Gobiernu del Principau d'Asturies

Asturies, muncho más cerca

Tas en

Asturias.es Gobiernu Acuerdos del Conseyu de Gobiernu
 

Acuerdos del Conseyu de Gobiernu

  1. agosto
  2. 8 de agosto de 2018
    Alcuerdos del Conseyu de Gobiernu: 08/08/2018

       - El Gobiernu d'Asturies invierte un millón na renovación d’ecógrafos y ecocardiógrafos de siete árees sanitaries

       - El Sespa va adquirir 15 equipos pa hospitales que permitan llograr imágenes de mayor calidá por aciu procesos menos invasivos y que van contribuyir a amenorgar costos

       - El Principáu dedica 600.000 euros a les unidaes de sofitu a los trabayadores con discapacidá de los centros especiales d'empléu

       - L'Executivu va invertir más de 443.000 euros nel arreglu de 16 viviendes públiques vacantes en Llangréu

    El Gobiernu d'Asturies autorizó güei un gastu de 1.140.000 euros pa l'alquisición de 15 ecocardiógrafos y ecógrafos destinaos a distintos servicios hospitalarios de radioloxía de siete árees sanitaries. En concreto, 532.400 euros van dedicase a la compra de 7 ecocardiógrafos y otros 608.000 van sirvir p’adquirir 8 ecógrafos: cinco para radioloxía xeneral, ún pa patoloxía mamaria y dos para radioloxía pediátrica.

    Los siete ecocardiógrafos van distribuirse de la siguiente manera: dos pal área d'Uviéu y unu para caúna de les d'Avilés, Xixón, Les Arriondes, Mieres y Llangréu. Los ecógrafos van ser pa los hospitales de Cangas, Uviéu, Xixón y Mieres.

    Esta decisión permite avanzar na renovación tecnolóxica de los servicios de radioloxía del Serviciu de Salú del Principáu (Sespa). D'esta miente, van sustituyise equipos obsoletos y va ameyorase la calidá y sensibilidá diagnóstica de los estudios que se realicen.

    Los nuevos aparatos van permitir llograr imáxenes de mayor detalle con procesos menos invasivos, polo que la inversión va redundar n'una mayor eficacia y va contribuyir al amenorgamientu de costos.

     

    Respaldu a la integración llaboral de persones con discapacidá

    El Principáu va destinar 600.000 euros a sofitar el llabor de les unidaes de sofitu a l'actividá de el trabayadores con discapacidá de los centros especiales d'empléu. Estes unidaes tán formaes por distintos profesionales qu'ayuden a les persones con discapacidá a superar dificultaes nel procesu d'incorporación y permanencia na redolada llaboral.

    Esta midida va permitir conceder una ayuda de 1.200 euros añales por cada emplegáu con discapacidá atendíu, siempre qu'esti tenga un contratu llaboral superior a seis meses o de calter indefiníu col centru especial.

    Na última convocatoria atendiéronse les solicitúes de nueve empreses, con un volume de plantiya de 233 persones, y de dos entidaes ensin ánimu d'arriquecimientu con 65 emplegaos.

     

    Arreglu de pisos en Ciañu

    L'Executivu dio lluz verde a un gastu de 443.133 euros para contratar l'arreglu de 16 viviendes vacantes en Llangréu, concretamente en Ciañu, una d'elles nel centru de la localidá y otres 15 nel barriu de Samuño.

    L'actuación, que cunta con un plazu d'execución de trés meses, va consistir nel arreglu integral de les viviendes, qu'inclúi la renovación de les instalaciones eléctriques y d'agua, cambéu de suelos, carpintería de ventanes y puertes, pintura y azulexos, según la sustitución d'equipos hixénicos y de cocina.

    La contratación plantega dellos criterios d'axudicación, polo que se van valorar, ente otros, aspeutos rellacionaos cola calidá, el procesu constructivu, la organización de los trabayos, los controles sobro les unidaes d'obra y los medios personales.

     

    2,1 millones pal suministru de gas natural en centros del ERA

    El Conseyu de Gobiernu dio lluz verde a un gastu tresañal de 2.135.663 euros pa contratar, per un plazu de dos años, el suministru de gas natural de los 21 centros adscritos al organismu autónomu Establecimientos Residenciales p’Ancianos d'Asturies (ERA) y de la sede central del organismu.

     

    224.532 euros pa la segunda fase de los Xuegos Deportivos

    L'Executivu aprobó un gastu de 224.532 euros pa emprestar sofitu a la organización de la segunda fase de los Xuegos Deportivos del Principáu y los Xuegos de Deporte Adaptáu d'anguaño. Les ayudes que se conceden a conceyos, patronatos, fundaciones deportives municipales y mancomunidaes distribuyir de la siguiente forma:

    :

       - Fundación Deportiva Municipal d’Avilés: 33.444 euros.

