Gobierno del Principado de Asturias

Asturias, mucho más cerca

Estás en

Aniciu Temes Cultura Retayos d'Asturies L'osu pardu
 

Retayos d'Asturies

L'osu pardu

Los montes cantábricos son unos de los más espectaculares d'Europa, non solo polos sos paisaxes, el clima o los ríos, tamién por tar paralelos a la costa, cerca de la mar y nun ser demasiao altos (la cota más alta son 2.700 metros). L'osu pardu ta seriamente amenazáu pol home y tan en grave peligru d'estinción, arrequexáu nos paraxes más aislaos y xabaces d’esti cordal.

A principios d’esti sieglu, esistíen nes montañes del Norte d'España munchos osos pardos. Güei, queden alredor de 80. L'osu pardu ye un animal de cara simpática, oreyes y güeyos pequeños y un pocu cegaratu, lo que compensa col oyíu y col olfatu. Ye nocherniegu, muévese ente l'atapecer y l’alborada y camina sobre les plantes de los pies y de les manes, polo que ye un plantígradu, como l'home. El color del pelo va dende’l castaño y el prieto y vuelvénse canosos cola edá, tamién como los paisanos. L'osu pardu ye de los más pequeños. El so pesu pue dir ente los 60 y los160 kg. El so alturor va ente 1,70 y 2,20 y puen vivir hasta 30 años, en condiciones normales. Cuando llega l’iviernu, xeralmente en xineru, l'osu pardu métese nel so xoril pa pasar hibernáu tola época fría, normalmente hasta marzu. Ye de los que menos hibernen, porque hailos que lo faen hasta siete meses al añu. Les femes que tán esperando fíos emprimen enantes que'l restu la hibernación y les que tienen les críes pel iviernu nun salen con elles hasta abril o mayu. Nesti tiempu qu'hibernen queden fechos un duviellu, respiren mui poco y l'intestín cásique nun-yos funciona.

Aliméntense consumiendo les grases acumulaes pela seronda, anque nun ye raros velos delles vegaes dar una vuelta pela nieve. Lo sos xoriles son pequeños y tán en sitios bien abegosos  d’algamar pa los humanos (nun tienen un pelu de tontos). Cuanto más pequeñes, mayor seguridá y menos frío. Suelen ser cueves naturales o furacos agrandaos que preparen pa vivir con un bon xergón de la materia vexetal qu’atopen na rodiada’l so xoril: mofu, felechos, rames.

L'osu ye un amante de la soledá. Pa él nun hai nada como un paséu solitariu, una bona fartura y un pigacín a la solombra d’un árbol. Ente ellos rellaciónense, pero pa ver munchos xuntos tien que dase un casu especial, por exemplu una viesca enllena d'andrinos.

Ente los 3 y los 5 años, l'osu yá ye maduru sexualmente, y dende esi momentu entama a buscar compañeru o compañera. Pero la cosa ta perdificil, porque queden pocos exemplares y tán dividíos en dos zones bien estremaes ente sí, lo que complica tanto atopar pareya como garantizar la superviviencia, yá que l’apareamientu endogámicu, ente miembros de la mesma familia, descaltién la especie. La época de celu ye de mayu a xunetu, pero ye en payares cuando emprima la xestación. Pa xineru, en plena hibernación, paren les críes, normalmente dos, machu y fema, anque el númberu pue variar ente ún y cuatro. Al nacer los esbardos, namas pesen 350 gramos, diez veces menos qu'un neñu de rollu humanu y tiren los primeros meses mamando y durmiendo. Gracies a la lleche de so madre, crecen muncho y p’abril o mayu, cuando dexen el xoril, dan yá los primeros pasos.

