Gobiernu del Principau d'Asturies

Asturies, muncho más cerca

Tas en

Asturias.es Gobiernu Acuerdos del Conseyu de Gobiernu
 

Acuerdos del Conseyu de Gobiernu

  1. julio
  2. 23 de julio de 2020
    Alcuerdos del Conseyu de Gobiernu: 23/07/2020

    • El Principáu va movilizar en dos años más de 12 millones col fin de sofitar inversiones que contribuyan a amenorgar emisiones y a menguar el consumu eléctricu
    • Aprobáu un gastu d'un millón para fomentar el deporte ente escolares y sofitar a les federaciones
    • L'Executivu destina 185.400 euros al arreglu de la carretera que xune Peñamiel y La Pola L.lena

    El Gobiernu d'Asturies autorizó un gastu de 7,3 millones p’ampliar y reforzar les ayudes a proyectos d'eficiencia y diversificación enerxética presentaos por pymes y grandes empreses industriales. Estos nuevos fondos van permitir atender toles solicitúes d'inversión presentaes, que suman cerca de 90 millones.

    Esta ampliación de creitu correspuende a los fondos adicionales asignaos n'abril pol Institutu pa la Diversificación y Aforru de la Enerxía (IDAE), organismu dependiente del Ministeriu pa la Transición Ecolóxica y el Retu Demográficu (Miteco), pa dar continuidá a una lliínia de subvenciones que xeneró una alta demanda na comunidá.

    Primeramente, el Principáu recibió 4,78 millones l'añu pasáu, una partida que s'amplía agora hasta algamar los 12,08 millones, col fin de promover meyores tecnolóxiques o de procesos y la incorporación de sistemes de xestión enerxética na industria rexonal. Esta nueva inyección económica, que casi triplica l'aportación orixinal, va contribuyir a facilitar inversiones y actuaciones de meyora industrial, de la que va aumentar la competitividá del sector na actual etapa de reactivación y reconstrucción del texíu económicu.

    Asturies foi la primera y única comunidá capaz d'escosar el presupuestu recibíu pol IDAE na convocatoria d'ayudes que se abrió’l 20 de setiembre de 2019 pal bieniu 2019-2020.

    Énte esta situación, la Conseyería d'Industria, Empléu y Promoción Económica solicitó al IDAE l'ampliación del presupuestu, un pidimientu que foi atendida previu alcuerdu del comité de siguimientu y control del Fondu Nacional d'Eficiencia Enerxética.

    Estes subvenciones permiten impulsar actuaciones empobinaes a rebaxar les emisiones de dióxidu de carbonu y el consumu d'enerxía final, por aciu la meyora de la eficiencia en tecnoloxíes y procesos. Tamién faciliten la puesta en marcha de sistemes de xestión enerxética.



    Tresferencia de 450.000 euros a Asturex

    El Gobiernu d'Asturies, al traviés del Institutu de Desenvolvimientu Económicu del Principáu (Idepa), va tresferir 450.000 euros a la Sociedá de Promoción Esterior (Asturex) pa financiar les sos actividaes de promoción esterior esti añu.

    Los fondos van dir destinaos a los sos programes de fomentu del lconocimientu y del interés internacional de les empreses asturianes, el sofitu a la introducción, afitamientu y diversificación de les firmes asturianes nos mercaos internacionales y los planes d'asesoramientu y sofitu técnicu pa la internacionalización.



    Un millón n'ayudes pa impulsar el deporte

    El Gobiernu aprobó güei dos partíes que suman 1.031.317 euros pa impulsar el deporte en distintes disciplines y categoríes.

    Per un sitiu, autorizó un gastu de 600.000 euros pa financiar una convoctoria pública destinada a financiar los programes de les federaciones deportives asturianes esti añu.

    Per otra parte, dio lluz verde a la concesión de subvenciones, por un valor de 431.317 euros, a conceyos, patronatos y fundaciones deportives municipales y mancomunidaes pa la celebración d'actividaes venceyaes a los Xuegos Deportivos y a los Xuegos de Deporte Adaptáu 2019-2020, nos que cada añu participen 39.000 escolares.

    Les ayudes distribúyense de la siguiente manera:


    •  Fundación Deportiva Municipal d'Avilés: 62.520 euros.
    •  Patronatu Municipal de Deportes de Mieres: 24.069 euros.
    •  Patronatu Deportivu Municipal de Siero: 39.100 euros.
    •  Conceyu de Ribeseya: 45.839 euros.
    •  Conceyu de Grau: 11.641 euros.
    •  Conceyu de Cangas del Narcea: 43.740 euros.
    •  Conceyu de Valdés: 18.641 euros.
    •  Conceyu d'A Veiga: 15.955 euros.
    •  Patronatu Deportivu Municipal de Xixón: 87.525 euros.
    •  Conceyu de Carreño: 4.274 euros.
    •  Mancomunidá del Valle del Nalón: 19.241 euros.
    •  Conceyu d'Uviéu: 58.769 euros.