       - Patronatu Municipal de Deportes de Mieres: 15.819 euros.

       - Patronatu Deportivu Municipal de Siero: 13.816 euros.

       - Conceyu de Ribeseya: 24.964 euros.

       - Conceyu de Grau: 5.641 euros.

       - Conceyu Cangas del Narcea: 27.840 euros.

       - Conceyu de Valdés: 7.166 euros.

       - Conceyu d’A Veiga : 4.895 euros.

       - PatronatuDeportivu Municipal de Xixón: 28.795 euros.

       - Conceyu de Carreño: 2.246 euros.

       - Mancomunidá del Valle del Nalón: 12.696 euros.

       - Conceyu d’Uviéu: 47.205 euros.

     

    Cesión d’inmuebles pa usos municipales

    El Conseyu de Gobiernu alcordó la cesión de dos inmuebles pa usos municipales en Villaviciosa y Peñamellera Baxa. Asina, cedió al Conceyu de Villaviciosa, por un plazu de diez años, parte del edificiu de l'antigua escuela d'agricultura, que yá alluga anguaño la oficina comarcal de la Conseyería de Desarrollu Rural. L'espaciu tien una superficie de 786 metros cuadraos, 10 na planta baxa y 686 na primera. La intención del consistoriu ye destinalo a la puesta en marcha d'un viveru d'empreses agroalimentaries y centru de servicios pal sector primariu.

    Pela so parte, el Conceyu de Peñamellera Baxa va recibir, per una década, un local de 228 metros, allugáu na planta baxa d'un edificiu de viviendes de protección oficial de Panes, p’actividaes sociales y culturales.

     

    Aprobáu'l decretu que regula los establecimientos d'ortopedia

    L'Executivu aprobó'ldecretu que regula los requisitos y procedimientos d'autorización sanitaria pal funcionamientu ya inspección de los establecimientos d'ortopedia. La normativa refuerza'l control y vixilancia d'esta actividá, ameyora la protección de la salú y garantiza unes condiciones afayadices na prestación del serviciu.

    El decretu, que va afectar a tolos establecimientos qu'espachen productos como prótesis o órtesis, recueye los requisitos mínimos esixíos relativos al local, la cualificación del personal y l'equipamientu. Tamién plantega la creación del Rexistru d'Establecimientos d'Ortopedia del Principáu, que va ser l'órganu encargáu de xestionar procedimientos rellacionaos col cambéu, renovación, revocación o zarru d'estes instalaciones. Los locales d'ortopedia que yá funcionen con autorización van disponer d'un añu, a cuntar dende la entrada a valir de la norma, p’adaptase a los nuevos requisitos.

     

    Renovación del conveniu de collaboración cola Selmana Negra

    La Conseyería d'Educación y Cultura va suscribir un añu más el conveniu de collaboración cola Selmana Negra, atendiendo a unu de los oxetivos prioritarios de la política del Gobiernu na so vocación d'espublizar, promocionar y protexer la realidá cultural asturiana. L'Executivu va apurrir a la entidá organizadora 13.646 euros col fin de sofitar la financiación d'una de les cites culturales más prestixoses.

     

    El Conseyu de Gobiernu concede la Medaya d’Oru d’Asturies a los descubridores d’El Pozu’l Ramu y a los centros asturianos centenarios

     

    -   Diego Canga Fano, Jesús María Otero Hernández, l’Hospital Universitariu de Cabueñes, la Federación de Cofraderíes de Marineros y la Sociedá de Pescadores Las Mestas del Narcea van recibir anguaño les distinciones de plata

     

    El Conseyu de Gobiernu alcordó conceder anguaño siete Medayes d’Asturies, dos na so categoría d’oru a los descubridores de la cueva d’El Pozu’l Ramu y a los centros asturianos centenarios, y les demás, de plata, a Diego Canga Fano, Jesús María Otero Hernández –a títulu póstumu-, l’Hospital Universitariu de Cabueñes, la Federación de Cofraderíes de Marineros del Principáu y a la Sociedá de Pescadores Las Mestas del Narcea.

    La Medaya d’Asturies acútase, según la Llei Reguladora d’Honores y Distinciones del Principáu, pa premiar méritos bramente singulares que tengan persones o instituciones que la so importancia y trescendencia pa los intereses xenerales de la comunidá autónoma los faigan acreedores d’esa distinción.

    Lo que sigue ye una reseña curtia de les instituciones y persones distinguíes.