Son unos animales mui esperimentales y xuguetones, nun paren de revolver y metese en xareos de los que suel sacalos mama osa, siempre pendiente de los esbardos nestos primeros años de vida. Ente partu y partu pasen, como mínimo, dos años. La principal actividá del osu pel día ye buscar comida. D’esta alimentación depende tamién la reproducción de la especie; si les oses nun tán bien cebaes, los esbardos van tener más oportunidaes de morrer. Pela ultima metá del branu y la seronda, estos animales comen munchos frutos y lleguen a coyer casi 40 quilos de sobrepesu, que van ser de los que vivan nel periodu d'hibernación . Un día de alimentación adecuada val-yos pa vivir cinco díes hibernaos.

Los osos son omnívoros, esto ye, que comen de too. Por embargu, el 85% de la so dieta ye vexetal. Comen herbáceos en primavera y forren coles carroñes de los animales muertos nel iviernu y con insectos. En branu lo que aprovechen son los frutos carnosos (mazanes, mores, andrinos, cereces..) y n'iviernu los frutos secos (castañes, ablanes, beyotes…). El platu animal más habitual son los insectos (formigues, abeyes y gates d'escarabayu) y si come dalgún gran hervíboru (ciervos, robezos o corcios), yá tán muertos cuando llega. Namas de cuando en vez caza dalgún páxaru o pequeñu mamíferu. Pero l'osu ye un golosu ensin remediu. Lo que más-y presta ye garrar per banda un panal y comer tol miel que puea. Asina ye que, dende antaño, los asturianos esmoleciéronse en protexer los truébanos con una muria alta (pue llegar hasta los 3 metros). Esta construcción conozse col nome de cortín. Dientro tán los truébanos y que tradicionalmente taben fechos con tueru de carbayu o castañal. Al cortín éntrase per una escalera, que se dexa tumbada y, si tien puerta, cúbrese per fuera con clavos, que l'osu ye mui cuciu y más d'una abrió. A coyer la escalera entá nun llegó, eso sí.

La rellación del osu col agua ye tamién constante nun sitiu como’l cordal, llenu de mananciales, ríos, llagos y charques. Présta-y muncho’l líquidu elementu, y non solo lo usa pa beber, sinon tamién pa bañase y refrescase y, si cuadra, pescar daqué.

Pero l'osu pardu ta llegando al so fin. Va 700 años llegaben hasta Sierra Morena. Los sieglos XVII y XVIII fueron terribles pa los osos nel nuesu país. Estrincáronse dafechu nel centru y sur de la península y los osos del Cordal Cantábricu y de los Pirineos, hasta entonces xuníos, separtáronse. Güei queden menos de 10 nos Pirineos y malapenes 80 nel cuadrante suroccidental d'Asturies. Delles fueron les razones d’esta estinción, pero detrás de toes elles ta siempre la mano humana. Ye cierto que na busca d’alimentos podíen dañar propiedaes de la xente de la zona, incluso estrozar cortinos enteros. En consecuencia los dueños de los truébanos y los ganaderos solíen poner trampes, velenu o matalos a disparos.

Güei, los pocos daños que puen causar los que queden, páguenlos les Comunidaes Autónomes, colo que la caza d'osos por esti problema ta eliminada. Y asina y too, estos daños son pequeños. Una mas de les razones de la so estinción ye que l'osu foi consideráu per munchu tiempu el mayor troféu de caza, y los sos cazadores unos héroes. Puen vese testimonios nes imáxenes de la época. Los guindones y los chuzos yeren les armes más usaes. La caza del osu pardu ta vetada desde 1973 y l’osu consideráu especie protexida.

L'aprovechamientu de los recursos naturales, fixo llegar al home a los sitios inaccesibles onde l'osu tenía la so casa. Esto foi tamién arrequexándolu, yá que cuando l'home llega, l'osu marcha. Lo mesmo asocede coles obres de minería y obres públiques, la construcción de nueves carreteres y pistes y el turismu nos picos. Asina, resumiendo, la mortalidá non natural y la perda del so habitat, son les dos grandes razones de la regresión d’esta especie.

Al Principáu d'Asturies, onde viven alredor al 80% de los osos que queden na península, cuerrespuénde-y, como depositariu d’esti patrimoniu, una responsabilidá perimportante: participar na preservación del osu pardu pal restu d'España y les xeneraciones futures.