    Esti añu, la pandemia del coronavirus obligó a suspender el pasáu 14 de marzu los xuegos, qu'esti añu incluyíen 48 disciplines deportives. La Conseyería de Cultura, Política Llingüística y Turismu trabaya yá na organización de los del próximu cursu.



    Obres de meyora na carretera AS-231

    L'Executivu alcordó destinar 185.404 euros a la execución d'obres de meyora na carretera Peñamiel-La Pola L.lena (AS-231).

    L'actuación va consistir nel arreglu d'un fundimientu na redolada de la localidá de Envernaes, nel conceyu de Riosa. En concreto, va construyise un muriu de formigón armáu pa compensar el deslizamientu de la fastera. Amás, va sustituyise'l desagüe actual, va crease una cuneta formigonada y va instalase una barrera de seguridá.



    Ver en formatu orixinal (PDF : 119 Kb )
  3. 16 de julio de 2020
    Alcuerdos del Conseyu de Gobiernu: 16/07/2020
    • El Principáu va caltener el costu de toles matrícules d'estudios de grau, máster universitariu y doctoráu
    • El decretu de precios públicos inclúi exenciones tanto na EBAU como nel restu de títulos pa beneficiarios del ingresu mínimu vital
    • L'Executivu va apurrir más de 5 millones a la institución académica pa compensar la perda d'ingresos
    • Destinaos 858.500 euros para garantizar l'alimentación de los menores con beques de comedor afectaos pol zarru de colexos
    • Casi mediu millón va p ameyorar tecnológicamente les tarxetes del billete únicu del CTA

    El Gobiernu d'Asturies aprobó güei la conxelación de les tases de matrícula nes enseñances oficiales de grau, máster universitariu y doctoráu pal próximu cursu. Esti alcuerdu va beneficiar a más de 20.000 estudiantes qu'empecipien o sigan estudios na Universidá d'Uviéu. El Principáu va asumir el costu d'esta midida y va compensar a la institución académica con más de cinco millones.

    El decretu de precios públicos va caltener el mesmu costu que'l pasáu añu pa primera y socesives matrícules de tolos estudios, lo qu'asitia a Asturies ente les comunidaes autónomes onde ye más barato cursar un títulu universitariu. La comunidá cumple tamién col encamientu del Ministeriu d'Universidaes d'afitar estes tarifes nel estragal del cursu 2011-2012 ya inclusive s'asitia per debaxo del costu d'esi añu.

    La Conseyería de Ciencia, Innovación y Universidá incluyó nel decretu de precios públicos per primer vegada la exención de tases na prueba d'Evaluación de Bachilleratu pal Accesu a la Universidá (EBAU) pa beneficiarios del salariu social básicu o que perciban l'Ingresu Mínimu Vital (IMV). Estos estudiantes tampoco van pagar matrícula universitaria, siguiendo les directrices alcordaes pol ministeriu.

    Al igual qu'hasta agora, caltiénense les exenciones pa quien llogre premios estraordinarios de Bachilleratu, families numberoses, persones con discapacidá y víctimes d'actos terroristes y de violencia de xéneru. Amás, va ser posible fraccionar en cinco plazos l'abonu de la matrícula, una opción que va permitir que les families encaren el so costu con mayor facilidá y qu'afonda nel apueste del Principáu por facilitar l'accesu a los estudios universitarios.

    El Gobiernu autonómicu siguió una política de precios públicos nos últimos años que trató de desaniciar los efectos negativos de la crisis y favorecer l'accesu d'estudiantes a la Universidá, con independencia de la so situación socioeconómica y familiar.

    Con esi fin, caltuvo conxelaes les primeres matrícules de grau na Universidá d'Uviéu ente los cursos 2011 y 2018. Esti últimu añu aprobó un amenorgamientu del 5%. Sobre esa rebaxa, los precios menguaron esti cursu 2019-2020 un 25% en primera matrícula y un 10% en segunda, en tolos graos, y tamién un 25% nos estudios de máster.

    Les socesives conxelaciones y rebaxes nes tases universitaries faen posible qu'un estudiante de primer cursu, por casu, pague güei ente 200 y 400 euros menos que va nueve años.



    Ayudes a menores en situación de vulnerabilidá

    L'Executivu aprobó una partida de 858.500 euros pa financiar los gastos d'alimentación de los menores en situación de vulnerabilidá. Búscase garantizar el derechu básicu d'alimentación de los neños y neñes beneficiarios d'una beca comedor y que se vieren afectaos pol zarru de los colexos por cuenta de la pandemia.

    Nel Principáu hai 10.130 families a les que se-yos concedieren ayudes pal comedor escolar nel cursu 2019-2020 y qu'agora van percibir la subvención correspondiente.

    Estes partíes van xestionar los servicios sociales d'atención primaria en coordinación colos centros d'enseñanza correspondientes y xunto coles conseyeríes d'Educación y Derechos Sociales.