     

    Descubridores de la cueva d’El Pozu’l Ramu

     

    Los descubridores de la cueva d’El Pozu’l Ramu van recibir la Medaya d’Oru d’Asturies nel 50 aniversariu del so descubrimientu por favorecer la conocencia pública d’ún de los xacimientos d’arte rupestre más relevantes d’Europa, convertíu güei n’enclave de referencia internacional pol so conxuntu artísticu únicu.

    Los mozos qu’integraron el grupu qu’afayó la cueva’l 11 d’abril de 1968 son Ruperto Álvarez Romero, Eloísa Fernández Bustillo, Jesús Manuel Fernández Malvárez, Pilar González Salas, Adolfo Inda Sanjuán, Amparo Izquierdo Vallina, María Pía Posada Miranda, Elías Pedro Ramos Cabrero, Celestino Fernández Bustillo y Fernando López Marcos; estos dos últimos, yá finaos.

    La crónica del descubrimientu parte de la intención de dellos mozos del grupu de monte Torreblanca de realizar una prospección de cueves a primeros de 1968. Asina, programaron pa Selmana Santa la espedición espeleolóxica na que se produció’l descubrimientu. La noticia tuvo una progresión esponencial hasta llegar a los medios internacionales más prestixosos y la valoración de les manifestaciones rupestres d’El Pozu’l Ramu llogró dende’l principiu la máxima consideranza.

    La muerte prematura de Celestino Fernández Bustillo, Tito Bustillo, nun accidente de monte poques selmanes depués del descubrimientu, favoreció que se punxera’l so nome a la cueva.

    La repercusión d’esti acontecimientu a lo llargo de les postreres cinco décades ye d’una magnitú equiparable al valor artísticu y al potencial turísticu del enclave. La cueva foi protexida en 1970, declarada Bien d’Interés Cultural (BIC) en 1985, y depués, nel 2007, tamién la so  redolada. Dende’l 2008, ta incluyida na Llista de Patrimoniu Mundial xunto a les demás cueves d’arte rupestre cantábricu, ente elles, delles asturianes: La Peña, en Candamu; Llonín, n’El Valle Altu de Peñamellera; La Covaciella, en Cabrales, y El Pindal, en Ribadeva.

    El Gobiernu d’Asturies inauguró nel 2011 el Centru d’Arte Rupestre Tito Bustilloo, promovíu énte la necesidá de caltener l’equilibriu medioambiental de la cueva y pola dificultá d’accesu a la mayoría de los conxuntos artísticos. Nel centru puen apreciase güei tolos secretos del xacimientu.

    El descubrimientu d’aquellos nuevos montañeros aficionaos a la espeleoloxía ye, mediu sieglu depués, ún de los finxos del arte rupestre universal, amás d’una potente referencia identitaria del oriente d’Asturies. Ello ye que Tito Bustillo convirtióse nun gran centru d’atracción turística, con  43.293 visitantes y 68.767 usuarios nel 2017.

     

    Centros asturianos centenarios

     

    El Conseyu de Gobiernu tamién decidió conceder la Medaya d’Oru d’Asturies a los centros asturianos centenarios pola so importancia histórica, el so llabor fundamental de sofitu a la emigración y la so vocación solidaria tan estraordinaria. Tamién por siguir cola tresmisión de valores que faen úniques a les colectividaes del Principáu en tol mundu.

    Con esta decisión, el Gobiernu rinde homenaxe al Centro Asturiano de México, Centro Asturiano de Mendoza, Centro Juventud Asturiana de Siero y Noreña en Buenos Aires, Asociación Civil Unión y Progreso Social y Recreativa Residentes del Concejo de Degaña na República Arxentina, Sociedaes, Clubes y Uniones de L’Habana, Centro Asturiano de Buenos Aires, Centro Asturiano de Mar de la Plata, Centro Asturiano Casa de Asturias del Uruguái, Centro Asturiano de Santa Fe, Centro Asturiano de Rosario, Centro Asturiano de Tampa y Centro Asturiano de Madrid.

    Los movimientos migratorios formen parte indixebrable de la historia del Principáu. La necesidá d’emigrar por razones económiques, sociales o pola falta de llibertaes llevó a miles d’asturianos a abandonar el so llugar de nacencia. De resultes, nel postrer cuartu del sieglu XIX surdieron organizaciones, asociaciones y comunidaes d’emigrantes que se constituyeron n’espacios emblemáticos pal alcuentru, l’acoyida y la integración nos llugares de llegada. Ayudaron a amortiguar el choque cultural y apurrieron seguranza pa cubrir les necesidaes afectives y culturales y económiques de los emigrantes.

