Gobiernu del Principau d'Asturies

Asturies, muncho más cerca

Tas en

Asturias.es Gobiernu Acuerdos del Conseyu de Gobiernu
 

Acuerdos del Conseyu de Gobiernu

  1. diciembre
  2. 12 de diciembre de 2019
    Alcuerdos del Conseyu de Gobiernu: 12/12/2019
    • L’ampliación va dexar atender les 75 solicitúes presentaes anguaño, que sumen una inversión de 12 millones
    • L’Executivu aumenta en más de 188.000 euros les aportaciones pa les escueles de 0 a 3 d’Uviéu, Xixón, Llangréu, L.lena, Corvera y Piloña
    • Un conveniu cola Diputación de Llión va promocionar les cuatro estaciones ivernales de dambes comunidaes

    El Conseyu de Gobiernu aprobó güei una ampliación de 600.000 euros de les ayudes pa pymes que realicen inversiones empresariales. Con esta xubida, les subvenciones van algamar una cuantía de 1,6 millones que va dexar atender les solicitúes presentaes nesti exerciciu, un total de 75, que sumen una inversión global de 12.877.193 euros.

    Esta llinia de sofitu, que se xestiona al traviés del Institutu de Desenvolvimientu Económicu del Principáu d’Asturies (Idepa), va dirixida a financiar, a fondu perdíu, proyectos d’inversión de 30.000 a 500.000 euros. Ente los sos beneficiarios potenciales destaquen el sector industrial y servicios industriales a les empreses (inxeniería, diseñu, asistencia técnica...); catering pa centros de gran consumu; plataformes loxístiques; llaboratorios d’ensayu de productos; servicios destinaos al desenvolvimientu de la sociedá de la información, la innovación y les tecnoloxíes nueves; envasáu y embalaxes especiales; valorización de materiales (separación y clasificación); reciclaxe, y dellos proyectos d’actividaes turístiques.

    Con esta partida foméntase la creación d’empreses nueves como componente estructurador del texíu productivo. Tamién se promueven actuaciones que favorezan la diversificación empresarial y s’impulsen los sectores industriales non tradicionales, especialmente los nuevos, intensivos en conocimientu y xeneradores de mayor valor añedíu y empléu cualificáu. Al empar, facilítase la converxencia coles rexones desenvueltes y dinámiques de la UE.

    D’alcuerdu cola convocatoria aprobada, los márxenes subvencionables tán nestos porcentaxes: entamadores (40 %); microempreses (30 %); empreses pequeñes (20 %); empreses medianes (10 %). Nel 2018 y al traviés d’esta llinia, concediéronse 2,28 millones de subvención a 63 proyectos empresariales pa la realización d’inversiones por importe de 9,58 millones. Estes dexaron crear 571 empleos y caltener 46 puestos de trabayu.



    Ayuda adicional pa la educación infantil

    L’Executivu autorizó un aumentu de 188.100 euros nes subvenciones concedíes a los Conceyos de Corvera (42.206 euros), Xixón (30.636), Llangréu (37.832), L.lena (43.138), Uviéu (19.865) y Piloña (14.423) pa cofinanciar el costu de les escueles del primer ciclu d’educación infantil de 0 a 3 años correspondiente al exerciciu del 2019. Esta medría respuende al aumentu del alumnáu y/o de les aules nestos conceyos, lo que xustifica la necesidá de xubir tamién les subvenciones previstes pal cursu 2018/2019.

    El Gobiernu del Principáu punxo en marcha nel 2002 esta rede pública d’escueles infantiles pa neños. A partir d’esi añu, la Conseyería d’Educación soscribió convenios con 43 conceyos pa desenvolver el Plan d’Ordenación d’Escueles del Primer Ciclu d’Educación Infantil. Anguaño, existen 69 escueles onde tán matriculaos más de 3.500 alumnos, el 72 % d’ellos con bonificaciones.