    Esta asignación respuende a la distribución territorial de los creitos estraordinarios aprobaos pa financiar los programes de servicios sociales de les comunidaes autónomes, y que en marzu d'esti añu amplióse hasta 25 millones pa reforzar les cobertories destinaes a la protección a la familia y atención a la probeza infantil.



    Meyores nel serviciu del Consorciu de Tresportes

    El Consorciu de Tresportes d'Asturies (CTA) va recibir 478.877 euros pa sustituyir la tarxeta intelixente na que se carga anguaño'l billete únicu por otra de nueva tecnoloxía, Mifare Classic 1K y Desfire 8K, qu'ameyora la seguridá del sistema y va apurrir meyores como la recarga al traviés del módulu NFC de los teléfonos móviles.

    Con estos dispositivos, que van ser el soporte pa la nueva tarxeta monederu que se va implantar a partir de xineru de 2021, podrán unificase los actuales bonu 10 y abonu mensual nuna única plataforma intelixente y ensin caducidá, que recalculará la meyor tarifa disponible en cada momentu pal usuariu. Esta midida enmárcase na renovación tecnolóxica que ta llevando a cabu'l Consorciu de Tresportes d'Asturies (CTA).

    Too ello tien por oxetu ampliar el númberu d'usuarios del tresporte públicu, al traviés d'una ferramienta como'l Billete Únicu.



    Observatoriu de la Muerte Digna

    El Principáu aprobó'l decretu que regula la organización y funcionamientu del Observatoriu de la Muerte Digna y de les Comisiones de Mortalidá de les árees de salú. Desenvuélvese asina l'artículu 31 de la Llei del Principáu d'Asturies 5/2018, de 22 de xunu, sobre derechos y garantíes de la dignidá de les persones nel procesu del final de la vida. Esta norma publicaráse esta selmana nel Boletín Oficial del Principáu d'Asturies (BOPA).

    L'Observatoriu de la Muerte Digna ye una ferramienta que va sirvir pa evaluar la calidá de la muerte n'Asturies y que les sos funciones y composición van desenvolvese reglamentariamente. Amás, el Serviciu de Salú (Sespa) va poner en marcha les Comisiones de Mortalidá en toles árees de salú. El so cometíu consiste n'establecer mecanismos d'evaluación del procesu asistencial y de prestu de los usuarios y tendrá de presentar informes de la so actividá al observatoriu.



    Meyora de carreteres nel occidente

    L'Executivu dio lluz verde a una inversión de 797.800 euros pa la contratación d'obres de caltenimientu y conservación en dos carreteres del occidente. Estes actuaciones afecten a les víes Cabañella-Anleo (NV-6), en Navia, y Cangas-Puertu de L.leitariegos (AS-213), en Cangas. Dambes tienen un plazu d'execución de cuatro meses.

    Les actuaciones son les siguientes:

    • Carretera Cabañella y Anleo

    Con un presupuestu de 457.314, 77 euros, va llevar a cabu l'arreglu del firme, el sistema de drenaxe y la reposición de la señalización vertical lo mesmo que de les barreres de seguridá. Tamién se va proceder a la roza de les turries y el perfiláu de cunetes.

    • Carretera Cangas-Puertu de L.leitariegos

    Con un presupuestu de 340.486,15 euros, van reparase trés puntos de la vía afectaos pol fundimientu de la plataforma. Los dos primeros tán na redolada de les poblaciones de La L.linde, Caldevil.la d’Arbás, L'Oteiru y La Pacharina, y el terceru atópase na redoma de la Farruquita y El Puertu. Estes intervenciones suponen una meyora importante pa la seguridá y funcionalidad de la vía.


    Ver en formatu orixinal (PDF : 124 Kb )
  4. 9 de julio de 2020
    Alcuerdos del Conseyu de Gobiernu: 09/07/2020
    • A pesar de les llimitaciones del estáu d’alarma, 1.233 persones recibieron l’informe que-yos asigna una prestación
    • El Principáu financia con un millón el caltenimientu de la Rede de Cases d’Acoyida
    • L’Executivu destina más de 6 millones a la meyora de zones forestales y a la prevención de quemes
    • Industria sofita con 783.708 euros la promoción del usu d’enerxía anovable por empreses, families y instituciones ensin ánimu d’arriquecimientu

    La Conseyería de Derechos Sociales y Bienestar informó güei al Conseyu de Gobiernu de la reducción del 21 % de la llista de persones dependientes que tán a la espera d’una prestación. A pesar de les llimitaciones que supunxo l’estáu d’alarma, 1.233 beneficiarios recibieron a lo llargo de xunu los sos planes individualizaos d’atención (PIA), l’informe qu’asigna’l serviciu o recursu más afayadizu pa cada casu, según el grau y nivel de dependencia reconocíos.

    Esta mengua tan importante destaca sobre manera nes árees sociosanitaries l (occidente), lV (Uviéu) y Vlll (Nalón), que superaron el 30 % en tolos casos.