    Dende la so puesta en marcha va más d’un sieglu, estes entidaes cumplieron una función doble: la de caltener la identidá de quien emigren y la de promover la so integración nes sociedaes d’acoyida. Los centros y cases d’Asturies propunxéronse tamién impulsar una rede de conocencia y ameyorar les condiciones de vida de quien quedaron nel Principáu. Asina, crearon y ameyoraron munches obres públiques de saniamientu, trayida d’agua y espacios comunes na mayoría de los conceyos. Gran parte d’eses sociedaes realizaron intervenciones educatives y participaron na construcción de más de 388 escueles.

    Na actualidá, más d’un centenar d’asociaciones, centros y cases d’Asturies permanecen activos. La so contribución al espardimientu y preservación de la cultura, los valores, la historia y el patrimoniu rexonal ye digna de reconocencia. Constituyen un puntu d’alcuentru pa la nueva emigración y desempeñen un papel esencial como embaxadores de la comunidá autónoma en tol mundu.

     

    Diego Canga Fano

     

    Diego Canga Fano recibe’l gallardón en reconocencia a la so trayectoria personal y profesional, inspirada nos valores fundacionales de la Unión Europea (UE), na que desenvolvió la so carrera, y nel serviciu a la ciudadanía. La distinción reconoz el so talante integrador y la so defensa firme de los intereses d’Asturies en tolos cargos qu’ocupó, lo que lu llevó a implicase personalmente pa evitar zarrar multinacionales asitiaes nel Principáu.

    Nacíu n’Uviéu en 1964, ye llicenciáu en Derechu pola Universidá d’Uviéu y cuenta cola llicenciatura en Derechu Especial d’Asuntos Europeos pola Universidá Llibre de Bruseles y col certificáu en Derechu Inglés de la Universidá de Cambridge. Amás, ye autor de delles publicaciones sobre asuntos europeos.

    Dende la so incorporación como funcionariu de la UE en 1991, desenvolvió’l so llabor profesional nes principales instituciones europees: Conseyu, Comisión y Parllamentu. Asina, desempeñó dellos cargos, ente los que destaquen el d’alministrador principal la Dirección Xeneral de Política Social, asistente del director xeneral del Serviciu Xurídicu del Conseyu, axuntu del gabinete de la vicepresidenta de la Comisión Europea, representante del Conseyu énte’l Tribunal Européu de Xusticia y el Tribunal de primer Instancia de Luxemburgo, presidente de la xunta de selección de concursos p’alministradores de la UE, xefe del gabinete del vicepresidente de la Comisión Europea; responsable d’Industria y Empreses, y director de Rellaciones Multillaterales y Calidá na na Dirección Xeneral d’Agricultura. Dende febreru del 2017 exerce como xefe del gabinete del presidente del Parllamentu Européu, Antonio Tajani.

    Diego Canga foi fai más de diez años ún de los impulsores de l’asociación Compromiso Asturias XXI, de la que ye miembru fundador. Organización creada por iniciativa de la sociedá civil, independiente y ensin ánimu d’arriquecimientu, busca l’interés y el progresu d’Asturies. El so oxetivu ye buscar víes pa que los emigrantes apurran un retornu de conocimientu y esperiencia al Principáu.

     

    Jesús María Otero Hernández

     

    El médicu intensivista Jesús María Otero Hernández (1947-2018), más conocíu como Chus Otero, recibe la Medaya de Plata, a títulu póstumu, pol so llabor tan valiosu mientres a lo llargo de más de trés décades como coordinador de tresplantes del Principáu.

    Nacíu en Zaragoza y xubiláu nel 2017 depués de 45 años n’activo, lideró unes 1.300 conversaciones con families pa propone-yos la posibilidá de donar órganos depués de perder a dalgún ser queríu. Él punxo en marcha tolos programes de donación que funcionen anguaño n’Asturies y gracies a la so xera tan fructífera la comunidá caltúvose siempre a la cabeza del país en tases de donantes por millón d’habitantes.

    El doctor Otero trabayó siempre en collaboración con Rafael Matesanz, impulsor de la Organización Nacional de Tresplantes (ONT), una entidá que ye líder mundial en tresplante d’órganos y que nel 2010 foi gallardonada col Premiu Príncipe d’Asturies de Cooperación Internacional.

    El fallecimientu de Chus Oteru’l mes de marzu pasáu producióse’l mesmu añu nel que la sanidá asturiana conmemora’l 35.u aniversariu del primer tresplante renal, el ventésimu novenu del tresplante cardiacu y los 500 tresplantes hepáticos, númberos que confirmen l’éxitu de los programes qu’impulsó xunto al so equipu.

