Gobiernu del Principau d'Asturies

Asturies, muncho más cerca

Tas en

Asturias.es Visitar Asturies Historia y datos Historia y cultura
 

Historia y datos

Historia y cultura

Resume curtiu de los fechos históricos y culturales más importantes de la nuesa Comunidá Autónoma.

Ponte de Cangues d'Onís


 

La Prehistoria

Los restos más antiguos de presencia humana n'Asturies tienen alredor de 200.000 años y correspuenden al neandertal de Sidrón.

Col Homo Sapiens apaez una nueva forma de comunicación: la espresión artística. La cueva d’El Pozu’l Ramu/Tito Bustillo ye ún de los mayores esponentes mundiales d’esti arte del Paleolíticu Superior y ónde s’afayó’l que posiblemente seya ún de los primeros mapes de la Humanidá (Ver más información)

Nel 9.000-8.000 a.c, cola retirada del fríu produzse l'abandonu de les cueves.  Na costa sitúase una cultura epipaleolítica propia: l'Asturiense, que va consiguir col "picu asturiense" más metros de filu por quilu de piedra que nenguna otra.

Col Neolíticu emprimen l'agricultura y la ganadería. Hai abondos dólmenes y túmulos (megalitos) d'esta época venceyaos al control del territoriu y a nueves práutiques funeraries. L'usu de los metales empieza a xeneralizase.

Sobre'l sustratu anterior prodúcense influyencies indoeuropees, con predominiu d'elementos célticos. La Edá del Cobre, Edá del Bronce y Edá del Fierro, asisten a la nacencia de los castros, de los que se contabilicen más de 300 na rexón, dacualos d'enantes del sieglu VIII a.c.: Cuaña, San L.luis, Chao Samartín, Noega…Paralelamente, el territoriu pasa a formar parte de les cultures del Arcu Atlánticu.

La romanización

Nos años 29-19 a.c. tien llugar el Bellum Asturicum, les guerres de los ástures a la contra de Roma. Nesti momentu, amás de restos arqueolóxicos, disponemos de fontes lliteraries d'autores grecollatinos pa la conocencia de la nuesa historia.

El procesu de romanización va dir despacio, y va ser menor que n'otres provincies del Imperiu. Sicasí tenemos pruebes abondes nes Termes romanes de Xixón, la villa de Veranes o la villa de Valdunu (Les Regueres).

El Reinu d'Asturies

Nel sieglu V los visigodos entren nel escenariu ibéricu, anque nun va ser hasta'l sieglu VIII, cola fundación del Reinu d'Asturies, cuando se vuelva a ocupar un papel importante. Esti Reinu, nel que la so llexitimación s'afita cola batalla de Cuadonga, va perser el de mayor estensión d'Hispania, trespasando les fronteres del Duero y liderando la Reconquista. L'arte de la Monarquía Asturiana (Santa María del Naranco, Samiguel de Lliño, San Salvador de Valdediós y un llargu etcétera), tamién conocíu como Prerrománico Asturiano, rescaten pa los nuesos díes l'esplendor alcanzáu.

Les continues rebeliones de los condes asturianos van ser perimportantes na Edá Media, hasta que nel 1388 s'institúi'l Principáu d'Asturies, adscritu al primoxénitu herederu de la corona castellana cola fin de someter al territoriu baxo la so xurisdicción y la Xunta Xeneral del Principáu.

L'Ilustración

El fechu cultural más trescendente, nos sieglos XVI y XVII va ser la creación de la Universidá d'Uviéu. Nel XVIII Asturies va dar nomes importantes a la Ilustración en tolos ámbitos; ente ellos rescampla Xovellanos. Tamién va ser la primer rexón en llevantase escontra los franceses nel 1808.

L'economía

N'Asturies, como n'España, hasta bien metíu'l sieglu XIX, la fonte principal d'alimentación va ser l'agricultura, complementada cola caza y la pesca. Comerciu, artesanía ya industria, van dir dedicaos al consumu internu de la rexón. La introducción del maíz y la pataca, procedentes de les Amériques, van amenorgar les frecuentes famines y van permitir la medría demográfica.

El mantenimientu d'una agricultura tradicional, basada nel minifundiu y l'arrendamientu, va frenar la industrialización de la rexón nel XIX. A metada d'esti sieglu emprima la especialización ganadera y la estraición de carbón. El sieglu XX apunta a un doble procesu dende los sos entamos: el despoblamientu del campu y la superpoblación del centru alredor de les ciudaes y núcleos industriales. Paralelamente la emigración va ser un fenómenu incesante.

El siglu XX

Dientro del contestu históricu mundial y nel marcu de la II República, va tener llugar la Revolución d'Ochobre del 34, qu'ha dexar tres sí una represión sangrina y sirvir d'ensaye a los militares pal Güelpe d'Estáu de 1936. Al términu de la Guerra Civil, munchos de los republicanos que nun pudieron fuxir pela mar echáronse al monte. Estes guerrilles mantendríen la llucha escontra la dictadura de Franco hasta la final de los años 40.

A partir de 1950 el réxime emprima una cierta apertura económica. ENSIDESA fúndase en 1957 y HUNOSA poco dempués. Per estes feches nacen n'Asturies les primeres Comisiones Obreres d'España y emprima un periodu de fuelgues y conflictividá que durará hasta la cayida del dictador.

El pasu a la democracia va carauterizase pola acumulación de problemes económicos derivaos de la crisis mundial de los 70. La entrada d'España na Comunidá Europea en 1986 supondría un axuste traumáticu de la economía rexonal y va reportar la reconversión nos sectores agrícoles, mineru, llecheru, siderúrxicu, pesqueru y naval. Los Fondos Estructurales contribuyeron a menguar los efeutos del procesu tresformador.

Venti años dempués son tantos los ámbitos onde entama a espuntar la economía como los riesgos qu'acompañen al despiegue. De la tradición a la modernidá de lo público a lo privao, de lo grande a lo pequeño, l'axuste demográficu y el dinamismu empresarial son les baces pal futuru. Pero la evolución permítenos ser optimistes: colúmbrase la lluz tres la escuridá.

Webs Temátiques

Destacamos

Contauta

Serviciu d'atención ciudadana