    Pa entainar cola tramitación d’estos informes reforzóse’l personal nun 37 %, principalmente nes árees de la zona central, nes que s’axunta una demoranza mayor de los PIA, que supón que la persona tien la dependencia reconocida pero entá nun recibió la prestación.

    Tamién se reorganizó’l trabayu por oxetivos, de forma qu’a lo llargo del estáu d’alarma, toles xeres inherentes a esta función sofitáronse polos valoradores de la dependencia, lo que dexó menguar les llistes d’espera.

    El pasu previu a la ellaboración del plan personalizáu, quier dicise, na reconocencia o valoración de la situación de dependencia, tamién amenorgó les solicitúes pendientes nun 21 % a lo llargo de los postreros nueve meses. Esta cifra resulta entá más significativa por cuenta de que estes valoraciones tuvieron que suspendese del 12 de marzu al 1 de xunetu por causa de la pandemia.

    A pesar de les dificultaes provocaes pola crisis sanitaria, Asturies ye la comunidá onde más aumentaron les valoraciones a persones dependientes a lo llargo del estáu de alama.

    Con estos datos, el Gobiernu d’Asturies avanza nel cumplimientu del plan de choque anunciáu en setiembre del 2019 pol que se comprometía a acabar coles llistes d’espera nun añu y resolver en plazu toles solicitúes d’ayudes vinculaes a la Llei de Dependencia.

    La tramitación d’estes ayudes sigue un procesu qu’implica dos procedimientos. El primeru ye determinar si’l solicitante ye o non dependiente y, en casu de selo, en qué grau y nivel. El segundu, la ellaboración del PIA, ponse en marcha nel casu de qu’a la persona-y reconozan la situación de dependencia. Con esti informe, que se realiza teniendo en cuenta les necesidaes del usuariu y la so familia, asígnen-y el recursu más afayadizu.



    Sofitu a les víctimes de violencia de xéneru

    El Gobiernu autorizó la renovación de seis convenios de collaboración con otros tantos conceyos pal caltenimientu de la Rede de Cases d’Acoyida, creada nel 2000 p’actuar de forma integral sobre les víctimes de violencia de xéneru y los sos fíos y fíes. Colos alcuerdos aprobaos güei, Uviéu, Xixón y Avilés apurren fondos por valor de 255.000 euros amás de dos cases y un pisu tuteláu, mentes que Llangréu, Valdés y Castrillón participen dexando l’usu d’otros trés pisos.

    El Principáu destina anguaño más de 1.000.000 d’euros, en concreto 1.052.142, al caltenimientu de los dispositivos d’atención y acoyida a víctimes de violencia de xéneru al traviés d’un alcuerdu con Cruz Bermeya Española.

    La rede, que busca facilitar la recuperación de les muyeres y ufiertar atención personalizada, ta formada por estos dispositivos: un serviciu d’atención a ingresos y emerxencies; les cases d’acoyida d’Avilés y Uviéu; el Centru d’Atención Integral a Muyeres Víctimes de Violencia de Xéneru de Xixón, conocíu como la Casa Malva, y 20 pisos tutelaos: doce en Xixón, cuatro n’Uviéu y ún n’Avilés, Castrillón, Llangréu y Valdés.

    Amás, y por cuenta de les condiciones estraordinaries provocaes pola crisis sanitaria, n’abril abrióse una casa d’acoyida temporal pa cubrir les necesidaes d’agospedamientu derivaes del estáu d’alarma.

    Según los datos d’actividá de la rede nos seis primeros meses d’anguaño, foron atendíes 330 persones, de les que 172 son muyeres y 158 fíos y fíes. Rexistráronse 182 ingresos nuevos, de los que 102 son muyeres y 80 fíos y fíes, y 31 persones beneficiáronse de los pisos tutelaos, 14 muyeres y 17 fíos y fíes. El Serviciu d’atención a ingresos y emerxencies (Servaten) recibió 286 llamaes.

    Nel 2019, el total de persones atendíes foi de 564, 272 muyeres y 292 persones a cargu; los ingresos nuevos foron 446, 216 muyeres y 230 persones a cargu, y los pisos tutelaos recibieron 16 muyeres y 17 fíos y fíes. El serviciu de llamaes recibió 517.



    Ayudes a muyeres víctimes de violencia machista

    El Principáu concedió 149.527,56 euros n’ayudes directes a muyeres víctimes de violencia de xéneru amás d’a fíes y fíos de víctimes mortales por violencia de xéneru no que va d’añu. Estes ayudes enmárquense nes midíes integrales de protección, atención y asistencia a les víctimes, amás d’a les sos fíes y fíos, y tán financiaes con cargu al Pactu d’Estáu contra la Violencia de Xéneru.

    Con esti sofitu económicu búscase remediar en parte les dificultaes económiques que sufren estes muyeres, porque nel momentu posterior a la separación avecen a tener qu’asumir el papel de sustentadores úniques de la unidá familiar y son davezu elles les qu’abandonen la casa conxugal. Otra manera, los fíos y fíes de muyeres asesinaes enfréntense de fechu a una situación d’orfandá.