     

    Cabueñes Hospital Universitariu

     

    L’Hospital Universitariu de Cabueñes recibe’l gallardón, na so categoría de plata, l’añu en que celebra’l so cincuentenariu como institución vinculada íntimamente al progresu de la ciudá de Xixón y historia viva de los cambeos tan fondos que se producieron na asistencia sanitaria asturiana dende 1968. 

    El centru, que cunta con una plantiya de 2.455 profesionales, rexistró nel 2017 más de 435.000 consultes esternes, superó les 8.000 intervenciones y llevó a cabu más de 7.000 procedimientos ensin falta d’ingresu. Amás, atendió a 389 persones n’hospitalización en casa.

    La Residencia Sanitaria del Doctor Gómez Sabugo, aniciu del hospital actual, empezó a funcionar el 7 d’agostu de 1968 nun edificiu de cuatro plantes con 216 cames y cuatro quirófanos. A los servicios qu’ufiertaba de mano, los de Obstetricia y Xinecoloxía, sumáronse nel primer añu los de Pediatría, Medicina Interna y Radioloxía. En 1972 empezó la construcción del segundu bloque, el d’hospitalización, con ocho plantes y capacidá pa 400 cames.

    Dende entós, el centru sanitariu esperimentó grandes cambeos, ente los que destaca la reforma integral de 1993, que costó entós 3.000 millones de pesetes, y foi incorporando pasu ente pasu servicios nuevos pa ufiertar agora una asistencia integral a la población de Xixón y Villaviciosa.

    Nesi compromisu enmárcase la próxima ampliación del hospital, un proyectu presupuestáu en 104 millones que va dexar ganar 119.411 metros cuadraos, el doble del espaciu actual ocupáu.

     

    Federación de Cofraderíes de Marineros del Principáu

     

    La Federación de Cofraderíes de Marineros del Principáu d’Asturies recibe la distinción pola so contribución al caltenimientu de l’actividá pesquera, de gran trescendencia pa los conceyos costeros y el so sector turísticu y hosteleru, nun momentu difícil pa los profesionales poles restricciones nes captures y unes cuotes partíes asimétricamente ente comunidaes.

    L’estancamientu o amenorgamientu nes captures de resultes de la baxada de la cuotes xúntase al descensu del valor económicu del pexe en primer venta y, simultáneamente, al aumentu de gastos variables como lubricantes, carnada, artes y apareyos. Estes circunstancies, comunes a tola flota española, afecten principalmente a les d’escala pequeña, como l’asturiana, especializada na pesca de baxura (costera y artesanal), na qu’el 72 % de les embarcaciones tán censaes n’artes menores.

    L’actividá pesquera sofita a un sector mayorista constituyíu por mediu centenar d’empreses y munches industries auxiliares, de la qu’ayuda a la pervivencia de valores sociales y culturales vinculaos íntimamente a Asturies.

    La continuidá del treme social y económico que conformen les tripulaciones, los mayoristes y minoristes de pescáu, les rederes y empleaos de talleres, los trabayadores de suministros d’efectos navales y les conserveres ye irrenunciable, porque d’ella depende en gran midida’l progresu de les localidaes costeres. Nesti sentíu, el llabor de la federación, que dende 1980 axunta y coordina les cofraderíes asturianes, resulta fundamental pa garantizar la supervivencia del sector.

     

    Sociedá de Pescadores Las Mestas del Narcea

     

    La Sociedá de Pescadores Las Mestas del Narcea, una asociación ensin ánimu d’arriquecimientu fundada en 1994 por un grupu de pescadores riberanos, nació coles mires de caltener l’ecosistema fluvial de la conca del Narcea, amás de la fauna vertebrada y invertebrada d’esta contorna.

    La entidá, que cunta con alredor d’un millar d’asociaos, xestiona tamién un centru ictioxénico asitiáu en Quintana (Pravia), con capacidá pa criar hasta dos millones d’esguinos de salmón y trucha. Los socios realicen un esfuerciu importante pa repoblar con estes especies tanto’l Narcea como otros ríos del Principáu pente medies del Proyectu Arca.

    El so esfuerciu y ilusión por implicar a los pescadores tradicionales na repoblación del ríu Narcea, la so defensa singular del mediu ambiente y la so llucha por caltener l’hábitat riberanu merecen güei la reconocencia del Gobiernu d’Asturies.

     

Buscar mas acuerdos

Buscar
Desde
/
/
Hasta
/
/

Información sobre el documento

© Copyright 2006. Gobiernu del Principau d'Asturies