    Amás de presentar ventayes académiques, esta escolarización temprana busca facilitar la conciliación de la vida llaboral y familiar cola creación d’una rede de centros sofitada económicamente pola conseyería y xestionada polos conceyos.

    La llista de conceyos con escueles infantiles ye esta: Ayer, Avilés, Bimenes, Candamu, Cangas del Narcea, Cangues d’Onís, Carreño, Castrillón, Castropol, Cuaña, Colunga, Corvera, Cuideiru, El Franco, Xixón, Gozón, Grau, Llangréu, Llaviana, L.lena, Llanera, Llanes, Mieres, Morcín, Nava, Navia, Noreña, Uviéu, Piloña, Pravia, Proaza, Ribeseya, Salas, Samartín del Rei Aurelio, Siero, Sobrescobiu, Taramundi, Teberga, Tinéu, Valdés, A Veiga, Vilanova d’Ozcos y Villaviciosa.



    Alcuerdu pa fomentar l’esquí

    El Conseyu de Gobiernu aprobó un conveniu cola Diputación Provincial de Llión pa potenciar la movilidá d’esquiadores y la llegada de visitantes poles cuatro estaciones ivernales que dependen de dambes comunidaes.

    L’alcuerdu, vixente pa la temporada 2019-2020, soscríbenlu la Conseyería de Cultura, Política Llingüística y Turismu y la Diputación Provincial de Llión.

    El conveniu incluye les estaciones asturianes de Valgrande-Payares y Fontes d’Iviernu y les llioneses de San Isidro y Valle de L.laciana-L.leitariegos. Va favorecer a los usuarios abonaos en cualquiera d’elles con descuentos nos forfaits diarios nes otres trés instalaciones.

    Tamién va poder adquirise un forfait especial, denomináu Cuatro Estaciones, pa quien quiera esquiar nes distintes estaciones y en distintos díes con un únicu abonu.



    Premios Xugamos pola igualdá. Non al machismu 2019

    El Conseyu de Gobiernu dio’l prste a la concesión de los premios estraordinarios 2019 Xugamos pola igualdá. Non al machismu, otorgaos conforme a los sos méritos a les muyeres deportistes, entrenadores y árbitros d’altu rindimientu del Principáu d’Asturies.

    Los 80.000 euros presupuestaos pa la concesión d’estos gallardones repartiéronse en función de la so categoría mundial, europea o nacional na que se llogró’l resultáu deportivu. Concretamente, 14 muyeres algamaron la condición d’altu rindimientu en campeonatos d’Europa, 40 en campeonatos nacionales y 10 por tar desenvolviendo la so preparación nun Centru de Tecnificación Deportiva o nun Centru d’Altu Rindimientu.

    Los premios enmárquense nel empeñu del Gobiernu asturianu por fomentar la llucha contra la violencia de xéneru nel deporte.



    III Lliga pa fomentar el debate en Secundaria

    L’Executivu autorizó la celebración d’un conveniu de collaboración ente la Conseyería d’Educación y la Xunta Xeneral del Principáu pa reeditar nesti cursu 2019/2020 el programa Lliga de Debate, que se desenvolvió pela primer vez nel 2017. La iniciativa fomenta nel alumnáu de los centros d’Educación Secundaria procesos d’aprendimientu y discutiniu rellacionaos coles práctiques de diálogu, contraste y resolución d’alcuerdos y desalcuerdos, propios de la función parllamentaria, organizándose baxo la forma competitiva d’una Lliga de Debate.

    Depués de les fases territoriales, que se van realizar en dellos centros educativos y de profesoráu y recursos (CPR), la eliminatoria final va celebrase ente mayu y xunu na propia Xunta Xeneral y va retresmitise en streaming nes webs institucionales de la conseyería y del Parllamentu.