    Na primer concesión d’estes ayudes aprobada güei pol Executivu concediéronse a 55 muyeres por un total de 130.961,71 euros, cifra a la que se sumen los 15.000 euros que van recibir cinco fíos y fíes de víctimes mortales por violencia de xéneru.

    Les más de les solicitúes tán vinculares al pagu del arriendu, hipoteca y gastos básicos de la vivienda como la lluz y l’agua; tamién hai un porcentaxe pequeñu de gastos vinculaos a la compra de moblame y electrodomésticos básicos y otru a gastos médicos non cubiertos pola seguridá social como son los odontolóxicos.

    Na cantidá aprobada güei inclúyense 3.565,85 euros colos que s’estimaron dos recursos pendientes del exerciciu anterior.

    Ta previsto ampliar la partida destinada nel 2020 a estes ayudes con 350.000 euros más.

    Na actualidá, yá se recibieron 121 solicitúes más, por un importe solicitáu que xube a 305.000 euros.



    Llucha contra les quemes forestales

    El Gobiernu va dedicar 6.080.000 euros a la convocatoria d’ayudes de les llinies de meyora de zones forestales y de prevención de quemes del Programa de Desenvolvimientu Rural. La inversión, cofinanciada pola Unión Europea (UE) al traviés del Fondu Européu Agrícola de Desenvolvimientu Rural (Feader) y con calter plurianual, recueye 3.040.000 euros pa esti exerciciu y lo demás pal que vien.

    Con estes ayudes empobinaes a les entidaes locales búscase favorecer la protección del mediu ambiente y la prevención y defensa contra les quemes forestales. Amás, foméntase la economía circular, una y bones les más de les obres execútenles empreses de la redolada, lo qu’ayuda a afitar sectores d’actividá, d’empléu y población nos llugares onde se realicen.

    Al traviés de la llinia de prevención de daños causaos a los montes por quemes forestales, desastres naturales y catástrofes, dotada con 4.880.000 euros, foméntase la construcción d’infraestructures contra’l fueu, afitando puntos de discontinuidá y protexendo les poblaciones.

    Otra manera, a la llinia de desenvolvimientu de zones forestales destínense 1,2 millones pa facilitar que los conceyos desenvuelvan aquellos tratamientos selvícoles necesarios pa la producción más afayadiza nos montes de la so propiedá con repoblaciones, meyora de pistes o puntos d’agua, ente otros.



    Sofitu a les organizaciones profesionales agraries

    El Principáu va sofitar con 212.500 euros a les organizaciones profesionales agraries pa sufragar parcialmente los sos gastos de funcionamientu. Estes entidaes son un elementu importante como órganos de consulta y asesoramientu de les alministraciones públiques.

    Trátase d’un sector que xugó un papel trescendental na crisis sanitaria provocada pola COVID-19, una y bones la producción agraria y agroalimentaria algama un valor estratéxicu al ser un serviciu esencial pa la población.

    La distribución ye esta:

    Organización Subvención
    Asociación Agraria Jóvenes Agricultores y Ganaderos de Asturias (ASAJA) 68.000 €
    COAG-ASTURIAS 68.000 €
    Unión de Campesinos Asturianos (UCA) 76.500 €
    Total 212.500 €

     



    Subvenciones a la eficiencia enerxética

    El Conseyu de Gobiernu autorizó la convocatoria d’una llinia de subvenciones por importe de 783.708 euros en materia d’eficiencia y consumu d’enerxía non contaminante.

    Concretamente, van destinase 633.708 euros a la promoción del usu d’enerxía anovable n’ayudes a empreses privaes y 150.000 euros a families y instituciones ensin ánimu d’arriquecimientu.

    Les subvenciones van dirixíes al usu de biomasa como combustible pa la producción d’enerxía térmico; la implantación d’instalaciones d’aprovechamientu enerxéticu de biogás; el tresporte y la movilidá eficiente de mercancía; la instalación de puntos de recarga de vehículos eléctricos, o la implantación d’estaciones de repostaxe de combustible alternativo accesible al públicu.

    Estes ayudes convóquense anualmente y cunten con un altu grau d’execución. Nos dos últimos exercicios sofitáronse 194 actuaciones, con una cantidá total subvencionada de 2.136.041 euros pa una inversión de más de 12,3 millones. Na convocatoria actual, aguárdase algamar resultaos equivalentes.



    Meyora del suministru de gas

    L’Executivu tamién autorizó la firma d’un conveniu de collaboración ente’l Principáu y la sociedá NED Suministros GLP, del Grupo Nortegás, p’acometer la gasificación y promover la seguranza y calidá del suministru nel nucleu de población de San Esteban (Muros).

