aprobó’l cese y nomamientu de dellos representantes del Principáu nel conseyu d’alministración de la sociedá mercantil Sedes S. A. Cesen nel cargu Juan Jose Adolfo Fernández Pereiro, Juan Ramón García Secades y Fermín Bravo Lastra. Los representantes nuevos van ser María del Mar Salgado, directora xeneral de Finances y Economía, Fermín Bravo Lastra, director xeneral de Vivienda, y María Montes, xerente de Vipasa.



    Ver en formatu orixinal (PDF : 198 Kb )

Buscar mas acuerdos

Buscar
Desde
/
/
Hasta
/
/

Información sobre el documento

© Copyright 2006. Gobiernu del Principau d'Asturies