    La Cámara autonómica va financiar l’actividá con un máximu de 14.000 euros, a los que se van sumar los premios a los centros educativos ganadores de caúna de les categoríes de la fase rexonal, que van consistir n’actividaes culturales que nun van poder pasar los 7.000 euros. Na II edición d’esta lliga, celebrada’l cursu pasáu, participaron 24 centros. L’equipu del Institutu d’Enseñanza Secundaria (IES) Cristo del Socorro de Lluanco resultó ganador de la final nacional.



    Patrimoniu cultural

    El Gobiernu, al traviés de la Conseyería de Cultura, Política Llingüística y Turismu, dio lluz verde a la firma de convenios colos Conceyos de Cangues d’Onís, El Valle Baju de Peñamellera y Candamu pa caltener trés elementos emblemáticos del patrimoniu cultural asturianu.

    En virtú de los convenios, la Dirección Xeneral de Cultura y Patrimoniu va financiar los llabores de caltenimientu, apertura al públicu y difusión del Dolme de Santa Cruz (Cangues d’Onís) y les cueves de La Peña (Candamu) y La Loja (El Valle Baju de Peñamellera), con 3.900 euros pa caún de los elementos. L’alcuerdu obliga al Gobiernu a sufragar los gastos derivaos del caltenimientu y apertura al públicu, y, a los consistorios, a la contratación del personal necesario pa los horarios y los plazos previstos, y el pertinente caltenimientu y llimpieza de los accesos.



    20.000 euros pa la xestión del castru d’El Chao Samartín

    El Principáu tamién autorizó la soscripción d’un conveniu col Conceyu de Grandas de Salime pal caltenimientu, apertura al públicu y difusión del castru d’El Chao Samartín y del so centru d’interpretación. L’Executivu va destinar 20.000 euros a costiar parte de los gastos de contratación de guíes especializaos y a ayudar a una xestión afayadiza del xacimientu y el so centru d’interpretación.

    El conveniu compromete al Conceyu de Grandas de Salime a disponer del personal necesario, garantizar el funcionamientu correctu de les instalaciones vinculaes a El Chao Samartín y el caltenimientu correctu del castru y de los bienes depositaos nel so centru d’interpretación.



    Ver en formatu orixinal (PDF : 182 Kb )
  3. 5 de diciembre de 2019
    Alcuerdos del Conseyu de Gobiernu: 05/12/2019
    • El Gobiernu d'Asturies reclama que se tomen midíes inmediates pa favorecer l'afitamientu de la industria
    • L'Executivu destina 7,3 millones a les campañes de saniamientu ganaderu y a diverses ayudes a profesionales del sector
    • Conveniu con Defensa pa que la Unidá Militar d'Emerxencies, Bomberos d'Asturies, 112 Asturies y Protección Civil realicen intervenciones conxuntes

    El Conseyu de Gobiernu alcordó güei dirixise formalmente al Executivu estatal para solicita-y qu'aumente les compensaciones por emisiones de dióxidu de carbonu, según l'aprobación inmediata del Estatutu pa les Empreses Electrointensives.

    El titular d'Industria, Enrique Fernández, informó al Conseyu de Gobiernu de la situación y perspectives del sector industrial depués de que se conocieren les condiciones de la próxima puya d’interrumpibilidá, publicaes el martes nel Boletín Oficial del Estáu. La potencia reduzse a mil megavatios (MW), distribuyida en 200 bloques de cinco MW. Ye inferior a l'anterior, que s'incrementaba a 2.340 megavatios, y suprime los bloques de 40 MW.

    Tal como adelantó'l martes el Presidente, Adrián Barbón, el Gobiernu alcordó solicitar esplicaciones al Ministeriu de Transición Ecolóxica. Asina mesmo, va apremiar al Gobiernu d'España a tomar midíes que contribuyan a amenorgar los costos enerxéticos a les empreses que consumen muncha eletricidá (electrointensives). Asturies axunta a delles compañíes d'estes característiques.