    Esta iniciativa contempla una inversión de 261.033 euros, de los que 120.000 va apurrilos el Gobiernu rexonal. Dase continuidá con eso al compromisu del Executivu pa la meyora del accesu a la rede de gas nel Principáu por particulares y empreses, ayudando a la viabilidá económica de los proyectos.



    Caltenimientu de los Xulgaos de Paz

    El Gobiernu va destinar 140.000 euros en subvenciones a sesenta conceyos asturianos pa cubrir los gastos de funcionamientu de los Xulgaos de Paz, órganos allugaos nos conceyos onde nun esiste Xulgáu de primer Instancia y Instrucción y qu’asumen competencies de menor importancia tanto nel orde civil como nel penal.

    Tamién ufierten servicios de cooperación xudicial al facilitar la comunicación de los demás órganos xudiciales colos ciudadanos residentes nestos conceyos qu’a menudo tán poco poblaos.

    La rede de Xulgaos de Paz d’Asturies ufierta esta clas de servicios a 204.557 asturianos que viven nestos conceyos.



    Ver en formatu orixinal (PDF : 191 Kb )
  5. 2 de julio de 2020
    Alcuerdos del Conseyu de Gobiernu: 02/07/2020
    • La reorganización nun va suponer un aumentu del númberu total de cargos altos
    • Mediu Rural y Cohesión Territorial va cuntar con una Viceconseyería d’Infraestructures, Movilidá y Territoriu, y suprímese l’Axencia de Tresportes
    • Clara Sierra, hasta agora responsable del Institutu de la Mocedá, va pasar a ser directora xeneral de Mocedá, Diversidá Sexual y Derechos LGTBI
    • La Conseyería de Derechos Sociales y Bienestar va facese cargu de la empresa Sedes p’axuntar toles polítiques públiques de vivienda nel mesmu departamentu
    • L’Executivu da lluz verde al decretu que regula la Comisión Delegada p’Asuntos Económicos, que va liderar el vicepresidente, Juan Cofiño

    El Conseyu de Gobiernu aprobó güei la so estructura nueva con una mira doble: encarar la reforma y modernización de l’Alministración y sofitar el desenvolvimientu del mediu rural. L’Executivu tamién ratificó’l decretu que regula la creación de la Comisión Delegada del Conseyu de Gobiernu p’Asuntos Económicos, que va liderar el vicepresidente Juan Cofiño.

    El presidente del Principáu, Adrián Barbón, anunció la reestructuración el 20 de xunu. El xefe del Executivu esplicó que los cambeos provocaos pola pandemia lleváronlu al convencimientu de que la puesta al día de l’Alministración tien que s’encarar esta llexislatura. Tamién aseguró que la crisis sanitaria va suponer un refuerzu del mediu rural, una de les prioridaes del Gobiernu d’Asturies.

    Con estos planteamientos, Barbón adelantó la reforma del Executivu pa crear dos conseyeríes. Una, la d’Alministración Autonómica, Mediu Ambiente y Cambéu Climáticu, dirixida por Juan Cofiño. Otra, la de Mediu Rural y Cohesión Territorial, responsabilidá d’Alejandro Calvo. Dambos tomaron posesión de los sos cargos la selmana pasada.

    El Conseyu de Gobiernu dio esta mañana un pasu nuevu cola aprobación de los respectivos decretos d’estructura. Ún de los cambeos principales ye la creación de la Viceconseyería d’Infraestructures, Movilidá y Territoriu. Aparte, Clara Sierra, hasta agora responsable del Institutu de la Mocedá, va pasar a asumir tamién l’área de diversidá sexual y derechos LGTBI nuna dirección xeneral nueva. Estes funciones van siguir na Conseyería de Presidencia.

    Los cambeos tamién afecten a les conseyeríes de Facienda, Educación y Servicios Sociales, anque nuna midida menor. Los cambeos nun suponen una medría del númberu total de cargos altos.

    De siguío, resúmense los cambeos:



    Vicepresidencia y Conseyería d’Alministración Autonómica, Mediu Ambiente y Cambéu Climáticu

    Empobinada por Juan Cofiño, esta conseyería va encargase de preparar y encarar la reforma de l’Alministración autonómica. El vicepresidente dirixe tamién el Comité de coordinación de la Desescalada y la Comisión delegada del Conseyu de Gobiernu p’Asuntos Económicos.

    A efectos de la estructura del gobiernu, la conseyería caltién el rangu de vicepresidencia y asume la Dirección Xeneral de Función Pública. Ente les sos xeres figuren l’alministración y xestión económica del personal de l’Alministración, rellaciones llaborales y ordenación de recursos humanos, prevención de riesgos llaborales y inspección xeneral de servicios. Amás, caltién les competencies en Mediu Ambiente y Cambéu Climáticu aparte de les rellacionaes cola coordinación del gobiernu, los servicios xurídicos o les rellaciones cola Xunta Xeneral.

