Gobierno del Principado de Asturias

Asturias, mucho más cerca

Estás en

Aniciu Temes Cultura Retayos d'Asturies L'asturcón
 

Retayos d'Asturies

L'asturcón

Amás d'una xoya biolóxica, l’asturcón ye protagonista de la vida de los asturianos dende tiempos inmemoriales y símbolu de los sos vezos. Los asturcones trabayaron los campos, tresportaron aperios y pertenencies, movieron families y llucharon contra los enemigos de los homes y muyeres que poblaron esta tierra. Tuvieron a piques de desapaecer, pero, gracies a que se tán faciendo munchos esfuercios pa la so recuperación, podemos augura-yos un futuro próspero pal mileniu que vien. Esti caballu qu’ensin dulda antaño ocupaba grandes estensiones d’Asturies, güei ta aisláu nuna pequeña área montañosa d’aproximadamente 100 km. cuadraos, que s’estiende pel Sueve, nos conceyos de Parres, Piloña, Caravia y Colunga.

 

Por embargu, nun fueron los primeros caballos. Nes pintures d’El Pindal, Tito Bustillo o na Cueva de La Peña en Candamu, yá nos atopamos colos caballos que cazaben los nuesos antecesores n’estáu xabaz. Estos animales, a fuercia d’amiestos y pola propia selección del aislamientu, diríen dando una triba autóctona, orixinal: los asturcones. Los caballos teníen amás cierta consideración sagrada, yá qu’apaecen asociaos a ceremonies relixoses y ritos funerarios, como dan exemplu les esteles vadinienses. Son tamién oxetu de numberoses representaciones nel arte mobiliar.

 

Sieglos más tarde conviven colos astures unos caballos de pequeña alzada, cabeza curtia y cuadrada, belfos mui gruesos, güeyos gayoleros y bullindiegos, oreyes pequeñes, l’espaldar pequeñu y el vientre voluminosu. Les articulaciones son, por embargu, fuertes y les serdes grueses y ásperes. El caballu a primer vista nun paez nada especial, sicasí cuando tres d’un trote curtiu emprima la galopada, compriéndese por qué esti animal llamó tanto l’atención de los romanos. Los autores llatinos fáense ecu de les cualidaes de los asturcones como caballos de tiru y de carrera y la so popularidá llegó a Roma, onde fueron esportaos, asina como a otres partes del Imperiu. Schulten, na so obra Los cántabros y astures y la so guerra escontra Roma, miéntalu n’abondantes pasaxes. Suetonio diznos qu’ente los caballos preferíos de Nerón hebo un asturcón. Diz Silio Itálico: “Llega tamién a la rexón opuesta, bañáu cola roxada y alloñándose na so fuga de les costes patries, Astur, el desgarráu, l’escuderu de Mnemón, fíu de l’Aurora; con ellos vien igualmente un caballu pequeñu d’alzada y desconocíu na guerra; por embargu, yá s’arrinca a galope ensin necesidá d’aguiya-y el llombu, yá arrebata veloz, col so elásticu cuellu, el carru de la paz” Y Pliniu el Vieyu: “Na mesma Hispania alcuéntrense los pueblos galaicu y astur; críen una raza de caballos llamaos thieldones, asina como los asturcones, de menor tamañu; el so pasu mientres la marcha nun ye corriente, sinon elásticu, por aciu d’estender a un mesmu tiempu les pates en dambos llaos; d’equí que tean amaestraos p’andar al trote” La fama de los caballos de l’Asturies prerromana, asturcones y thieldones, y la de los sos habitantes como espertos xinetes, propició’l reclutamientu ente les tropes d’astures de cinco ales o cuerpos de caballería.

 

El comerciu d’asturcones taba nes manes de los asturconarios. L’asturcón adáptase a situaciones estremes. En primavera tien el pelame brillante mientres que n’iviernu cúbrese con una capa doble pa protexese de les baxes temperatures y asina poder buscar alimentu na nieve, lo poco qu’hai. Tienen el pelo castaño escuro, cásique prieto y a veces una mancha blanca pequeña na frente; un altor de 1,30 m. y pesen alredor de los 200 quilos. Antiguamente valorábense como puros los que teníen la mancha blanca na frente; sicasí agora valórense más los “prietos retintos”, que nun tienen estrella blanca. Tán mui adaptaos a la contorna ya integraos nel so hábitat. Estrémense bien nes oreyes, el llombu, el rau y les greñes anque pa los profanos paecen toos igual.

 

La introducción de máquines pal trabayu agrícola amenorgó la so utilidá, dexándolu pa la producción de carne y asina, relegáu a la braña y a la vida xabaz y cruciáu ensin midida con otros caballos mayores, viose abocáu a la estinción. De 2000-3000 yegües qu’había a principios de sieglu nun llegaben a 30 cabeces pures a finales los 70. Y ye qu’amás tien un periodu de xestación mui llargu (11 meses), qu’esixe volver a cubrir les femes en 9 o 10 díes depués del partu, pa que pueda volver a parir en primavera y siga’l ciclu de la vida. Ente mayu y agostu asocédense los partos y los potros dan los primeros pasos al poco de ver la lluz. Éstos zancabellones, pequeñinos y xuguetones dedicaránse los primeros meses a mamar, trebeyar y dormir.

 

La manada ye una familia de families y ta formada por un semental y varies yegües colos potrinos. El semental ye’l que defende la manada y el territoriu y ye frecuente ver lluches ente sementales por acutar o defender un espaciu o la posesión de les femes y les críes. Ye impresionante ver como se güelen, miden, golpeen ente si, mirándose como si falaren, negociaren, se tantiguaren; retándose una y otra vegada, como parte d’un ritual ancestral, onde enantes d’entamar la griesca se presentaren, enseñaren les sos armes, argumentaren los sos requerimientos… La manada xira alredor enlloquecida, unos tres d’otros, ensin separase nin perder el ruedu, que si’l semental atacante llogra aislar a dalgún animal de la manada quédase con él. Esti galopar que nun para, pue durar hores y repitise tamién al día siguiente, asina les manaes van cambiando de composición, mudando l’espaciu. La xerarquía mantiénse hasta nel beber: primero bebe’l semental, llueu la yegua y depués los potros, que se llamen tamién rastres. Nos caberos años ta lluchándose muncho por salvar y ameyorar la raza. La intervención nun ye solo pa llograr mayor pureza del sangre, sinon que tamién se cuiden la doma y l’aspeutu esternu. Agora la reproducción y la cría tan controlaes y los asturcones úsense tamién pa deporte y recréu. Na seronda báxenlos a los praos pal marcaxe. Una y bona reuníos, contrólense los nacimientos, son desparasitaos y marcaos. Un númberu diferente pa cada exemplar permite la identificación y el siguimientu posteriores, fundamentales pa tener una cabaña saneada.

 

En 1979 creóse la llamada Asociación pa la Conservación del Asturcón, de la que formaben parte ganaderos del Sueve de delles aldees como Lliberdón, Borines, Miyares y Cereceda. En 1980 l’asturcón foi catalogáu como “raza de fomentu y protección especial” autóctona d’Asturies. Los asturcones que viven nel cordal del Sueve nun son una especie silvestre, pero la llibertá de que gocien sí que-yos da un aspeutu xabaz. Los romanos apreciaron estos animales pola elegancia de los sos movimientos y la fuercia y la rapidez, que como pue vese, son mui bultables. Los asturcones, caballos de los astures, cabalguen de nuevo. Vamos esperar que pa siempre.