    En concreto, l'Executivu autonómicu va plantegar dos iniciatives. Per un llau, va demandar un aumentu sustancial de les compensaciones por costos indirectos d'emisiones de CO2, qu'anguaño s'incrementaron a 172 millones, con cuenta de se retribuya el total (100 %) de los costos derivaos del CO2 indirectu. Por otru, va reclamar qu'una de les primeres midíes que se tomen desque se forme gobiernu n'España sía l'aprobación del Estatutu pa les Empreses Electrointensives pa dotar d'un marcu estable al sector.



    Sofitu a la ganadería y l'agricultura

    El Conseyu de Gobiernu aprobó güei destinar 7.316.433 euros a ayudes pal desenvolvimientu de les campañes de saniamientu ganaderu de 2020 y a delles llinies de sofitu a profesionales del sector. D'esta cantidá, 4.416.433 euros van dedicase al plan de control, vixilancia y erradicación d'enfermedaes y otros programes sanitarios en reses de bovín, ovín, caprín y porcín que se van llevar a cabu l’añu próximu. Del restu, 2.100.000 euros van sirvir pa sofitar les esplotaciones que caltengan vaques nodrices y vacunu de lleche, y otros 800.000 van dir al fomentu de la contratación de seguros agrarios.

    • Campaña de saniamientu. La primera d'estes partíes va dexar realizar los controles pa detectar tuberculosis na cabana ganadera, sobre manera, na bovina. Nel 2018 saniáronse cuasi 373.000 animales de 15.482 esplotaciones. El Principáu realiza un importante esforciu inversor pa controlar esta enfermedá, lo que fixo posible que dende va dos años baxara la so prevalencia perbaxo del 0,1 %. Si Asturies caltién esi nivel mientres seis años, va ser declarada zona indemne d'esta patoloxía.
    • Amás, ye una de les poques comunidaes que practica una prueba comparada pa certificar si l'animal realmente ta infectáu y evitar con ello positivos por reacción cruciaes cola tuberculosis aviar.
    • Dientro de la campaña de saniamientu tamién van desenvolvese otros controles pa garantizar el cumplimientu de la llexislación en materia de piensos y alimentos, lo mesmo que de la normativa sobre salú y bienestar animal.
    • Vaques nodrices. La segunda partida, de 2,1 millones, va dexar sofitar les esplotaciones que caltengan vaques nodrices y vacunu de lleche, dientro de les ayudes recoyíes na Política Agraria Común (PAC) pal caltenimientu de la renta de llabradores y ganaderos, con cargu al Fondu Español de Garantía Agraria (Feaga). Nesti casu, les ayudes tán vinculaes a la producción.
    • Estes llinies de sofitu de la PAC son un instrumentu pal impulsu de les polítiques del Principáu nesti sector. Contribuyen a la viabilidá económica de les ganaderíes y a amenorgar el riesgu d'abandonu de l'actividá.
    • Seguros agrarios. A lo último, l'Executivu tamién va dedicar un gastu plurianual de 800.000 euros a fomentar la contratación de seguros agrarios. Esta aportación dirixida a llabradores y ganaderos dexará-yos sufragar parte del pagu de les pólices. Al empar, favorez la profesionalización del sector, yá qu’al traviés de los seguros pueden facer frente a les posibles perdes causaes pola climatoloxía adversa, accidentes o enfermedaes del ganáu.


    Convenios d'emerxencies y con Cruz Bermeya

    El Gobiernu d'Asturies va soscribir un conveniu de collaboración col Ministeriu de Defensa y va anovar el yá existente ente'l Serviciu d'Emerxencies del Principáu d'Asturies (Sepa) y Cruz Bermeya en materia d'emerxencies.

    Nel casu del primeru, l'alcuerdu va facer posible realizar intervenciones conxuntes de la Unidá Militar d'Emerxencies, Bomberos d'Asturies, 112 Asturies y Protección Civil del Sepa, cola mira de dar una respuesta eficaz en situaciones de catástrofes o emerxencies. L'alcuerdu, que nun va suponer costu económicu, va promover la realización d'actividaes de planificación y preparación necesaries; l'intercambiu d'información, esperiencies y conocencia mutua, y la formación conxunta en materia de protección civil y xestión d'emerxencies.