    Tocante a los sos órganos centrales, amás de la Secretaría Xeneral Técnica, estructúrase d’esta forma:

    • Dirección Xeneral de la Vicepresidencia.
    • Dirección Xeneral de Función Pública.
    • Viceconseyería de Mediu Ambiente y Cambéu Climáticu:
    • Dirección xeneral de Calidable Ambiental y Cambéu Climáticu.

    Esti departamentu va cuntar con dos órganos d’asesoramientu y sofitu: la Comisión Superior de Personal y la Comisión p’Asuntos Medioambientales. La Xunta de Saniamientu va siguir formando parte de la conseyería, que tamién va siguir exerciendo les competencies que s’atribuyen al Principáu en Coxersa y Cadasa.



    Conseyería de Presidencia

    La conseyería que dirixe Rita Camblor asume les competencies relatives a diversidá sexual y derechos LGTBI, que se van integrar na nueva Dirección Xeneral de Mocedá (que sustituye al Institutu Asturianu de la Mocedá), y al mandu d’ella va siguir tando Clara Sierra. L’Institutu Asturianu de la Mocedá yá tenía rangu de dirección xeneral.

    El cambéu supón tamién una reordenación de les funciones del área d’Estratexa Dixital qu’asume la dirección, diseñu, desenvolvimientu y caltenimientu del Sistema de Xestión Documental y les polítiques de dixitalización. Tamién se va ocupar de la xestión y esplotación de los datos almacenaos.

    Finalmente, créase’l Serviciu de Cooperación al Desenvolvimientu, na Axencia Asturiana de Cooperación, hasta agora dotáu namás con una Sección y dellos técnicos y personal auxiliar.



    Conseyería de Facienda

    Facienda, liderada por Ana Cárcaba, asume sector públicu, hasta agora na Conseyería de Presidencia. Esta competencia nueva nun va aumentar la estructura d’altos cargos de Facienda.

    Cárcaba va trabayar conxuntamente col vicepresidente Juan Cofiño na reforma de l’Alministración autonómica y, sobre manera, de los órganos, entes y fundaciones que constituyen el sector públicu.



    Conseyería d’Educación

    Los axustes na conseyería que titula Carmen Suárez respuenden a les necesidaes detectaes depués de la declaración del estáu d’alarma y, más en concreto, a la planificación del cursu nuevu, coles mires de conciliar la mayor presencia posible nes aules con un respetu escupulosu a les normes de seguranza.

    Los cambeos nesti departamentu namás afecten a la Dirección Xeneral de Personal Docente, que reforma los sos dos servicios:

    - el de plantiyes y costos de personal, que pasa a llamase serviciu de relaciones llaborales, programación d’efectivos y costos de personal docente

    -y l’hasta la fecha de xestión alministrativa y relaciones llaborales, que pasa a ser serviciu de xestión alministrativa de personal docente.

    Gracies a estos cambeos, ordénense y defínense de manera equilibrada tanto les competencies como les cargues de trabayu de caún de los servicios de la dirección xeneral.

    Aparte, la Secretaría Xeneral Técnica va asumir funciones en materia de responsabilidá patrimonial. Igualmente, les direcciones xenerales van exercer funciones de coordinación sobre les plataformes informátiques del so ámbitu de xestión, cola cuenta d’ameyorar y ordenar l’aprovechamientu de los recursos telemáticos.



    Conseyería de Derechos Sociales y Bienestar

    Melania Álvarez, conseyera de Derechos Sociales y Bienestar, tamién decidió cambeos nel so departamentu.

    Nesti casu, la Dirección Xeneral de Planificación, Ordenación y Adaptación al Cambéu Social va integrar el Serviciu d’Inspección y Calidá.

    Esti serviciu ye l’encargáu d’exercer les funciones inspectores de servicios y prestaciones económiques del sistema públicu asturianu de servicios sociales pa verificar el cumplimientu de la normativa. Tamién s’ocupa del diseñu y evaluación de les polítiques de calidá de les prestaciones lligaes al Sistema pa l’Autonomía Personal y Atención a la Dependencia.

    Amás, la empresa Sedes S. A. pasa a depender de la Dirección Xeneral de Vivienda cola mira d’axuntar toles polítiques d’esti ámbitu na mesma conseyería pa racionalizar el sector públicu. Esta sociedá mercantil, fundada en 1947, taba adscrita hasta agora a la Conseyería d’Infraestructures, Mediu Ambiente y Cambéu Climáticu.



    Conseyería de Mediu Rural y Cohesión Territorial

    Esta conseyería axunta, cola d’Alministración Autonómica, los cambeos más importantes. Empobinada por Alejandro Calvo, va encargase de conciliar el respaldu al mediu rural coles polítiques d’infraestructures.

    Tocantes a la so estructura, la conseyería caltién les competencies en materia de mediu natural, recursos agrícoles, forestarles, ganaderos y pesqueros, d’industria agroalimentaria y de desenvolvimientu rural. Al tiempu, asume les d’infraestructures viaries y portuaries, tresportes, conectividá y movilidá y ordenación del territoriu y urbanismu.

