Gobiernu del Principau d'Asturies

Asturies, muncho más cerca

Tas en

Asturias.es Temes Cultura Patrimoniu Históricu y Cultural Patrimoniu Cultural
 

Patrimoniu Históricu y Cultural

Patrimoniu Cultural

Normativa y llista de los Bienes d'Interés Cultural (BIC) y Inventariu de Patrimoniu Cultural

Normativa en materia de patrimoniu cultural asturianu

La normativa vixente en materia de Patrimoniu Cultural d'Asturies ta integrada por estes disposiciones:

   - Llei del Principáu d'Asturies 1/2001, de 6 de marzu, de Patrimoniu Cultural.
   - Decretu 126/2001, de 18 d'ochobre, pol que s'aprueba'l Reglamentu de composición y funcionamientu de la Comisión de Valoración de Bienes del Patrimoniu Cultural d'Asturies.
   - Decretu 15/2002, de 8 de febreru, pol que se regula la organización y funcionamientu del Conseyu del Patrimoniu Cultural d'Asturies.
   - Decretu 18/2002, de 8 de febreru, que regula la Comisión d'Inversiones con cargu al Ún por cientu Cultural n'obres públiques.
   - Decretu 20/2015, de 25 de marzu, pol que s'aprueba'l Reglamentu de desenvolvimientu de la Llei del Principáu d'Asturies 1/2001, de 6 de marzu, de Patrimoniu Cultural.

Nesta publicación de la Dirección Xeneral de Patrimoniu Cultural recuéyense toes estes normes llegales:

    Recopilación de normativa sobre Patrimoniu Cultural asturianu (pdf: 1,28 Mb) (n'español)

 

Llista de los bienes d'interés cultural (bic) y inventariu de patrimoniu cultural

Según la llexislación vixente (Llei del Principáu d'Asturies 1/2001, de 6 de marzu, de Patrimoniu Cultural), existen trés niveles de protección patrimonial na comunidá:

 - Bienes d'Interés Cultural (BIC). Son los “bienes más relevantes del Patrimoniu Cultural d'Asturies que, pol so valor singular, declárense como talos pente medies de Decretu del Conseyu de Gobiernu del Principáu d'Asturies”. Puen ser bienes muebles o inmuebles. Ente estos postreros, los Bienes d'Interés Cultural puen ser declaraos en dalguna d'estes categoríes: Monumentu, Conxuntu Históricu, Xardín Históricu, Sitiu Históricu, Zona Arqueolóxica y Vía Histórica. Existen, amás, Bienes d'Interés Cultural de calter inmaterial.

La declaración d'un elementu como Bien d'Interés Cultural supón que pasa a tar afectáu por un réxime de protección altu que determina, ente otres coses, la necesidá de que cualquier actuación que se lleve a cabu nél tenga que ser de primeramente informada favorablemente pola Dirección Xeneral de Patrimoniu Cultural del Gobiernu del Principáu d'Asturies, amás de requisitos específicos de caltenimientu y criterios especiales de declaración de ruina, por exemplu, que determinen la non incompatibilidá d'esi estáu cola obligación de siguir calteniendo'l bien. Tamién determinen l'aplicación de dellos beneficios fiscales, por exemplu la exención a los propietarios d'un BIC del pagu del Impuestu de Bienes Inmuebles, como midida tendente a ayudar a la inversión nel caltenimientu del elementu protexíu. Nel casu de los BIC inmuebles estrémase, amás, un ámbitu de protección alredor del elementu protexíu, pa garantizar la preservación de los valores espaciales y d'allugamientu orixinales o que perduraron hasta la fecha.

 - Inventariu del Patrimoniu Cultural d'Asturies (IPCA). Inclúyense nesti segundu nivel de protección los bienes muebles y inmuebles que tengan valores patrimoniales en grau notable, quitando naquellos casos nos que'l so interés escepcional suponga la declaración como Bien d'Interés Cultural.

La inclusión d'un bien nel IPCA determina l'aplicación de tou un réxime de protección coincidente en bona midida col de los Bienes d'Interés Cultural. Namás se van autorizar intervenciones n'elementos inventariaos que respeten los sos valores históricos y culturales y que nun pongan en riesgu'l so caltenimientu.

 - Elementos incluyíos nos catálogos urbanísticos de protección. El tercer nivel de protección patrimonial d'Asturies vien conformáu por estos instrumentos de xestión urbanística nos que s'han incluyir, obligatoriamente, tolos Bienes d'Interés Cultural y elementos del IPCA existentes nel conceyu, amás d'otros bienes patrimoniales que, a tenor del so interés, puen tener protección integral, parcial o ambiental. Nel casu de los elementos con protección integral va ser obligatoriu l'informe de la Conseyería de Cultura con calter previu a la concesión de les llicencies municipales d'obra correspondientes.

Documentos

Fecha d'actualización: Xunu 2019

  Bienes d'Interés Cultural (pdf: 518 Kb) (n'español)
  Inventariu de Patrimoniu Cultural (pdf: 2 Mb) (n'español)

   - Visor de Bienes d'Interés Cultural

Ufiértase información sobre tolos BIC declaraos d'Asturies, con datos históricos, llegales, amás d'información fotográfica y cartográfica. Nel mapa alcuéntrase'l bien y estrémase la so contornada de protección llegal.