    El segundu de los convenios, que se prorroga dende la so firma nel 2017, establez una subvención de 80.000 euros a la Cruz Bermeya pa realizar llabores preventivos y de movilización de medios humanos y materiales n'Asturies, nel marcu del alcuerdu de collaboración col Sepa.



    Centros asturianos

    L'Executivu dio lluz verde al conveniu ente la Conseyería de Presidencia y la Federación Internacional de Centros Asturianos (FICA) pa financiar con 13.000 euros los gastos derivaos d'actividaes y de funcionamientu d'estes cases rexonales, que trabayen na promoción y divulgación de la cultura asturiana al traviés de les comunidaes nel esterior.

    La FICA, que representa y defende los intereses d'esti colectivu énte les alministraciones públiques, tien como oxetu la promoción de foros y espacios de coordinación, nos cualos el movimientu asociativu asturianu nel esterior pueda reflexonar, debatir y emitir propuestes pa divulgar la cultura, llingua, hestoria y tradiciones de la rexón ente esta colectividá, amás de fortalecer los vínculos de les persones emigrantes y los sos descendientes cola rexón.



    Comisión d'Alministración Local

    El Principáu dio'l vistu bonu a la designación de miembros de la Comisión Asturiana d'Alministración Local. La comisión va tar integrada pola conseyera de Presidencia, que va actuar como presidenta, y once representantes de l'Alministración del Principáu.

    Amás, tamién van formar parte de la comisión el presidente de la Federación Asturiana de Conceyos; el director xeneral d'Alministración Local, los alcaldes de los conceyos con población superior a 40.000 habitantes; un alcalde por caúna de les trés circunscripciones electorales; un alcalde en representación de los conceyos con población inferior a 2.000 habitantes; un alcalde en representación de los conceyos con población ente 2.001 y 5.000 habitantes, y un alcalde en representación de los conceyos con población superior a 5.000 habitantes y inferior a 40.000, que van actuar como vocales.



    Compensaciones a los conceyos por xubida del SMI

    El Conseyu de Gobiernu va destinar 170.487,65 euros a los conceyos asturianos en conceptu de compensación polos costos adicionales asumíos pola xubida del Salariu Mínimu Interprofesional (SMI) nes contrataciones de xente mozo desemplegaos en práctiques. Compénsase, d'esta miente, la diferencia ente les retribuciones primeramente establecíes y la cuantía finalmente abonada polos conceyos tres l'aumentu del SMI pal 2019 hasta los 900 euros mensuales.

    La contratación de xóvenes por parte de los conceyos ye una iniciativa dirixida a la integración sostenible de paraos inscritos nel programa de garantía xuvenil y cunta con financiamientu del Fondu Social Européu. Con esta cuantía evítase que los conceyos puedan incurrir nel incumplimientu de les regles presupuestaries relatives al gastu y estabilidá presupuestarios al asumir costos percima de lo envalorao primeramente. (Axúntase tabla coles cantidaes por conceyu).



    Parcela pa 25 viviendes en Llanera

    L'Executivu alcordó güei l'autorización del conveniu de collaboración ente la Conseyería de Derechos Sociales y Bienestar y el conceyu de Llanera pol qu'ésti dexa gratuitamente una parcela en Lugo de Llanera pa la construcción de viviendes de promoción pública.

    En total, van edificase 25 pisos con garaxe y va instalase un centru de día na planta baxa. La obra ha rematase nun plazu máximu de cinco años.



    Ver en formatu orixinal (PDF : 139 Kb )

Buscar mas acuerdos

Buscar
Desde
/
/
Hasta
/
/

Información sobre el documento

© Copyright 2006. Gobiernu del Principau d'Asturies