    Los cambeos introducíos dexen recuperar una visión más integral de la planificación y la xestión de les infraestructures, de manera que, amás de responder a criterios demográficos, ayude a xenerar desenvolvimientu económicu y movilidá sostenible en tol territoriu, sobre manera nes ales de la rexón.

    Créase la Viceconseyería d’Infraestructures, Movilidá y Territoriu, que se va encargar de coordinar les acciones de trés direcciones xenerales en materia infraestructures viaries y portuaries; tresportes, conectividá y movilidá; ordenación del territoriu y urbanismu. Na estructura nueva desapaez l’Axencia de Tresportes, que s’integra na Dirección Xeneral de Tresportes y Movilidá. Asina, créase un cargu altu (una viceconseyería), pero desapaez otru (la dirección de l’Axencia de Tresportes).

    Cómo órganos centrales, amás de la Secretaria Xeneral Técnica, inclúyense estos:

    • Dirección Xeneral de Ganadería y Sanidá Animal
    • Dirección Xeneral de Desenvolvimientu Rural y Agroalimentación
    • Dirección Xeneral d’Infraestructures Rurales y Montes
    • Dirección Xeneral de Mediu Natural y Planificación Rural
    • Dirección Xeneral de Pesca Marítima
    • Viceconseyería d’Infraestructures, Movilidá y Territoriu:
    • Dirección Xeneral d’Infraestructures Viaries y Portuaries
    • Dirección Xeneral de Tresportes y Movilidá
    • Dirección Xeneral d’Ordenación del Territoriu y Urbanismu

    De la conseyería dependen tamién la entidá pública Serviciu d’Investigación y Desenvolvimientu Agroalimentariu del Principáu d’Asturies (Serida) y la Comisión Rexonal del Bancu de Tierres. Y como órganos d’asesoramientu y sofitu dispón de:

    • Conseyu Forestal del Principáu d’Asturies
    • Conseyu Agrariu del Principáu d’Asturies
    • Conseyu Agroalimentariu del Principáu d’Asturies
    • Conseyu Rexonal de Caza
    • Conseyu de los Ecosistemes Acuáticos y de la Pesca n’Agua Continentales del Principáu d’Asturies
    • Comisión Cartográfica del Principáu d’Asturies
    • Conseyu de la Movilidá del Principáu d’Asturies

    Tamién tán adscritos a la conseyería l’ente públicu’l Consorciu de Tresportes d’Asturies (CTA), y los órganos Comisión d’Urbanismu y Ordenación del Territoriu del Principáu d’Asturies (CUOTA) y el Xuráu d’Espropiación del Principáu d’Asturies.



    Comisión p’asuntos económicos

    L’Executivu aprobó tamién el decretu de creación de la Comisión Delegada del Conseyu de Gobiernu p’Asuntos Económicos, integrada polos titulares de les conseyeríes d’Alministración Autonómica, Mediu Ambiente y Cambéu Climáticu, Juan Cofiño; de Facienda, Ana Cárcaba; d’Industria, Empléu y Promoción Económica, Enrique Fernández, y de Ciencia, Innovación y Universidá, Borja Sánchez.

    La creación d’esti organismu nuevu produzse nel contestu de la coxuntura sociosanitaria tan escepcional que tien d’encarase. La crisis provocada pol coronavirus creó un escenariu económicu y presupuestariu que rique midíes organizatives pa intensificar los principios d’axilidá, eficacia y eficiencia de l’alministración.

    La presidencia de la comisión correspuénde-y al presidente del Principáu, Adrián Barbón y, por delegación, al vicepresidente de Gobiernu, mentes que la secretaría va desempeñala’l conseyeru de Ciencia.

    Amás de los sos miembros, van poder ser convocaos a les xuntes otros integrantes del Conseyu de Gobiernu, cargos altos de l’Alministración autonómica y, escepcionalmente, persones que puedan apurrir una contribución singular nel asuntu a tratar en cada momentu.

    Les principales funciones d’esti organismu, establecíes nel decretu, son estes:

    • Estudiar les directrices xenerales de política económica del Principáu d’Asturies.
    • Coordinar planes y programes de trescendencia económica, financiera y presupuestaria, formulando les propuestes correspondientes al Conseyu de Gobiernu.
    • Coordinar y proponer al Conseyu de Gobiernu los principios básicos, planes y programes d’actuación no relativo a instrumentos de reactivación y promoción económica, amás de la evaluación de resultaos de les actuaciones desenvueltes na materia.
    • Impulsar y coordinar midíes d’análisis y evaluación de polítiques y procedimientos d’actuación de l’alministración, sobre manera d’aquellos con trescendencia directa na xeneración d’actividaes económiques.



    Ver en formatu orixinal (PDF : 217 Kb )

Buscar mas acuerdos

Buscar
Desde
/
/
Hasta
/
/

Información sobre el documento

© Copyright 2006. Gobiernu del Principau d'Asturies