Gobiernu del Principau d'Asturies

Asturies, muncho más cerca

Tas en

Asturias.es Mayores Avieyamientu activo Asturies, referente européu n’Innovación pal Avieyamientu Activu ...
 

Avieyamientu activo

Asturies, referente européu n’Innovación pal Avieyamientu Activu y Saludable

La UE reconoz la collaboración del Gobiernu del Principáu con centros d’investigación, empreses privaes y la Universidá nel desenvolvimientu d’una estratexa rexonal de meyora de la salú, la calidá de vida y la independencia de los mayores.

A últimos del añu 2013, el departamentu d’Asuntos Europeos de la Conseyería de Presidencia y Participación Ciudadana empezó a trabayar en cómo encarar les consecuencies socioeconómiques de los cambeos demográficos al traviés de les iniciatives y programes europeos.

La exa d’acción de les instituciones europees nesti ámbitu ye focalizar los esfuercios de la I+D y la innovación nos Desafíos Sociales, col oxetivu ambiciosu de que la sociedá civil, les universidaes y centros d’investigación, les empreses innovadores y les alministraciones cooperen nel desenvolvimientu de soluciones innovadores a los problemes médicos, asistenciales y presupuestarios que se van produciendo nel contestu demográficu nuevu.

Ye lo que se dio en llamar l’enfoque de la ‘héliz cuádruple’, un motor que tien como fin últimu consiguir resultaos y ventayes pa les persones mayores, el sistema médico-asistencial, y les economíes rexonales.

Les instituciones europees apostaron por esta estratexa con un esfuerciu presupuestariu relevante d’impulsu de les llamaes  estratexes rexonales d’especialización intelixente (RIS3), que fomenten tanto la cooperación interna como la collaboración ente rexones europees.

Na so estratexa RIS3, el Gobiernu d’Asturies centróse n’ámbitu socio-sanitariu, pero tamién consiguió que los desafíos demográficos nuna Europa avieyada s’incorporaren al debate públicu como una de les prioridaes d’actuación de les polítiques comunitaries.

Asturies forma parte de la Rede Europea de Rexones con Desafíos Demográficos (DCRN), del Pactu Européu pol Cambéu Demográficu,y ye miembru activu del grupu de trabayu de demografía de la macro rexón europea RESOE (rexón norte y centru de Portugal, Galicia, Asturies, Castiella y Llión). Precisamente, la RESOE celebró en febreru n’Uviéu una xunta de trabayu p’analizar les consecuencies del despoblamientu y del avieyamientu de la población.

Simultáneamente, la Universidá d’Uviéu, los centros d’investigación y delles empreses coincidieron en programes europeos y alredor d’estes iniciatives, sobre manera de la RIS3, nel gran potencial d’investigación, innovación y negociu qu’existe n’ámbitu de la llamada ‘silvereconomy’, la economía de los productos y servicios destinaos a la población de más edá, sobre manera los rellacionaos cola salú, la calidá de vida y la independencia de les persones mayores.

Asina foi cuayando l’interés y la voluntá de dar un pasu alantre significativu, de consecuencies cualitatives pa la innovación rexonal. De la xunta de la RESOE y d’un taller sobre la integración de les tecnoloxíes nos modelos públicos d’atención a mayores celebraos en febreru, surdió’l compromisu de crear un partenariáu pa presentar la candidatura d’Asturies como sitiu de referencia o Reference Site del Partenariáu Européu d’Innovación n’Avieyamientu Activu y Saludable (EIP-AHA).

Los Partenariaos Europeos d’Innovación son la iniciativa estrella de la Estratexa Europa 2020 pa la estensión de la innovación al máximu d’ámbitos sociales, culturales y económicos. El relativu a Avieyamientu Activu y Saludable enfócase a l’aplicación de la innovación a la salú, el bienestar y la independencia de los mayores. Na primer convocatoria del 2012 designáronse 35 Sitios de Referencia en tola Unión Europea.

Los Sitios de Referencia son interlocutores privilexaos de la Comisión Europea n’innovación tecnolóxica, investigación y desenvolvimientu n’ámbitu de la salú y l’asistencia sanitaria, desenvolvimientu urbanu amigable pa los mayores y desenvolvimientu empresarial en ‘silvereconomy’.

Los 35 Sitios de Referencia de la convocatoria anterior postularon a la renovación de la so calificación, lo que demuestra los beneficios que llograron d’esi estatus. Ente ellos, pue destacar l’éxitu na financiación de proyectos d’I+D+i y na implantación de soluciones innovadores con efectos personales y presupuestarios positivos gracies a la cooperación ente Sitios de Referencia.

Cada Sitiu de Referencia ye, al empar, un partenariáu que tien que cubrir l’enfoque de la ‘héliz cuádruple’ y establecer un programa que produza resultaos prácticos. Cada candidatura pasa un proceso de calificación doble: primero una evaluación polos pares, esto ye, por otros Sitios de Referencia, y depués por un panel d’espertos independientes.

El partenariáu d’Asturies ta formáu pol Gobiernu rexonal (conseyeríes de Presidencia y de Servicios y Derechos Sociales), los conceyos d’Uviéu, Xixón y Avilés, Cruz Bermeya d’Asturies, los centros tecnolóxicos CTIC y PRODINTEC, la Fundación pal Fomentu n’Asturies de la Investigación Científica Aplicada y la Tecnoloxía (FICYT), el clúster de Biomedicina y Salú de la Universidá d’Uviéu, la fundación Institutu Oftalmolóxicu Fernández-Vega y el Centru d’Empreses y Innovación CEEI.

El programa de trabayu ente los socios céntrase na ellaboración d’una Estratexa Asturiana d’Avieyamientu Activu, la realización d’acciones pilotu innovadores nos recursos asistenciales de l’alministración y de Cruz Bermeya, y la puesta en marcha de sistemes eficaces de tresferencia y progresión de bones práctiques.

Esta candidatura aprobóse y calificóse con 2 estrelles de 4 posibles. Al eventu presentáronse 78 candidatures de 22 Estaos miembru. Les acreitaciones van apurrise’l 6 y 8 d’avientu nun cumal européu sobre innovación pa la salú y l’avieyamientu activu.

Dende agora, tolos socios del partenariáu pueden utilizar el distintivu européu de Referente Site. D’equí p’arriba, ábrense trés años de collaboración ente los socios, d’ampliación del partenariáu, de cooperación colos demás Sitios de Referencia, de participación nos programes y iniciatives europeos y, sobre manera, de consiguir resultaos tanxibles pa les persones mayores, el sistema médico-asistencial, y la economía. Resultaos que dientro de trés años dexen a Asturies anovar esta distinción y ameyorar la so calificación.